Glucano

Os glucanos son un tipo de polisacáridos formados especificamente por unidades monómeras do monosacárido D-glicosa,^[1] que están unidos por medio de enlaces glicosídicos. Entre eles están polisacáridos tan importantes como o glicóxeno, o amidón e a celulosa, que exercen funcións de almacenamento enerxético ou estruturais na célula.

Non confundir con Glicano.

Moitos beta-glucanos son medicamente importantes, xa que son dianas para fármacos antifúnxicos da clase da equinocandina.

Glucanos e glicanos

Aínda que, tal como recomenda a Academia^[2], para o nome dos glícidos en galego se utiliza normalmente a raíz glic (do grego glykys, doce), se ben tamén está aceptada a raíz gluc, neste caso cómpre distinguir entre parellas como glucano e glicano, que se refiren a tipos de moléculas distintos, o que se fixo aquí seguindo os usos internacionais (por exemplo, inglés glucan = galego glucano, e inglés glycan = galego glicano).

Cómpre non confundilos, xa que os glicanos son polímeros de monosacáridos formados por calquera tipo de monosacáridos unidos por enlace glicosídico, polo que o termo é sinónimo de polisacárido.^[3] Glucano é un termo máis restritivo, xa que son un tipo de glicano, concretamente son glicanos que están formados especificamente por glicosa. Por tanto, os glucanos están incluídos dentro dos glicanos.

Tipos

Poden dividirse en glucanos α e β, segundo a xeometría do seu enlace glicosídico.

Alfa

Artigo principal: Alfa-glucano.

• dextrano, α-1,6-glucano con ramificación α-1,3
• glicóxeno, α-1,4- e α-1,6-glucano
• pululano, α-1,4- e α-1,6-glucano
• amidón, α-1,4- e α-1,6-glucano

Beta

Artigo principal: Beta-glucano.

• celulosa, β-1,4-glucano
• crisolaminarina, β-1,3-glucano
• curdlana, β-1,3-glucano
• laminarina, β-1,3- e β-1,6-glucano
• lentinana, un β-1,6:β-1,3-glucano estritamente purificado procedente do fungo Lentinula edodes
• liquenina, β-1,3- e β-1,4-glucano
• pleurana, β-1,3- e β-1,6-glucano illado do fungo Pleurotus ostreatus
• cimosano (ou zimosano), β-1,3-glucano

Notas

1. Glucans Medical Subject Headings (MeSH) na Biblioteca Nacional de Medicina dos EUA.
2. Definicións no Dicionario da Real Academia Galega e no Portal das Palabras para gluco-.
3. IUPAC Gold book Glycans