Kabir

Kabir ou Kabīr^[1] foi un poeta místico e santo indio do século XV, cuxos escritos, segundo algúns estudosos, influenciaron o movemento bhakti do hinduísmo. Os versos de Kabir atópanse na obra Guru Granth Sahib do sikhismo.^[2][3][4]

Kabir

Biografía
Nacemento	1398 Varanasi, India (pt)
Morte	1518 (Gregoriano) (119/120 anos) Maghar, India (en)
Lugar de sepultura	Maghar (en)
Relixión	Hinduísmo
Actividade
Ocupación	tecelán, filósofo, poeta, escritor
Movemento	Bhakti (pt) e Sant Mat (en)
Enaltecemento
santo
Descrito pola fonte	Obálky knih, Pequeno Dicionario Enciclopédico de Brockhaus e Efron Dicionario Enciclopédico Brockhaus e Efron

O nacemento de Kabir permanece arrodeado de misterio e lenda. Dise que foi descendido dende Satlok (Ceo) e colocado sobre unha flor dun lago, onde unha parella non casada decidiu levalo a casa. Kabir non naceu de mulller, senón que descendeu do ceo en forma de bebé. Hai pouca dúbida de que a súa vida comezase como musulmá, pero máis tarde foi influído fortemente polo asceta hindú Ramananda.^[5]

Kabir é coñecido por ser crítico tanto co hinduísmo como co islam, afirmando que o primeiro foi guiado mal polos vedas, e cuestionando os seus ritos de iniciación como o upanayana ou a circuncisión, respectivamente.^[2][6] Durante a súa vida foi ameazado por hindús e musulmáns polas súas ideas.^[7]:4 Cando faleceu, os hindús e os musulmáns que inspirara reclamárono como un dos seus.^[3]

O seu legado sobrevive e continúa a través do Kabir panth ("camiño de Kabir"), comunidade relixiosa que o recoñece como o seu fundador e é unha das seitas de Sant Mat. Os seus membros coñécense como Kabir panthis.^[8]

Traxectoria

Fiador, tecedor e artesán da India, foi criado por unha parella musulmá sen fillos que o atoparon preto do lago Lahara Tara nas inmediacións de Benarés onde viviu o resto da súa vida. A orixe do seu nacemento está rodeado por unha aura de lenda. Outra versión di que foi o fillo abandonado dunha viúva Brahmin que foi adoptado pola parella musulmá.

A tradición di que casou con Loi e tivo dous fillos, Kamal e Kamali. Disque o emperador Sikandar Lodi, enfurecido porque Kabir non o reverenciaba, o aprisionou e torturou mais que finalmente o liberou pola súa sagacidade e intelixencia.

Segundo algúns, foi iniciado polo asceta do vishnuísmo Ramananda Swami e, aínda que era analfabeto, os seus poemas transmitíronse oralmente. Máis de 500 dos seus versos permanecen no Guru Granth Sahib.

Empregou un método socrático, dirixíndose a todos os seres humanos sen distinción de casta, sexo, raza, relixión ou ocupación enfrontándose cos gobernadores invasores mogois, sabios e sacerdotes hindús do seu tempo.

Predicou a unidade esencial de todas as relixións e foi crítico co hinduísmo e o islam, sobre os seus ritos sen sentido e repetición descoidada de mantras, como di no poema:

“

Non estou no templo nin na mesquita, nin no santuario da Meca, nin na morada das divindades hinduístas. Non estou nos ritos e as cerimonias; nin no ascetismo e as súas renuncias. Se me buscas de verdade verasme decontado; e chegará o momento en que me atopes.[9]

”

Do hinduísmo aceptou as ideas de reencarnación e a lei do karma, mais rexeitou a idolatría, o ascetismo e o sistema de castas. Do islam acolleu o concepto dun único deus e da igualdade de todos os varóns.

Os seus poemas altamente metafóricos aplícanse a unha filosofía universal. Insistiu na simplicidade e franqueza cara á aproximación ao divino; para el, Deus era a manifestación de todo o espiritual e o material e o achegamento cara a Deus o deber e o pracer de todo ser vivo:

“

O Señor está en min, o Señor está en ti, como a vida está en cada semente. Renuncia a un falso orgullo e procura en ti o teu Señor. Un millón de soles irradia a súa luz.[10]

”

Cóntase nunha lenda que aínda se ensina nas escolas indias, que cando morreu, estoupou unha disputa entre musulmáns e hindús que se enfrontaban polo seu cadáver. Cando abriron o cadaleito, estaba baleiro e no seu lugar atoparon un libro en que os dous bandos escribiron todas as máximas que puideron lembrar.

Notas

1. Strnad, Jaroslav (2013). Morphology and Syntax of Old Hindī: Edition and Analysis of One Hundred Kabīr vānī Poems from Rājasthān. BRILL Academic. p. 10. ISBN 978-90-04-25489-3.
2. Kabir Encyclopædia Britannica (2015). Consultado o 27 de xullo de 2015
3. Tinker, Hugh (1990). South Asia: A Short History. University of Hawaii Press. pp. 75–77. ISBN 978-0-8248-1287-4. Consultado o 12 de xullo de 2012.
4. Ronald McGregor (1984), Hindi literature from its beginnings to the nineteenth century, Otto Harrassowitz Verlag, ISBN 978-3447024136, páxina 47
5. Encyclopedia Brittanica, The Editors of (1 de xaneiro de 2019). "Kabir". Encyclopedia Brittanica. Consultado o 20 de xaneiro de 2019.
6. Carol Henderson Garcia; Carol E. Henderson (2002). Culture and Customs of India. Greenwood Publishing Group. pp. 70–71. ISBN 978-0-313-30513-9. Consultado o 12 de xullo de 2012.
7. Hess, Linda; Singh, Shukdev (2002). The Bijak of Kabir. Oxford University Press. ISBN 978-8120802162.
8. David Lorenzen (Editors: Karine Schomer and W. H. McLeod, 1987), The Sants: Studies in a Devotional Tradition of India, Motilal Banarsidass Publishers, ISBN 978-81-208-0277-3, páxinas 281–302
9. "Saint Kabir". Consultado o 2009.
10. "Saint Kabir". Consultado o 2009.

Véxase tamén

A Galipedia ten un portal sobre: India

Bibliografía

• Bly, Robert (2007, orixinal: 1977), tr. Kabir: Ecstatic Poems. Beacon Press, ISBN 978-0807063804
• Charlotte Vaudeville (1957), Kabîr Granthâvalî : (Doha), OCLC 459472759 (en francés)
• Charlotte Vaudeville (1993), A Weaver Named Kabir: Selected Verses with a Biographical and Historical Introduction, Oxford University Press, ISBN 978-0195630787
• Vinay Dharwadker (2003), Kabir: Weaver's Songs, Penguin Classics, ISBN 978-0143029687
• David N. Lorenzen (1991), Kabir Legends and Ananta-Das's Kabir Parachai, State University of New York Press, ISBN 978-0791404614
• Dass, Nirmal, tr. Songs of Kabir from the Adi Granth. SUNY Press, 1991. (ISBN 0-7914-0560-5)
• Das, G. N., ed. (1992). Love songs of Kabir. Foreword by K.S. Duggal. Sittingbourne: Asia. ISBN 978-0-948724-33-6.
• Kabir. Compilation of Kabir's dohas in Devanagari. Kabir ke dohey
• Sastri, Hari Prasad (2002). "Kalidasa". The great authors and poets of India. Nova Deli: Crest Publishing House. ISBN 978-8-124-20241-8.
• Tagore, Rabindranath. Songs of Kabir, Macmillan, Nova York, 1915.

Ligazóns externas

• Kabir project Arquivado 04 de abril de 2019 en Wayback Machine.
• Cancións de Kabir
• Poemas de Kabir (en castelán)
• Poema de Kabir en forma de canto Bhajan