![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/2/28/Kalabrien_Oliven_2257.jpg/640px-Kalabrien_Oliven_2257.jpg&w=640&q=50)
Árbore
tipo de vexetal perenne, de tronco leñoso, que se ramifica a certa altura do chan / From Wikipedia, the free encyclopedia
En botánica, unha árbore[1] é unha planta perenne cun talo alongado, ou tronco leñoso, que se ramifica a certa altura do chan. Nalgúns casos, a definición dunha árbore pode ser máis concisa; en definicións máis amplas, as palmeiras máis altas[n. 1], os fentos arbóreos[n. 2], as bananeiras e os bambús tamén son considerados árbores. As árbores non son un grupo taxonómico, pero inclúen unha variedade de especies vexetais que desenvolveron de forma independente un tronco e ramas como unha forma de elevarse por encima doutras plantas para competir pola luz solar. A maioría das especies arbóreas son anxiospermas ou frondosas; do resto, moitas son ximnospermas de madeiras blandas. As árbores tenden a ter unha existencia longa, algunhas chegan a ter varios miles de anos de idade. As árbores existen desde hai 370 millóns de anos. Estímase que hai uns tres billóns de árbores adultos no mundo.
![Thumb image](http://upload.wikimedia.org/wikipedia/commons/thumb/2/28/Kalabrien_Oliven_2257.jpg/640px-Kalabrien_Oliven_2257.jpg)
![Thumb image](http://upload.wikimedia.org/wikipedia/commons/thumb/b/b8/Willow.jpg/640px-Willow.jpg)
Unha árbore adoita ter moitas ramas secundarias que se apoian no tronco sen tocar o chan, estas a vez adoitan dividirse en ramas máis pequenas e brotes que adoitan ter follas, que captan a enerxía luminosa e a converten en azucres mediante a fotosíntese, proporcionando o alimento para o crecemento e desenvolvemento da árbore. Este tronco adoita conter tecido leñoso para a resistencia, e tecido vascular que se encarga de transportar líquidos (saiba bruta e elaborada) polo interior da planta. A maioría das árbores están rodeados por unha capa de casca que lles serve de barreira protectora. Por debaixo do chan atópanse as raíces que se ramifican e se estenden amplamente e serven para ancorar a árbore a terra e extraer humidade e nutrientes do solo.
As árbores adoitan reproducirse mediante sementes. Poden ser flores ou froitos, pero algunhas árbores, como as coníferas, teñen en cambio conos de pole e conos de sementes. As palmeiras, as bananeiras e os bambús tamén producen sementes, pero os fentos arborescentes producen esporas.
As árbores xogan un papel importante na redución da erosión e na moderación do clima. Eliminan o dióxido de carbono da atmosfera e almacenan grandes cantidades de carbono nos seus tecidos. As árbores e os bosques proporcionan un hábitat para moitas especies de animais e plantas. As selvas tropicais están entre os hábitats máis biodiverso do mundo. As árbores proporcionan sombra e refuxio, madeira para a construción, combustible para cociñar e quentar, e froita para a alimentación, ademais de ter moitos outros usos.
Nalgunhas partes do mundo, os bosques están a reducirse a medida que se eliminan árbores para aumentar a cantidade de terra dispoñible para a agricultura. Debido á súa lonxevidade e utilidade, as árbores sempre foron venerados, como bosques sagrados en varias culturas, e desempeñan un papel en moitas das mitoloxías do mundo.
Certas especies de árbores poden superar os 100 metros de altura, e chegar a vivir durante miles de anos. As grandes árbores, coma as sequoias xigantes de California, poden pesar máis de 6.000 toneladas, o que as converte no ente vivo máis pesado que existiu sobre o planeta [Cómpre referencia].
As árbores son compoñentes importantes do medio natural así como útiles para os seres humanos como fornecedores de material de construción, transporte e mobiliario; alimento e recursos medicinais; leña para calefacción etc. Son árbores, por exemplo, a cerdeira, a maceira, o castiñeiro, a aciñeira, o piñeiro, a magnolia etc. Tamén xogan un importante papel na cultura, considérense as árbores de Nadal, a árbore da sabedoría, a árbore xaponesa do amor (o xinkgo) etc. A árbore por excelencia en Galicia é o carballo, o mesmo que no País Vasco, Gran Bretaña ou Alemaña.