Cetíidos

A dos cetíidos (Cettiidae) é unha familia de aves paseriformes da suborde dos páseros, infraorde dos paséridos e superfamilia dos silvioideos.

Cetíidos Cettiidae
Lámina de 1905 do Reiseñor da auga (Cettia cetti)
Clasificación científica
Reino: Animalia Filo: Chordata Subfilo: Vertebrata Clase: Aves Orde: Passeriformes Suborde: Passeri Infraorde: Passerida Superfamilia: Sylvioidea Familia: Cettiidae Alström et al., 2006
Distribución dos certíidos Distribución dos certíidos
Xéneros
Véxase o texto

Abroscopus albogularis.

Trátase dunha familia recentemente descrita, na que a maioría dos seus membros se clasificaban anteriormente na familia dos sílvidos.^[1][2]

Características

• Os cetíidos son especies de paxaros pequenos e repoludos de coloracións en tons apardadadas, que adoitan teren as colas máis pequenas que os moi similares locustélidos.
• Adoitan habitaren en matogueiras e sotobosques.
• Os seus membros encóntranse principalmente en Asia e África, chegando tamén ao sur de Europa e a Oceanía.
• A maioría das especies da familia son sedentarias, pero Urosphena squameiceps é migratoria, e o reiseñor da auga (Cettia cetti) e Horornis diphone son migratorios nalgunhas zonas da súa área de distribución. Algunhas especies, como Urosphena pallidipes, realizan migracións altitudinais.

A dos cetíidos é unha liñaxe antiga dentro da superfamilia dos silvioideos. O grupo máis próximo aos cetíidos é o dos exitálidos (a familia á que pertence o ferrreiriño rabilongo).^[1]

Taxonomía

Descrición

A familia foi descrita en 2006 polo zoólogo, profesor e sistemático evolutivosueco Per Alström e os seus colaboradores, no traballo "Phylogeny and classification of the avian superfamily Sylvioidea". Mol. Phylogenet. Evol. 38 (2): 381–397.

Etimoloxía

O nome científico Cettiideae está formado sobre a base da raíz do nome do seu xénero tipo, Cettia, coa adición da desinencia do latín científico ´-ideae, tirada da foma do grego antigo -ειδής, -eidḗs, da raíz de εἶδος, eĩdos "forma", "aspecto", "aparencia", usada para a formación do nome das familias de animais.

Clasificación

Recoñécense os 7 xéneros seguintes, con 32 especies:^[2][3]

• Abroscopus E. C. S. Baker, 1930 (3 especies);
• Cettia Bonaparte, 1834 (4 especies);
• Horornis Hodgson, 1845 (13 especies);
• Phyllergates Sharpe, 1883 (2 especies);
• Tesia Hodgson, 1837 (4 especies);
• Tickellia Blyth, 1861 (1 especie);
• Urosphena Swinhoe, 1877 (5 especies);

Hai outros xéneros incertae sedis que algúns autores clasifican aquí:^[3]

• Graueria Hartert, 1908.
• Hylia Cassin, 1859.^[4]
• Pholidornis Hartlaub, 1857 (anteriormente en Remizidae).^[4]