Distrito de Évora

Évora é un distrito portugués pertencente á provincia tradicional do Alto Alentexo. Limita ao norte co Distrito de Santarém e o Distrito de Portalegre, ao leste con España, ao sur co Distrito de Beja e ao oeste co Distrito de Setúbal. Abrangue unha área de 7393 km², o cal o converte no segundo maior distrito portugués, só superado polo de Beja. Conta cunha poboación residente de 170.535 habitantes (2006), e a súa capital é a cidade de Évora.

Distrito de Évora

Localización
38°34′11″N 7°54′35″O
Estado	Portugal
Capital	Évora
Contén a división administrativa	Évora (pt)
Poboación
Poboación	52.454 (2018)
Xeografía
Parte de	Alentexo
Comparte fronteira con	Distrito de Santarém Distrito de Beja Setúbal Distrito de Portalegre Provincia de Badaxoz
Identificador descritivo
Fuso horario	UTC±00:00
ISO 3166-2	PT-07
Páxina web	gov-civil-evora.gov.pt

Subdivisións

O distrito de Évora subdivídese nos seguintes 14 concellos:

• Alandroal
• Arraiolos
• Borba
• Estremoz
• Évora
• Montemor-o-Novo
• Mora
• Mourão
• Portel
• Redondo
• Reguengos de Monsaraz
• Vendas Novas
• Viana do Alentejo
• Vila Viçosa

Na división de Portugal en NUTS II, o distrito intégrase na rexión Alentexo e corresponde case integramente á subrexión do Alentexo Central, que se completa cun concello do Distrito de Portalegre: Sousel. Mora, en contrapartida, intégrase na subrexión do Alto Alentexo. En resumo:

• Rexión Alentexo
  • Alentexo Central
    • Alandroal
    • Arraiolos
    • Borba
    • Estremoz
    • Évora
    • Montemor-o-Novo
    • Mourão
    • Portel
    • Redondo
    • Reguengos de Monsaraz
    • Vendas Novas
    • Viana do Alentejo
    • Vila Viçosa
  • Alto Alentexo
    • Mora

Xeografía física

A xeografía física do distrito de Évora é bastante uniforme, dominada case por completo por unha paisaxe de chaira, con altitudes que na maior parte do territorio oscilan entre os 200 e os 400 m, interrompida por vales e serras con vertentes pouco inclinadas e sementada de encoros relativamente extensos.

A única excepción é o val do río Guadiana, que atravesa o extremo sueste do distrito e que por veces é bastante profundo. Destaca a rexión de Alqueva, onde o val chega ter máis de 100 m de profundidade relativa cos terreos circundantes. Por ese motivo, escolleuse esa localización para a construción do encoro de Alqueva, que de estar completamente cheo orixina o maior lago artificial de Europa.

O Guadiana é o centro dunha das tres concas hidrográficas nas que se divide o distrito, sendo a súa a que máis territorio ocupa no distrito. Os seus afluentes son unha serie de regatos que, en xeral, corren de noroeste a sueste e desaugan na marxe dereita do río (Degebe, Álamo, Azebel, Lucefece), aínda que a marxe esquerda tamén recibe o regato de Alcarache, que ven de España e flúe de nordeste a suroeste. O terzo occidental do distrito divídese entre as concas hidrográficas do Sado, ao sur, e do Texo, ao norte. Cara ao Sado flúen ríos e regatos cun curso xeralmente de nordeste a suroeste ou de leste a oeste (río Xarama e regato de Odivelas, Alcáçovas, São Cristóvão, São Martinho, Marateca etc.); cara ao Tejo corren regatos que no distrito teñen un curso xeralmente de sueste a noroeste (regatos de Canha, Lavre, Vide, Divor, Raia etc.).

A maior parte destes pequenos cursos de auga nacen nunha das serras de pequena altitude que interrompen a chaira: a serra de Monfurado ao oeste (424 m de altitude máxima), a serra de Mendro ao sur (412 m) e a serra de Ossa ao norte (653 m).

O distrito ten bastantes encoros. Alén do mencionado encoro de Alqueva no Guadiana, está o encoro de Monte Novo no regato de Degebe, a albufeira de Torres no regato de Azambuja, o encoro da Vigia nun afluente do regato de Pardiela, o encoro de Lucefece no regato homónimo, o encoro do Alvito (aínda que a presa estea no distrito de Beja) no regato de Odivelas, o encoro de Nossa Senhora da Tourega no regato das Alcáçovas e o encoro do Divor no regato homónimo. Hai aínda varios encoros máis pequenos.

Varios monumentos e lugares importantes, especialmente o Templo Romano, a Sé, a Biblioteca Pública, numerosas igrexas, o Palácio de D. Manuel, a Praça do Giraldo, entre outros.

Patrimonio

• Cidade de Évora, que é Patrimonio da Humanidade, co seu Templo Romano e a súa Sé entre outros monumentos.
• Castelo e Pazo Ducal de Vila Viçosa
• Vila e castelos de Estremoz
• Castelo de Montemor-o-Novo
• Fortificacións da Vila de Monsaraz
• Castelo de Arraiolos

Véxase tamén

Ligazóns externas

• Goberno Civil do Distrito de Évora (en portugués)
• Fotografías de Évora (distrito) (en portugués)