![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/4/4a/M%25C4%259Br%25C4%2587in_Nowak_woko%25C5%2582o_1970.jpg/640px-M%25C4%259Br%25C4%2587in_Nowak_woko%25C5%2582o_1970.jpg&w=640&q=50)
Měrćin Nowak-Njechorński
serbski moler, grafikar, publicist a spisowaćel / From Wikipedia, the free encyclopedia
Měrćin Nowak-Njechorński (němsce Martin Nowak-Neumann) (* 13. junija 1900 w Njechornju, † 6. julija 1990 runje tam) bě serbski moler, grafikar, publicist a spisowaćel.
![Thumb image](http://upload.wikimedia.org/wikipedia/commons/thumb/c/cb/Hrod%C5%BAi%C5%A1%C4%87anski_k%C4%9Brchow_Nowak-Njechor%C5%84ski_1.jpg/640px-Hrod%C5%BAi%C5%A1%C4%87anski_k%C4%9Brchow_Nowak-Njechor%C5%84ski_1.jpg)
![Thumb image](http://upload.wikimedia.org/wikipedia/commons/thumb/4/4a/M%C4%9Br%C4%87in_Nowak_woko%C5%82o_1970.jpg/640px-M%C4%9Br%C4%87in_Nowak_woko%C5%82o_1970.jpg)
Měrćin Nowak narodźi so jako najmłódše ze štyrjoch dźěći do klamarskeje swójby w tehdy hišće přewažnje serbskim Njechornju. Nan pochadźeše z Kumwałda, měješe pak sam serbsku maćer; Měrćinowa mać bě rodźena Serbowka z Njechornja.[1] Po wuchodźenju ludoweje šule we Worcynje kubłaše so w dalokostudiju na polu molerstwa. 1919 měješe prěnju předawansku wustajeńcu w Zhorjelcu, kotrejež financielne dochody jemu pomhachu, studij na Lipščanskej wuměłskej akademiji zahajić.
1920 studowaše potajkim wuměłstwo w Lipsku, 1921–1923 w Drježdźanach. Tam budźi so jeho zahorjenosć za serbstwo, kiž jeho tež pohnuwaše, swoje studije w słowjanskim wukraju pokročować. Z tutoho časa sem zaběraše so wosebje z motiwami słowjanskeje mytologije. Podawaše so 1923 do Prahi, hdźež mjez druhim pola Maxa Švabinskeho studowaše a hač do 1927 wosta. 1927–1929 bě student na wuměłskej akademiji we Waršawje. Wot 1929 do 1933 bě z redaktorom Serbskich nowin. Z politiskich přičin bu 1933 z powołanja pušćeny a dyrbješe w Druhej swětowej wójnje jako wojak we Wehrmachće słužić. Wróćiwši so z ameriskeje wójnskeje jatby bu w lěće 1947 ze šefredaktorom Noweje doby, wot 1950 hač 1969 tež Rozhlada. Po tym zo so w lěće 1969 na wuměnk poda, bě jako swobodnje tworjacy moler a spisowaćel žiwy.
Měrćin Nowak-Njechorński bu dwójce z Wótčinskim zasłužbowym rjadom NDR, z Narodnym mytom NDR, z Mytom Ćišinskeho a z rjadom Hwězda přećelstwa ludow wuznamjenjeny.
Nowak bu na Hrodźišćanskim ewangelskim kěrchowje pochowany. Na samsnym městnje nadeńdźetej so tež rowaj jeho mandźelskeje Marty a jeho maćerje. Ródny dom w Njechornju bu zjawnosći w juniju 1999 jako muzej přepodaty.