Antipoda
diametrikal a kasumbangir a punto iti rabaw ti Daga / From Wikipedia, the free encyclopedia
Iti heograpia, dagiti antipoda (manipud iti Griego: ἀντίποδες,[1] manipud iti anti- "kasumbangir" ken pous "saka") iti ania man a lugar iti Daga ket ti punto iti rabaw ti daga a diametrikal a kasumbangirna. Dagiti dua a punto nga antipodal iti tunggal maysa ket naikapetda babaen ti maysa a nalinteg a linia nga agtartaray babaen ti tengnga ti Daga.
Iti Aki-amianan a Hemisperio, "dagiti Antipoda" ket mabalin a mausar a mangibaga iti Australia ken Baro a Selanda, ken dagiti "Antipodeano" kadagiti agtataeng kaniada.[2] Iti heograpia, dagiti antipoda ti Britania ken Irlanda ket adda idiay Taaw Pasipiko, iti abagatan ti Baro a Selanda. Daytoy ket nakaited iti nagan ti Is-isla Antipoda ti Baro a Selanda, nga asideg dagitoy dagiti antipoda ti Londres iti agarup a 50° S 179° E. Dagiti antipoda ti Australia ket addada idiay Amianan a Taaw Atlantiko, bayat a dagiti parte ti Espania, Portugal, ken Morocco ket antipodalna iti Baro a Selanda
Agarup a 15% iti teritorio ti daga ket antipodal iti sabali a daga, a mangirepresenta iti agarup a 4.4% iti rabaw ti daga. Ti kadakkelan nga antipodal dagiti masa ti daga ket ti Purpuro Malay, antipodal iti Labneng Amasona ken ti kadenna nga kabambantayan ti Andes; ti daya a Tsina ken Mongolia, ket antipodal iti Chile ken Arhentina; ken ti Greenland ken ti Purpuro ti Artiko ti Kanada, ket antipodal iti Daya nga Antartika.