Baybay Laptev

Ti Baybay Laptev (Ruso: мо́ре Ла́птевых, more Laptevykh) ket ti pingir a baybay ti Taaw Artiko. Daytoy ket mabirukan iti pagbaetan ti akin-amianan nga aplaya ti Siberia, ti Peninsula Taimyr, Severnaya Zemlya ken ti Is-isla Baro a Siberia. Ti akin-amianan a pagbeddenganna ket lumabas manipud iti Rawis Artiko agingga iti punto nga addaan kadagiti nagsasabtan iti 79°N ken 139°E, ken agpatingga idiay Rawis Anisiy. Ti Baybay Kara ket mabirukan iti laud, ti Baybay Daya a Siberia iti daya.

Baybay Laptev
Nagsasabtan	76°16′7″N 125°38′23″E
Kita	Baybay
Pagpagilian ti labneng	Rusia
Kalawa ti rabaw	700,000 km2 (270,000 sq mi)
Agpakatengnga a kaadalem	578 m (1,896 ft)
Kaadaleman	3,385 m (11,106 ft)
Tomo ti danum	403,000 km3 (3.27×1011 acre⋅ft)
Dagiti nagibasaran	[1][2][3]

Ti baybay ti nanaganan manipud kada Ruso nga eksplorador Dmitry Laptev ken Khariton Laptev; daytoy ket dati nga addaan kadagiti nadumaduma a nagan, ti naudi ket ti Baybay Nordenskjold (Ruso: мо́ре Норденшельда), manipud ken ni eksplorador Adolf Erik Nordenskiöld. Ti baybay ket addaan iti nakaro a klima nga addaan kadagiti temperatura iti baba ti 0 °C (32 °F) kadagiti sumurok a 9 a bulan iti tinawen, ababa ti apgad a danum, awan unay iti flora, fauna ken populasion ti tao, ken saan unay nga adalem (kaaduan a saan nga adadalem ngem 50 metmetro). Kaaduan daytoy a nayelo, ngem kadawyan a matunaw met iti Agosto ken Septiembre.

Dagiti aplaya ti baybay ket tinagtagitao idi dagiti napalabas a tawen babaen dagiti indehenio a tribu dagiti Yakagiro ken kalpasanna dagiti Even ken dagiti Evenki, ken dagitoy ket manggalap, mangganup ken nagtartaraken iti reindeer. Kalpasanna dagitoy ket tinaengan dagiti Yakuto ken kalpasanna dagiti Ruso. Dagiti panagsukisok ti Rusia iti lugar ket nangrugi idi maika-17 a siglo. Naggapoda manipud iti abagatan babaen dagiti nadumaduma a dakkel a karayan nga agayus iti baybay, kas ti prominente a Karayan Lena, ti Khatanga, ti Anabar, ti Olenyok, ti Omoloy ken ti Yana. Ti baybay ket aglaon kadagiti nadumaduma a sangadosena nga isla, ken adu kadagitoy ketaglaon kadagiti nasayaat a napreserba a tidda dagiti mammuthus,.

Dagiti nangruna nga aktibidad ti tao iti dayta a lugar ket ti panagmina ken ti panaglayag idiay Akin-amianan a Dalan ti Baybay; ti panagkalap ken panaganup ket sinansanay ngem awan ti nasayaat a komersio a panagkalap. Ti kadakkelan a pagtaengan ken puerto ket ti Tiksi.

Sakup

Dagiti patingga ti Baybay Laptev kas inpalawag babaen ti Gunglo ti Internasional a Hidrograpiko. Daytoy a panangipalawag ken batimetria nga addaan iti 1 nga arko-minuto a resolusion ket mangiturong ti maysa a lugar iti 502000 km² a maiyasping iti 672000 km² manipud iti WolframAlpha.

Ti Gunglo ti Internasional a Hidrograpiko ket ipalawagna dagiti patingga ti baybay Laptev babaen ti sumaganad:^[4]

Iti laud. Ti akindaya a patingga ti Bayaby Kara [Ti Isla Komsomolets manipud iti Rawis Molotov aginggana ti Rawis Abagatan a Daya; kalpasanna ti Rawis Vorochilov, Isla Oktiabrskaya Revolutziya aginggana idiay Rawis Anuchin. Kalpasanna idiay Rawis Unslicht idiay Isla Bolshevik. Ti Isla Bolshevik aginggana idiay Rawis Yevgenov. Kalpasanna idiay Rawis Pronchisthehev iti nangruna a daga (kitaen ti karta ti Rusia Blng.. 1484 iti tawe ti 1935)].

Iti amianan. Ti linialine a mangikapet ti Rawis Molotov iti Akin-amianan unay a punto ti Isla Kotelni (76°10′N 138°50′E).

Iti daya. Manipud ti Akin-amianan unay a punto ti Isla Kotelni – babaen ti Isla Kotelni aginggana idiay Rawis Madvejyi. Kalpasanna babaen ti Isla Malyi [Ti Isla Bassit a Lyakhovsky], aginggana idiay Rawis Vaguin idiay Isla Nalatak a Liakhov. Kalpasanna idiay Sviatoy Noss iti nangruna a daga.

Ti panagusar ti agdama a heograpiko a nagnagan ken ti transkripsion daytoy a panangipalawag ket maitunos iti lugar a naipakita iti mapa.

1. Ti pagbeddengan ti baybay ket mangrugi idiay Rawis Artiko (dati a Rawis Molotov) idiay Isla Komsomolets iti 81°13′N 95°15′E ken maisilpo iti abagatan a daya ti rawis ti isla.
2. Ti sumaruno a paset ket balasiwenna ti Lingsat Krasnoyarmyy ken maiturong iti Rawis Vorochilov idiay Isla Rebolusion Oktubre ken kalpasanna babaen ti dayat nga isla aginggana idiay Rawis Anuchin iti 79°39′37″N 100°21′22″E.
3. Ti sumaruno, ti pagbeddengan ket ballasiwenna ti Lingsat Shokalsky aginggana idiay Rawis Unslicht iti 79°25′04″N 102°31′00″E idiay Isla Bolshevik. Mapan nga ad-adayo babaen ti isla aginggana idiay Rawis Yevgenov iti 78°17′N 104°50′E.^[5]
4. Manipud idiay, ti pagbeddengan ket mapan babaen ti Lingsat Vilkitsky aginggana idiay Rawis Pronchishchev iti 77°32′57″N 105°54′4″E idiay peninsula Tamyr.
5. Ti akin-abagatan a pagbeddengan ket ti aplaya ti nangruna a daga ti Asia. Dagiti prominente a langa ket ti Golpo Khatanga (estuario ti Karayan Khatanga) ken ti delta ti Karayan Lena.
6. Iti daya, ti poligono ket ballasiwenna ti Lingsat Dmitry Laptev. Daytoy ket ikapetna ti Svyatoy Nos iti 72.7°N 141.2°E / 72.7; 141.2 (Svyatoy Nos) iti Rawis Vaguin iti 73°26′0″N 139°50′0″E iti daya unay ti Isla Bolshoy Lyakhovsky.
7. Ti sumaruno, ti pagbeddengan ti Baybay Laptev ket ballasiwenna ti Lingsat Eterikan aginggana idiay Isla Bassit a Lyakhovsky (ammo pay a kas isla Malyi) iti 74.0833°N 140.5833°E / 74.0833; 140.5833 (Isla Bassit a Lyakhovsky) aginggana idiay Rawis Madvejyi.
8. Iti kanungpalan, adda met bassit a paset babaen ti Isla Kotelny iti akin-amianan unay a rawisna iti 76°10′N 138°50′E.
9. Ti maudi a silpo ket umabot manipud idiay ken agsubli aginggan aidiay Rawis Artiko.

Dagiti nagibasaran

1. Baybay Laptev, Nalatak nga Ensiklopedia ti Sobiet (iti Ruso)
2. Laptev Sea, Encyclopædia Britannica on-line
3. A. D. Dobrovolskyi and B. S. Zalogin Dagiti bayaby ti USSR. Baybay Laptev, Unibersidad ti Moscow (1982) (iti Ruso)
4. "Limits of Oceans and Seas, 3rd edition" (PDF). International Hydrographic Organization. 1953. Naiyarkibo manipud iti kasisigud (PDF) idi 2010-10-15. Naala idi 6 Pebrero 2010.
5. "Topographic maps T-48-XIII, XIV, XV – 1:200 000". Топографические карты (iti Ruso). Naala idi 2012-09-17.

Dagiti akinruar a silpo

Dagiti midia a mainaig iti Baybay Laptev iti Wikimedia Commons