Helmut Schmidt
němski politikar (SPD) a publicist, zwjazkowy kancler 1974–1982 / From Wikipedia, the free encyclopedia
Helmut Heinrich Waldemar Schmidt (* 23. decembra 1918 w Hamburgu, † 10. nowembra 2015[1]) bě němski socialdemokratiski politikar a běše němski zwjazkowy kancler. W běhu swojeho politiskeho žiwjenja skutkowaše jako zapósłanc zwjazkoweho sejma (1953–1962, 1965–1987), nutřkowny senator w ródnym Hamburgu (1961–65), předsyda frakcije SPD w zwjazkowym sejmje (1966–69), zakitowanski minister (1969–72) a financny minister (1972–74). Po wotstupje Willyja Brandta bu dnja 16. meje 1974 wot sejma za pjateho zwjazkoweho kanclera woleny. Wjedowaše koaliciju stronow SPD a FDP dale hač do lěta 1982, hdyž wustupi FDP z koalicije. Jeho naslědnik bě Helmut Kohl (CDU).
Schmidt jako zakitowanski minister wokoło 1969 | |
Zakładne daty | |
datum narodźenja: | 23. decembra 1918 |
ródne město: | Hamburg |
datum zemrěća: | 10. nowembra 2015 |
městno zemrěća: | Hamburg |
Najwažniše temy w času jeho kanclerstwa běchu mjez druhim wolijowa kriza, reforma rentoweho systema, teroristiske wohroženje ze strony RAF w tak mjenowanej „němskej nazymje“, zawjedowanje zhromadneho europskeho měnoweho systema (ECU) a wubědźowanje w brónjenju mjez zapadom a wuchodom. Schmidt podpěrowaše jadrowu energiju kaž tež brónjenje z raketami na němskim teritoriju. Z lěwicarskeje opozicije napřećo Schmidtowej politice nastachu mjez druhim Zeleni jako štwórta strona němskeho politiskeho spektruma.
Wot lěta 1983 bě Schmidt sobuwudawaćel tydźenika „Die Zeit“. Wón bě čestny měšćan Hamburga, Bremerhavena, Berlina, Bonna, Güstrowa a kraja Schleswigsko-Holsteinska kaž tež čestny doktor na 30 uniwersitach, mjez druhim w Oxfordźe a Cambridge. Uniwersita Zwjazkoweje wobory w Hamburgu rěka wot lěta 2003 Helmuta Schmidtowa uniwersita.