客家語

　　客家話（白話字：Hak-kâ-fa），乜安到客家語，簡稱客話、客語，係漢語族下背个語言，有超過5000萬人使用。客家話在毋同地區有毋同特色，有兜地區還過“艾話”、“新民話”等等毋共樣个喊法。使用客家話个該兜人群集中在中國南方省份，包括 廣東、福建、江西、廣西、四川、湖南、貴州、海南摎台灣；在海外，有80過隻國家摎地區分佈有會講客个人群，包括英國等其他歐洲國家、美國、非洲、南太平洋、印度、菲律賓、馬來西亞、印度尼西亞、澳洲等。學術上背，客家話以梅縣話做代表；在臺灣肚，四縣腔係客家話裏背過強勢个方言。

這邊 "客家語" 个頁面係漢字，有白話字連結 "Hak-kâ-ngî" 个頁面在這項點出。

客家語在中國嘅分佈^[1]

簡介

屬性

　　客家話係漢族客家人个母語 ，分布區域當廣泛，包括了中國大陸東南沿海、南部、西部（例如四川）个省份、海南、香港新界、台灣，海外客家人移民地區（如毛里求斯、印度、馬來西亞等等）。比較集中个中心文化區係廣東省東北部（即粵東、粵北），江西省南部（贛南），福建省西部（即閩西），爾兜地區統稱做閩粵贛三角地帶，也喊做客家話大本營。

另自个喊法

　　因為“客家”爾隻喊法又毋流行於一兜地區，故所客家語有毋少另自个喊法。下背列表：

喊法	分佈地區	喊法由來	附註
客家話	廣東東部、北部；福建西部、江西南部等	先有“客家人”喊法，後有“客家話”喊法	臺灣正式場合應稱爲客家語、客語
𠊎話	粵西、桂南等地區	因為第一人稱爲𠊎（ngài）而得名[2]
新民話	廣西	相對於僮族撈粵語人，客家人係新移民，故所當地人喊客家語做新民話
麻介話	廣西	因客家語特色詞“麼个”而得名[2]
懷遠話	江西銅鼓縣等地，湖南瀏陽市等部分地區	因清朝客籍人入籍懷遠都而得名[3]	一般指个係客語銅鼓片
客姓話	湖南	源於其他民系對客家語个喊法	浏陽當地客家人也自稱客姓人
粵東語	台灣	台灣日佔時期，籍貫廣東省个台灣土民分記載做“粵籍”摎“粵東人”，所用語言分安到“粵東語”	今下中國既經當少用邇種喊法
廣東話（土廣東話）	四川、重慶、陝西、湖南某兜地方撈舊時个台灣等	因“湖廣填四川”或同時期个客家人多祖籍廣東並且自稱“廣東人”，故所得名[2]	後加“土”字來區別當代世居廣東人（或廣府人）；現代台灣已少用爾種喊法
汀州話（汀州腔）	浙江麗水、雲和等	浙江等地个客家人係從古汀州遷過去个，故所有汀州話个喊法
惠州話	廣西、台灣等	從原惠州府遷到其他地區个群體，自稱惠州人，所使用語言分安到“惠州話”

特殊作用

　　因為客家人分佈忒過廣泛，故所單一个地域認同無法將客家人撈其他群體區分開來。在邇種情況下背，語言認同就顯得刮要緊吔。客語个特殊作用，就在於佢係客家民系个認同標志。

歷史

　　客家語主要源於中古漢語，有兜人認為其在南宋時期定型^[4]。

現狀

　　客家語在今下情況毋樂觀。有資料顯示，客家語分認爲係地球上衰落最快个語言之一^[5]。

中國大陸

　　在中國大陸，由於各地區文化經濟交流个增加，人撈人廣泛使用普通話，傳統客家地區也一般毋使用客家話講課，後生一代從細開始接受普通話教育。同時，由於電視媒體个普及，客家話乜好少出現阿新聞傳媒上，進一步造成客家後生對客家話个冷落。以口頭方式流傳个傳統客家童謠撈山歌等，今下既經當少人做得完整誦唱。另一方面，在珠江三角洲地區以“方言島”形式存在个客家話，同時受普通話撈相對強勢个粵語影響，部分客家人家庭生活用語轉向普通話摎粵語。

　　隨等普通話普及率超過80%，政府對方言个干涉越來越少。近年出現了毋少方言影視，如2020年陸河客家話電影《我的村我的家》，梅縣客家話電影《圍屋喜事》。浸入式客家話教育乜陸續起色，如2021年清溪中心幼兒園設立客家話日，2022年四川儀隴設立客家話特色課程。 2023年5月，官媒“學習強國”乜推出客家話播音。

香港

　　在香港地區，20世紀70年代經濟起飛以後，客家話基本上在傳媒撈公共場合肚絕跡，咹樣般，齊家就錯誤認爲香港從來無客家話^[6]。

臺灣

　　在臺灣，因客家人在清領前期一度受限於渡臺禁令，並且在人數上比毋過閩南移民，結果今日除國語外，閩南語也成為臺灣个強勢語言之一。因大眾傳播媒體个影響，即使平常毋以閩南語互相溝通个客家人，大多也做得略通閩南語。部份地區客家人集體轉用閩南語，成為福佬客；轉向使用國語个客家人又過多，特別係越至後生者。根據中華民國行政院客家委員會在2004年所做个調查，30歲以下年輕客家人有3成做得聽解客話，單淨1成做得流利使用；在家庭語言方面，30歲以下約有60%使用國語，20%使用閩南語，毋超過10%使用臺灣客家語。
　　近年來，臺灣居民意識到保護母語个重要性，臺灣客家人也毋例外。政府成立了專門个機構行政院客家委員會，制定《客家基本法》^[7]，在學校推行台灣客家語教學，同時設立了客家電視台撈客家廣播電台，舉辦客語認證，並立法規定火車、捷運等大眾運輸工具愛提供台灣客家話播音服務^[8]。

海外

　　在海外地區，例如馬來西亞，華人肚也有毋少个客家人，除開沙巴州地區，目前在西馬嘅柔佛州客家話也依然廣為流傳。毋過，隨緊經濟全球化，客家人撈其他族群交流越來越密切，客家話在海外客家社區个傳播撈傳承也出現了危機^[9]。

方言

代表

　　語言學家一般將廣東梅縣話看做客家語个典型代表^[10]。在台灣，就以四縣話為典型代表（撈梅縣話有當多相同），大眾運輸肚个客話廣播使用个大多係佢。毋過並毋存在一隻公認个標準口音，雖然梅縣話係客家語代表，毋過，民間對“梅縣話作為客家語標準音”缺乏認同，多數使用非梅縣話个客家人一般毋會講梅縣話，甚至撈講梅縣話个人交流時還有兜溝通障礙。

分片

　　客家話在《中國語言地圖冊》肚分分做八片：粵臺片、粵中片、惠州片、粵北片、汀州片、寧龍片、于桂片、銅鼓片；除開上片所講个八片，還有兜毋分片个客家語方言，如粵西、桂東南、四川等地區个客家話^[1]。

分佈

中國漢語（橙色係客家語）

　　客家話主要分佈在：

1. 中國大陸个粵東、閩西、贛南交界，廣西、湖南、粵西、贛西北（以銅鼓縣做中心）等也有好多分佈。
2. 臺灣个桃園縣、新竹縣、苖栗縣、屏東縣、高雄縣、台東縣等縣^[11]。
3. 香港个新界大埔、元朗、上水等鄉鎮^[6]。
4. 海外華人社區如：馬來西亞等東南亞國家、印度、非洲、南印度洋島國（毛里求斯等）、美洲地區等^[1]。

語音特點

• 古全濁聲母撈次清聲母合流，毋論平仄多讀成送氣清塞音、塞擦音。
• 古莊組撈精組洪音無分別，讀舌尖前音[ts ts' s]
• 古泥、來母毋混。
• 古曉、匣母逢合口字大部分讀做[f]。
• 古非、敷、奉、微母部分字讀做重唇音p p' m。
• 同攝（山、蟹、咸等攝）裡肚一二等字在不同範圍裡肚有毋同嘅讀音。
• 梗攝字白讀多數讀做[aŋ iaŋ]或者係帶a的鼻化韻。
• 山攝開口一等牙喉音字多撈合口一等齒音字混同，而韻腹多數係ɔ、o。
• 宕攝開口一等唐韻撈江攝二等江韻字多數混同，讀做[ɔŋ]或[iɔŋ]。
• 果假兩攝韻腹嘅區別普遍係 o、ɔ 撈 a、ɑ個分別。
• 侵韻莊組字“森”、“蔘”多數撈其他聲母字讀音毋同。
• 遇攝字“五”多數有[ŋ]嘅讀音。
• 次濁入聲字有兩個走向，或撈清聲母同，或撈濁聲母同。
• 保留入聲調類者，厥聲調多係短促調。
• 多數地點知組聲母毋分二三等。
• 多數地點知組三等撈章組個別字相當一致讀做[t t']。
• 精組好少分洪細，見組分洪細嘅比較多，但係尖團多數毋混。
• 微母字多數撈匣影雲以合口字混同做[v]聲母。
• 影母洪音毋撈疑母混同。
• 四等韻（如齊韻）字有讀洪音。
• 宕攝一等字開撈合口字多數混同，一般讀作[ɔŋ]。
• 曾攝開口一等字撈梗攝開口二等字（文讀）多毋分，讀作[ɛn]或ɛŋ]。
• 多數地點無撮口呼。
• 多數地點古陽聲韻 -m -n -ŋ 韻尾三分。
• 多數地點入聲韻保留 -p -t -k 韻尾三分。
• 多數地點聲調為六類，平入各分陰陽，上去雜為二調。
• 古入聲字今聲調大多數按清濁分成兩調。
• 多數地點將部分次濁去聲字讀成清聲母。
• 古全濁、次濁部分上聲字除開少數地點外都有將常用字讀做陰平調。

注音撈書寫形式

• 客家話傳統使用漢字，部分無法考本字个表達多用同音字代替；
• 中國大陸廣東省推出過客家話拼音方案，毋過單淨用在梅縣話；
• 英國長老會差會在客家話地區（當前以臺灣為主）使用白話字；
• 臺灣地區用於為客家語注音个係通用拼音，後來又改進為客家語拼音方案。

參考文獻

1. 李榮，熊正輝，張振興等．中國語言地圖集．香港：朗文出版（遠東）有限公司，1987．
2. 孟萬春．陝西商洛“廣東話”語音研究[J]．延安大學學報(社會科學版)，2008，30(05)，100-103 ．
3. 賴文峰．寧州懷遠人淵源稽考[J]． 宜春學院學報， 2005，(03)．
4. 吳松弟．客家南宋源流說[J]．復旦學報（社會科學版），1995，(05)，108-113．
5. 吳伯雄的客家情結．《南風窗》．
6. 香港和客家話．廣西師範大學出版社網站[引用日期2013-05-20]．
7. 《客家基本法》．中華民國司法院．
8. 《大眾運輸工具播音語言平等保障法》．中華民國司法院．
9. 僑民第三代不會客家話 客家文化海外傳播現危機．人民網．2010-12-02[引用日期2013-05-20]．
10. 謝永昌．古漢語的“活化石”——客家話（——兼論客家方言以梅縣話爲代表的緣由）[J]．嘉應大學學報（社會科學），1997，(5)，102-107．
11. 台灣客家人分布地區 ．中國國際廣播電台國際在線．2011-04-07[引用日期2013-05-20]．