Արտակ Ղուլյան

Արտակ Բենիկի Ղուլյան (դեկտեմբերի 28, 1958(1958-12-28), Գյուլիստան, Շահումյանի շրջան (Ադրբեջանի ԽՍՀ), Ադրբեջանական ԽՍՀ, ԽՍՀՄ), հայ ճարտարապետ, ճարտարապետության թեկնածու, դոցենտ, Հայաստանի Հանրապետության վաստակավոր ճարտարապետ (2013)^[1], Հայաստանի պետական մրցանակի դափնեկիր։

Արտակ Ղուլյան
Ծնվել է	դեկտեմբերի 28, 1958(1958-12-28) (65 տարեկան)
Ծննդավայր	Գյուլիստան, Շահումյանի շրջան (Ադրբեջանի ԽՍՀ), Ադրբեջանական ԽՍՀ, ԽՍՀՄ
Կրթություն	ՀԱՊՀ (1981)
Ուշագրավ աշխատանքներ	Սուրբ Հովհաննես Մկրտիչ Եկեղեցի
Պարգևներ	Հայաստանի պետական մրցանակ
Artak Ghulyan Վիքիպահեստում

Կենսագրություն

Ծնվել է 1958 թվականի դեկտեմբերի 28-ին, Լեռնային Ղարաբաղի Շահումյանի շրջանի Գյուլիստան գյուղում, ուսուցիչների ընտանիքում։ 1976 թվականին ոսկե մեդալով ավարտել է տեղի միջնակարգ դպրոցը։ 1976-1981 թթ. սովորել է Երևանի Պոլիտեխնիկական ինստիտուտի ճարտարապետաշինարարական ֆակուլտետի ճարտարապետության բաժնում։ 2006 թվականին ավարտել է ԵրՃՇՊՀ դոկտորանտուրան։ 2013 թվականին, Հայաստանի անկախության հռչակման 22-րդ տարեդարձի կապակցությամբ, բազմամյա վաստակի և ստեղծագործական նվաճումների համար արժանացել է Հայաստանի վաստակավոր ճարտարապետի կոչման^[1]։ Նույն թվականին, ճարտարապետության և քաղաքաշինության բնագավառում՝ Մայր Աթոռ Սուրբ Էջմիածնի Վաչե և Թամար Մանուկյան մատենադարանի համար ճարտարապետ Արտակ Ղուլյանն արժանացել է ՀՀ պետական մրցանակի^[2]։ 2014 թվականին, ճարտարապետության միջազգային ակադեմիայի մոսկովյան մասնաճյուղի նիստի որոշմամբ՝ ընտրվել է ակադեմիայի անդամ, պրոֆեսորի կոչումով։ Ամուսնացած է, ունի երկու որդի և չորս թոռ։

Սուրբ Պայծառակերպության եկեղեցին և Սուրբ Խաչ մատուռը Մոսկվայում

Սուրբ Կարապետ եկեղեցին Հորդանանում՝ Քրիստոսի մկրտության վայրում

Աբովյան քաղաքի Սուրբ Հովհաննես եկեղեցին

Աշխատանքային գործունեություն

1981-1988 թթ. աշխատել է ԵրՊԻ ճարտարապետության ամբիոնում, նախ՝ որպես լաբորանտ, ապա՝ ճարտարապետության կաբինետի վարիչ, միաժամանակ դասավանդելով ճարտարապետական նախագծման հիմունքներ առարկան։ 1988-1991 թթ. ՀՀ գիտությունների ազգային ակադեմիայի արվեստի ինստիտուտի ճարտարապետության բաժնի գիտական աշխատակից։ 1991-1994 թթ. Հայաստանի Հանրապետության Հուշարձանների պահպանության վարչության գիտաարտադրական արվեստանոցի միջնադարի բաժնի վարիչ։ 1994 թվականից ՀՀ գիտությունների ազգային ակադեմիայի Արվեստի ինստիտուտի ճարտարապետության բաժնի ավագ գիտական աշխատակից է։ 1988-2010 թթ. համատեղությամբ դասավանդել է ԵրՊԻ, ԵրՃՇԻ, ԵրՃՇՊՀ այժմ՝ ՃՇՀԱՀ ճարտարապետության տեսության, պատմության և հուշարձանների վերականգնման ամբիոնում։

2002 թվականից նույն ամբիոնի դոցենտ է. ղեկավարում է կուրսային և դիպլոմային նախագծեր հուշարձանների վերականգնման թեմաներով, ինչպես նաև ասպիրանտներ՝ ճարտարապետության տեսության ու պատմության գծով։

Մայր Աթոռ Սուրբ Էջմիածնի «Վաչէ և Թամար Մանուկեան» մատենադարանը

Գիտական աշխատանքներ

• 1981 թվականից զբաղվում է Արցախի և Հայաստանի պատմաճարտարապետական հուշարձանների ուսումնասիրությամբ. չափագրել է բազմաթիվ հուշարձաններ, հանդես եկել զեկուցումներով, հրատարակել հոդվածներ։
• 1999 թվականին պաշտպանել է ատենախոսություն «Արցախի և Սյունիքի մելիքական ապարանքները» խորագրով, ստացել ճարտարապետության թեկնածուի գիտական աստիճան։
• 2001 թվականին աշխատությունը լրամշակելով, հրատարակել է առանձին գրքով։ /Երևան, 2001 թ./^[3][4]

Ստեղծագործական աշխատանքներ

• Երևանի Սուրբ Գրիգոր Լուսավորիչ Մայր եկեղեցու նախագծման ստեղծագործական մրցույթում արժանացել է առաջին կարգի մրցանակի (1992 թ.)։
• Հայաստանում քրիստոնեության ընդունման 1700-ամյակին նվիրված հուշակոթողի նախագծման մրցույթին արժանացել է մրցանակի (2000 թ.)։
• 2007 թվականին Մայր Աթոռ Սուրբ Էջմիածնում՝ Վեհարանի բակում Արտակ Ղուլյանի նախագծով կառուցվել է ազգային բարերարներ Ալեք և Մարի Մանուկյանների հուշակոթողը և նույն թվականին արժանացել ՀՀ Քաղաքաշինության նախարարության՝ «Տարվա լավագույն հուշակոթող» մրցանակին։
• Մոսկվայի հայկական եկեղեցական համալիրը (2005-2013 թթ.)^[5][6][7]
• Արտաշատ քաղաքի Սուրբ Հովհաննես Ավետարանիչ եկեղեցին (2002-2015 թթ.)^[8]
• Աբովյան քաղաքի Սուրբ Հովհաննես Մկրտիչ եկեղեցին (2005-2013 թթ.)^[9]
• Մայր Աթոռ Սուրբ Էջմիածնի «Վաչէ և Թամար Մանուկեան» մատենադարանը (2009-2012 թթ.)^[10]
• Երևանի Էրեբունի վարչական շրջանի Սուրբ Մեսրոպ Մաշտոց եկեղեցին (2005 թ.)^[11]
• Երևանի Արաբկիր վարչական շրջանի Սուրբ Խաչ եկեղեցին^[12]
• Հորդանանի Սուրբ Կարապետ հայկական եկեղեցին՝ Հորդանան գետի ափին, Հիսուս Քրիստոսի մկրտության վայրում (2007-2008 թթ.)։
• Սևան քաղաքի Սրբոց Հրեշտակապետաց եկեղեցին (2009-2015 թթ.)^[8]
• Բերդ քաղաքի Սուրբ Հովհաննես եկեղեցին։ (2010-2014 թթ.)^[13]
• Նոր Հաճըն քաղաքի Սուրբ Ամենափրկիչ եկեղեցին։ (2011-2015 թթ.)^[14]
• Մայր Աթոռ Սուրբ Էջմիածնի Էօրնեկեան վարժարանի շենքը։
• ՌԴ Սարատով քաղաքի հայկական եկեղեցին։
• ՌԴ Վլադիմիր քաղաքի հայկական եկեղեցին։
• ՌԴ Վոլգոգրադ քաղաքի հայկական եկեղեցին^[15]
• ՌԴ Սուրգուտ քաղաքի հայկական եկեղեցին։
• Երևանի Նուբարաշեն վարչական շրջանի Սրբոց Նահատակաց եկեղեցին (2012-2015 թթ.)^[16]
• Արմավիրի մարզի Ակնալիճ գյուղի եզդիական նոր տաճարը^[17]
• Երևանի Կոմիտասի անվան զբոսայգու պանթեոնում նախատեսվող, Հայոց Ցեղասպանության սրբադասված նահատակներին նվիրված Սրբոց Նահատակաց եկեղեցու փակ ստեղծագործական մրցույթում ընտրված նախագիծը^[18]

Տպագրված աշխատանքներ

• «Արցախի և Սյունիքի մելիքական ապարանքները», Երևան, 2001 թ. /մենագրություն/^[3][4]
• 20 հոդված և հրապարակում՝ նվիրված Արցախի, հայ պալատական ճարտարապետության և Անիի ճարտարապետական դպրոցի հուշարձաններին։

Ծանոթագրություններ

1. Հայաստանի պատվավոր կոչումներ շնորհելու մասին
2. https://president.am/hy/decrees/item/1084/
3. «Արխիվացված պատճենը». Արխիվացված է օրիգինալից 2016 թ․ մարտի 4-ին. Վերցված է 2014 թ․ նոյեմբերի 12-ին.
4. https://books.google.am/books?id=elWEAAAACAAJ&dq=%D4%B1%D6%80%D5%BF%D5%A1%D5%AF+%D5%82%D5%B8%D6%82%D5%AC%D5%B5%D5%A1%D5%B6&hl=en&sa=X&ei=Rk1kVJNiiYbMA46VgtAE&ved=0CBwQ6AEwAA
5. http://www.azg.am/AM/2006090616
6. http://www.azg.am/AM/2009011314
7. http://www.azg.am/AM/2009100715
8. https://president.am/hy/press-release/item/2015/05/31/President-Serzh-Sargsyan-attended-Artashat-and-Sevan-churches/#!prettyPhoto
9. «Արխիվացված պատճենը». Արխիվացված է օրիգինալից 2014 թ․ հուլիսի 5-ին. Վերցված է 2014 թ․ նոյեմբերի 13-ին.
10. «Արխիվացված պատճենը». Արխիվացված է օրիգինալից 2015-03-27-ին. Վերցված է 2015-06-05-ին.
11. http://www.azg.am/AM/2006072220
12. https://www.youtube.com/watch?v=BUVacHzCJto&feature=youtu.be
13. http://ter-hambardzum.net/archives/9877(չաշխատող+հղում)
14. http://www.armeniatv.am/hy/news/57137(չաշխատող+հղում)
15. https://armenpress.am/arm/news/736748/volgogradum-haykakan-nor-ekexeci-kkarucvi.html
16. «Արխիվացված պատճենը». Արխիվացված է օրիգինալից 2016 թ․ մարտի 10-ին. Վերցված է 2015 թ․ հունիսի 5-ին.
17. http://ezidipress.com/blog/neuer-tempel-in-armenien-grundsteinlegung-im-september/
18. «Արխիվացված պատճենը». Արխիվացված է օրիգինալից 2016 թ․ մարտի 9-ին. Վերցված է 2015 թ․ հունիսի 5-ին.

Արտաքին հղումներ

• Արտակ Ղուլյան Արխիվացված 2021-12-25 Wayback Machine
• Արտակ Ղուլյանի մասին տեսանյութ, Շողակաթ Արխիվացված 2013-10-28 Wayback Machine
• Պաշտոնական կայքը