Victoria Club de Fútbol

O Victoria Club de Fútbol é un club de fútbol galego, fundado na Coruña en 1943. Compite no Grupo Norte (subgrupo B) da Preferente Galicia.

Victoria CF
Nome	Victoria Club de Fútbol
Alcume(s)	As cebras
Fundación	Febreiro de 1943
Estadio	San Pedro de Visma
Presidente	Juan Vázquez
Adestrador	Guillermo Pigueiras
Liga	Preferente Galicia
2020/21	3º
Patrocinador	Domino's Pizza
Na rede
https://victoriacf.com/

Victoria CF 2022-23.

Xoga cun equipamento de raias brancas e negras, motivo polo que os seus xogadores son alcumados "as cebras". O club é coñecido pola súa canteira, a maior de Galicia con preto de 30 equipos,^[1] da que teñen saído futbolistas como Amancio Amaro, Manín, Jaime Blanco, Moncho Parada, Lucas Pérez, Raúl Carnero ou Juan Carlos Real.^[2] Conta tamén con conxuntos femininos, militando o primeiro equipo na Primeira Nacional, terceira categoría do fútbol feminino en España.

Historia

Foi fundado en febreiro de 1943 no barrio coruñés de Santa Lucía, sendo Luis Ríos o seu primeiro presidente.^[2] Realizou a súa presentación o 2 de abril de 1944, dirixido por Hilario Marrero, nun partido amigable contra o Centro Deportivo de Santa Lucía, gañando por 2-0.^[3] En 1955 o club trasladou a súa sede á Falperra.^[4] Ríos presidiu a entidade durante 35 anos, o que o converteu no seu momento no presidente dun club de fútbol de España con máis tempo no cargo. En 1978 subsituíuno o ex xogador do club, José María Panizo.^[5]

Amancio Amaro, xogador do club na década de 1950.

Militou durante case medio século na liga de modestos da Coruña, alternando entre a primeira e a segunda división. Na tempada 1970/71 o capitán do equipo, Kubala, levantou por primeira e única vez na historia do club o trofeo da Primeira División, despois de perder pola mínima no partido decisivo contra o Español nun ateigado campo da Granxa, resultado que lle bastaba para gañar o título por diferenza de goles.^[6] O Victoria formou naquel encontro con Goloso, Juan, Quique, Tito, Suso (Cameselle I), Cameselle II, Lete, Pacuchín, Carreras, Kubala e Toñito. Adestraba o equipo Juan Miguel Solé, trala marcha de Luis Precedo, mentres que o dianteiro Enrique Carreras foi o máximo goleador do campionato.^[7] Dous meses despois o equipo proclamouse tamén campión galego de modestos, ao derrotar na final do Torneo de Campións ao Xuventude de Cambados por 2-0.^[8]

Na tempada 1992/93 pasou a competir na Terceira Autonómica de Galicia, na que militou tres tempadas antes de lograr o ascenso a Segunda. Despois de 13 tempadas nesa categoría, na 2008/09 ascendeu a Primeira Autonómica, e 11 anos despois conseguiu un novo ascenso, á Preferente Galicia, con Diego Armando García no banco.^[9] No seu debut na categoría, o equipo rematou terceiro do seu subgrupo, a só dous puntos dos postos de promoción de ascenso que ocuparon Sofán e Montañeros.

Ese terceiro posto na liga deulle acceso á fase de clasificación para a Copa do Rei 2021/22. Disputou primeiro unha previa territorial con equipos galegos dos outros subgrupos da Preferente, quedando encadrado nun grupo co Dubra e o Santaballés. Empatou co Dubra 2-2 e goleou 4-0 ao Santaballés, facéndose así co primeiro posto do grupo e pasando á eliminatoria final contra o Xuventude de Cambados. No partido, disputado no Estadio García Hermanos de Betanzos, comezou gañando o equipo cambadense, pero Edu puxo o empate e finalmente o Victoria logrou vencer na quenda de penaltis.^[10] Deste xeito accedeu á fase previa interterritorial, na que quedou emparellado co Hernani en busca dun posto na fase final da Copa do Rei. O histórico encontro, disputado o 17 de novembro de 2021 no Campo Rodrigo García Vizoso, rematou con vitoria coruñesa despois de que Iago Pérez marcase o único gol do partido e de que o gardameta Jano detivese un penalti nos minutos finais.^[11]

O sorteo deparou un enfrontamento contra o Villarreal, vixente campión da Europa League e participante na Liga de Campións. O partido disputouse no estadio de Riazor, fronte a uns 5.000 espectadores, e o Villarreal saltou ao terreo de xogo con varios xogadores internacionais ou que o foran no pasado, como Mario Gaspar, Paco Alcácer, Mandi, Estupiñán, Chukwueze, Alberto Moreno ou Gerard Moreno. O Victoria aguantou durante un cuarto de hora os ataques amarelos grazas ás paradas de Jano, pero acabou por recibir oito goles.^[12][13]

Datos do club

Historial na liga

Tempada Categoría Posto 1944/45 2ª Modestos 12º 1945/46 2ª Modestos 8º 1946/47 2ª Modestos 3º 1947/48 2ª Modestos 2º 1948/49 1ª Modestos 3º 1949/50 1ª Modestos 4º 1950/51 1ª Modestos 8º 1951/52 1ª Modestos 5º 1952/53 1ª Modestos 10º 1953/54 2ª Modestos 2º 1954/55 1ª Modestos 9º 1955/56 2ª Modestos 8º 1956/57 2ª Modestos 11º 1957/58 2ª Modestos 1º 1958/59 1ª Modestos 10º 1959/60 2ª Modestos 5º 1960/61 2ª Modestos 4º 1961/62 2ª Modestos 4º 1962/63 2ª Modestos 7º 1963/64 2ª Modestos 4º 1964/65 2ª Modestos 6º

Tempada Categoría Posto 1965/66 2ª Modestos 6º 1966/67 2ª Modestos 1º 1967/68 1ª Modestos 10º 1968/69 2ª Modestos 1º 1969/70 1ª Modestos 8º 1970/71 1ª Modestos 1º 1971/72 1ª Modestos 3º 1972/73 1ª Modestos 4º 1973/74 1ª Modestos 7º 1974/75 1ª Modestos 8º 1975/76 1ª Modestos 5º 1976/77 1ª Modestos 11º 1977/78 2ª Modestos 1º 1978/79 1ª Modestos ? 1979/80 1ª Modestos ? 1980/81 1ª Modestos 10º 1981/82 1ª Modestos ? 1982/83 1ª Modestos ? 1983/84 1ª Modestos 12º 1984/85 1ª Modestos 11º 1985/86 1ª Modestos ?

Tempada Categoría Posto 1986/87 2ª Modestos 3º 1987/88 1ª Modestos ? 1988/89 1ª Modestos 9º 1989/90 1ª Modestos ? 1990/91 2ª Modestos 4 1991/92 1ª Modestos ? 1992/93 1ª Modestos ? 1993/94 3ª Galicia 8º 1994/95 3ª Galicia 3º 1995/96 3ª Galicia 1º 1996/97 2ª Galicia 6º 1997/98 2ª Galicia 5º 1998/99 2ª Galicia 11º 1999/00 2ª Galicia 9º 2000/01 2ª Galicia 6º 2001/02 2ª Galicia 7º 2002/03 2ª Galicia 2º 2003/04 2ª Galicia 2º 2004/05 2ª Galicia 7º 2005/06 2ª Galicia 2º 2006/07 2ª Galicia 2º

Tempada Categoría Posto 2007/08 2ª Galicia 4º 2008/09 2ª Galicia 2º 2009/10 1ª Galicia 7º 2010/11 1ª Galicia 9º 2011/12 1ª Galicia 15º 2012/13 1ª Galicia 7º 2013/14 1ª Galicia 2º 2014/15 1ª Galicia 3º 2015/16 1ª Galicia 7º 2016/17 1ª Galicia 5º 2017/18 1ª Galicia 3º 2018/19 1ª Galicia 2º 2019/20 1ª Galicia 6º 2020/21 Preferente 3º 2021/22 Preferente

Notas

1. Carballo, Pablo (16 de outubro de 2019). "Los 42.553 niños futbolistas de Galicia". La Voz de Galicia (en castelán). Consultado o 16 de novembro de 2021.
2. "Historia do Victoria CF". victoriacf.com (en castelán). Consultado o 14 de novembro de 2021.^{[Ligazón morta]}
3. "El primer triunfo del Victoria C. F.". La Voz de Galicia (en castelán). 4 de abril de 1944. p. 6.
4. "Nuevo local del Victoria C. F.". La Noche (en castelán). 4 de outubro de 1955. p. 4. Consultado o 14 de novembro de 2021.
5. "Victoria C. F., un local social". La Voz de Galicia (en castelán). 20 de outubro de 1979. p. 46.
6. "El Victoria, nuevo campeón de Primera División". La Voz de Galicia (en castelán). 11 de xullo de 1971. p. 17.
7. "El Banco de Bilbao premia a los Modestos". La Voz de Galicia (en castelán). 15 de xullo de 1971. p. 24.
8. "El Victoria, campeón gallego, al vencer al J. Cambados por 2-0". La Voz de Galicia (en castelán). 2 de setembro de 1971.
9. Rodríguez, Melissa (28 de agosto de 1921). "Diego Armando García: «A mi padre se le ocurrió llamarme como Maradona»". La Voz de Galicia (en castelán). Consultado o 16 de novembro de 2021.
10. "Hito del fútbol modesto de A Coruña: El Victoria jugará la Copa del Rey" (en castelán). 28 de xuño de 2021. Consultado o 16 de novembro de 2021.
11. Losada, Víctor (17 de novembro de 2021). "El Victoria CF hace historia y se clasifica para la Copa del Rey" (en castelán). Consultado o 18 de novembro de 2021.
12. "O Victoria CF fai historia, o RC Celta fai os deberes e o Racing cae na prórroga". Real Federación Galega de Fútbol. 30 de novembro de 2021. Consultado o 1 de decembro de 2021.
13. "El Villarreal no dio tregua en la histórica noche del Victoria" (en castelán). 30 de novembro de 2021. Consultado o 1 de decembro de 2021.

Véxase tamén

Ligazóns externas

• Sitio web oficial^{[Ligazón morta]}