Գարեգին Մելոյան

Գարեգին Գրիգորի Մելոյան (մայիսի 5, 1884(1884-05-05), Վան, Վանի վիլայեթ, Օսմանյան կայսրություն - մայիսի 24, 1939(1939-05-24), Թբիլիսի, Վրացական ԽՍՀ, ԽՍՀՄ), հայ արձակագիր, բանաստեղծ, գրականագետ, թարգմանիչ, մանկավարժ, բանասիրական գիտությունների թեկնածու, ԽՍՀՄ գրողների միության անդամ 1934 թվականից։

Վիքիպեդիայում կան հոդվածներ Մելոյան ազգանունով այլ մարդկանց մասին։

Գարեգին Մելոյան
Ծնվել է	մայիսի 5, 1884(1884-05-05)
Ծննդավայր	Վան, Վանի վիլայեթ, Օսմանյան կայսրություն
Մահացել է	մայիսի 24, 1939(1939-05-24) (55 տարեկան)
Մահվան վայր	Թբիլիսի, Վրացական ԽՍՀ, ԽՍՀՄ
Քաղաքացիություն	Օսմանյան կայսրություն և  ԽՍՀՄ
Կրթություն	Գևորգյան հոգևոր ճեմարան (1907)
Գիտական աստիճան	բանասիրական գիտությունների թեկնածու
Մասնագիտություն	գրականագետ, թարգմանիչ, արձակագիր և բանաստեղծ
Աշխատատու	Մարտակոչ
Անդամություն	ԽՍՀՄ Գրողների միություն

Կենսագրություն

Ծնվել է Արևմտյան Հայաստանի Վան քաղաքում։ Հինգ տարեկան հասակում զրկվել է մորից։ 1895 թվականին նրանց ընտանիքը տեղափոխվել է Անդրկովկաս։ Գարեգինը տեղավորվել է Էջմիածնի սուրբ Գայանե վանքին կից որբանոցում։ 1907 թվականին ավարտել է Գևորգյան ճեմարանի լսարանական բաժինը։ 1907 թվականից էլ սկսել է զբաղվել մանկավարժական աշխատանքով, որ տևել է 32 տարի։ Միաժամանակ աշխատել է Թիֆլիսի «Կարմիր աստղ» օրաթերթի խմբագրությունում որպես պատասխանատու քարտուղար, «Մարտակոչի» խմբագրությունում՝ որպես գրական բաժնի վարիչ, «Նոր աշխարհ» ամսագրի խմբագրությունում՝ որպես քարտուղար և ոճաբան։ Որոշ ժամանակ դասախոսել է Թիֆլիսի համալսարանի հեռակա բաժնում։ Գրել է «Պետրոս Դուրյանը և իր քնարը» ուսումնասիրությունը, որից մի հատված տպագրվել է «Արշավի» 1938 թվականի թիվ 4-ում։ Գարեգին Մելոյանի գեղարվեստական գործերից՝ «Վերածնված Պետոն» (հատված վեպից) տպագրվել է «Լուսաբացի» 1928 թվականի թիվ 2-ում, «Արևելյան լեգենդը»՝ նույն հանդեսի 1929 թվականի թիվ 3-ում։ Մահացել է Թբիլիսիում^[1]։

Թարգմանություններ (ռուսերենից)

Այս հեղինակի կատարած թարգմանությունների ցանկը կարող եք որոնել «Թարգմանչաց արվեստ» շտեմարանի «Թարգմանիչներ» բաժնում

• Կազիմիր Տետմայեր, Հաղթանակ, Թիֆլիս, տպարան «Կուլտուրա», 1912, 42 էջ։
• Գ. Վ. Պլեխանով, Պատմության մատերիալիստական ըմբռնումը, Թիֆլիս, տպարան պոլիգրաֆ դպրոցի, 1928, 168 էջ։
• Ալեքսանդր Պուշկին, Բորիս Գոդունով, Երևան, Հայպետհրատ, 1950, 98 էջ։
• Ալեքսանդր Պուշկին «Ծաղիկը», «Սիրիր», «Ձմեռվա երեկո», «Սև շալ», «Դևեր», «Գյուղը»։
• Լև Տոլստոյ «Կանաչ ձողիկ»։
• Մաքսիմ Գորկի «Մրրկահավի երգը», «Բազեի երգը», «Սկսնակ գրողներին», 1920։
• Ջեկ Լոնդոն «Արյունախանձ վրեժխնդրություն»։
• Էմիլ Վերհարն «Աշուն», «Հին հեքիաթ»։
• Վիկտոր Հյուգո «Դիրքերի վրա»։

Գարեգին Մելոյանի կենսագրական ակնարկներ

• Ադամյան Արշավ (երաժշտագետ), 1884 թվական։
• Գուլակյան Արմեն - 1899 թվական։
• Գրիգորիս Աղթամարցի։
• Ալիխանյան Իսահակ - 1876 թվական։
• Ռոմանոսի մասին։
• Բերոյան «Իմ համառոտ կենսագրությունն ու բեմական գործունեությունը»։
• Աբելյան Ալեքսանտի։
• Թադևոս Հայրապետի Ավդալբեգյան։
• Հարությունյան Արշակ - 1869-1936 թվականներ։
• Առաքելյան Համբարձում - 1855-1918 թվականներ։
• Դարյան Արմենյան-1883 թվական։
• Աբով Գևորգ։
• Հարությունյան Իսահակ-1863-1928 թվականներ։
• Դանիել Վարուժան։
• Մարի Բերոյան «Իմ համառոտ կենսագրությունը»։
• Գալստյան Վահան - 1888 թվական։
• Գուլազյան Օլգա։
• Դանիելյան Հայկանուշ։