![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/f/f9/Jakub_Bart-%25C4%2586i%25C5%25A1inski.jpg/640px-Jakub_Bart-%25C4%2586i%25C5%25A1inski.jpg&w=640&q=50)
Myto Ćišinskeho
serbske wuznamjenje / From Wikipedia, the free encyclopedia
Z Mytom Ćišinskeho wuznamjenja Załožba za serbski lud wosobiny abo tež skupiny wosobinow k wopomnjeću na Jakuba Barta-Ćišinskeho. Z mytom hódnoća a spěchuja so „wusahowace wukony na polu serbskeje kultury, wuměłstwa a wědomosće”.[1] Myto Ćišinskeho a spěchowanske Myto Ćišinskeho so dwulětnje, po móžnosći na předwječoru posmjertnin Ćišinskeho, dnja 15. oktobra spožčitej.
![Thumb image](http://upload.wikimedia.org/wikipedia/commons/thumb/f/f9/Jakub_Bart-%C4%86i%C5%A1inski.jpg/320px-Jakub_Bart-%C4%86i%C5%A1inski.jpg)
K prěnjemu razej so myto w lěće 1956, składnostnje stotych narodnin Ćišinskeho a tehdy hišće jako statne myto Němskeje demokratiskeje republiki (NDR) spožči. K poslednemu razej so statne myto NDR přez knježerstwo de Maizière w lěće 1990 spožči. Hač do lěta 1995 so nichtó njemytowaše a wot toho lěta je Załožba za serbski lud nadawk přewzała, prócowarjow z tutym mytom wuznamjenić. Kuratorij, kotryž wobsteji ze zastupjerjow Załožboweje rady, Domowiny z Hornjeje Łužicy, Domowiny z Delnjeje Łužicy, Zwjazka serbskich wuměłcow, Zwjazka serbskich spěwarskich towarstwow, Maćicy Serbskeje a Serbskeho šulskeho towarstwa, rozsudźi wo spožčenju myta.
Myto spožči so wosobinje abo skupinje wosobinow jenož jónu.