From Wikipedia, the free encyclopedia
Պերեդելկինոյի գերեզմանատուն (ռուս.՝ Переделкинское кладбище), գերեզմանատուն Մոսկվայում՝ Պերեդելկինո երկաթուղային կայարանի մոտ, գրական գործիչների թաղման վայր։ Տեղակայված է Սետուն գետի բարձր ափին։ Հնուց եղել է մերձմոսկովյան տարածք, իսկ 2012 թվականին Մոսկվայի սահմանների ընդլայնումից հետո հայտնվել է քաղաքի տարածքում։
Պերեդելկինոյի գերեզմանատուն | |
---|---|
Տեսակ | գերեզմանատուն |
Տեղագրություն | Մոսկվա |
Երկիր | Ռուսաստան |
Հիմնադրման տարեթիվն անհայտ է։ Գոյություն է ունեցել որպես Լուկինո գյուղի գերեզմանատուն առնվազն 17-րդ դարից։
1934 թվականին գերեզմանատնից ոչ հեռու գրողների Պերեդելկինո ամառանոցային գյուղակի հիմնադրումից հետո այնտեղ սկսել են թաղել այդ գյուղակի բնակիչներին։ 1960-ական թվականներից գերեզմանատանն սկսել է գրողների նեկրոպոլ, որը ներկայում համարվում է Ռուսաստանի գրողների ամենահայտնի նեկրոպոլներից մեկը։ Այնտեղ են գտնվում Բորիս Պաստեռնակի, Կոռնեյ Չուկովսկու, Արսենի Տարկովսկու, Ռոբերտ Ռոժդեստվենսկու[1], Եվգենի Եվտուշենկոյի, «Կոմունիստներ, առա՛ջ» (ռուս.՝ «Коммунисты, вперёд!») բանաստեղծության հեղինակ Ալեքսանդր Մեժիրովի[2], «Կռունկներ» բանաստեղծության ռուսերեն տեքստի հեղինակ Նաում Գրեբնևի, «Երգ ընկերոջ մասին...» (ռուս.՝ «Песни о друге», «Если радость на всех одна…») հեղինակ Գրիգորի Պոժենյանի, Վալենտին Ուստինովի, Խորհրդային գրողների միության ղեկավարներ Վադիմ Կոժևնիկովի, Եգոր Իսաևի, Սերգեյ Սարտակովի, Ռուսական ՊԵՆ կենտրոնի գլխավոր տնօրեն (1994-2007), բանաստեղծ Ալեքսանդր Տկաչենկոյի, արձակագիր և Լեոնիդ Բրեժնևի «Փոքր Երկիր» (ռուս.՝ «Малая Земля») եռագրության ենթադրյալ հեղինակ Արկադի Սախնինի և այլոց գերեզմանները։
Գերեզմանատանը տեղադրվել է Անդրեյ Տարկովսկու կենոտաֆը[3]։
Մտադրություն է եղել Պերեդելկինոյի գերեզմանատանը թաղել Անդրեյ Վոզնեսենսկուն, որը Բորիս Պաստեռնակին համարել է իր ուսուցիչն ու կուռքը, սակայն ի վերջո նա թաղվել է Նովոդևիչյան գերեզմանատանը որտեղ հանգչում էին նրա ծնողները[4]։
Գերեզմանատանը թաղվել են Խորհրդային Միության հերոսներ Նիկոլայ Բաբանակովը, Ալեքսանդր Կոսիցինը և Ալեքսեյ Մարտինովը, տեղադրվել է Հայրենական մեծ պատերազմումմ զոհված Լուկինոյի բնակիչների հիշատակին նվիրված հուշարձան, որոշ տեղամասում թաղվել են ծեր բոլշևիկներ[5], որոնք ապրել են 1922 թվականին ոչ հեռու ստեղծված առողջարանում (ներկայում՝ գերոնտոլոգիական կենտրոն)[6]։ Պերեդելկինոյի գերեզմանատանն է թաղվել միջազգային լրագրող, բանաստեղծ և թարգմանիչ, սոցիալիզմի ջատագով Մերի Ռիդը, որ վերապրել է Լենինգրադի շրջափակումը[7]։
Պերեդելկինոյի գերեզմանատանը թաղվել են Սոցիալիստական աշխատանքի հերոս Իվան Կոմզինը, ԽՍՀՄ ԳԱ թղթակից անդամ, պուշկինագետ Դմիտրի Բլագոյը, ԽՍՀՄ ԲԳԱ ակադեմիկոս Սերգեյ Նավաշինը[8], երգիչ իշխան Միխայիլ Վոլկոնսկին, ԽՍՀՄ ժողովրդական արտիստ Իոսիֆ Ռաևսկին[9], քանդակագործ Վադիմ Սիդուրը, նկարիչ Կիրիլ Սոկոլովը, դիվանագետ Անատոլի Մովչանը, գրոսմայստեր Եֆիմ Գելլերը և Օլիմպիական խաղերի մրցանակակիր, վոլեյբոլիստ Մարիտա Կատուշևան[10], գրողների ընտանիքների անդամներ, օրինակ՝ Նիկոլայ Տիխոնովի կինը՝ Մ. Նեսլուխովսկայան[11]։
Բորիս Պաստեռնակի ու Կոռնեյ Չուկովսկու գերեզմանները հայտարարվել են մշակութային ժառանգության օբյեկտներ։
2007 թվականին գերեզմանատան մոտ կառուցվել է Քրիստոսի հարության եկեղեցին[12]։
Երեք սոճին, որոնց մոտ թաղվել է Բորիս Պաստեռնակը, գովերգվել են բազմաթիվ բանաստեղծություններում[13]։ 1985 թվականին դրանցից մեկ, որն ավելի մոտ էր գտնվում գերեզմանին, ընկել է՝ սպառնալով վնասել շիրմաքարը։ Այդ ժամանակ ծառը կտրել են, իսկ 1990 թվականին՝ արմատահան արվել[14]։
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.