Prefecturas de Grecia

As prefecturas, tamén denominadas nomos (en grego νομός, nomós; pl. νομοί, nomoí), foron a principal división administrativa de Grecia entre 1833 e 1836, e de novo entre 1845 e 2010, cando foron abolidas polo plan Calícrates e substituídas polas unidades periféricas.

Para outras páxinas con títulos homónimos véxase: Nomo.

Son denominadas departamentos segundo a norma ISO 3166-2:GR e o Grupo de expertos en nomes xeográficos das Nacións Unidas.^[1]

As prefecturas eran a división administrativa de segundo grao do goberno local e estaban agrupadas en 13 periferias ou (antes de 1987) 10 departamentos xeográficos, e á súa vez divididas en provincias, municipios e comunidades.

Convertéronse en entes autónomos en 1994, cando tiveron lugar as primeiras eleccións prefecturais. Anteriormente, os prefectos eran nomeados polo Goberno. En 2010 o seu número era de 51 e, ao comprender a prefectura de Atenas máis dun terzo da poboación do país, subdividiuse en catro "divisións prefecturais" (en grego νομαρχία nomarquía, pl. νομαρχίες nomarquíes). Ademais, creáronse tres "superprefecturas" (en grego υπερνομαρχία, hipernomarquía; pl. υπερνομαρχίες hipernomarquíes) que controlaban dúas ou máis prefecturas.

Coa entrada en vigor do plan Calícrates o 1 de xaneiro de 2011, as prefecturas abolíronse. Moitas, especialmente as do continente, mantiveron a mesma extensión ao seren convertidas en unidades periféricas (en grego περιφερειακή ενότητα, perifereiaké enóteta; pl. περιφερειακές ενότητες perifereiakés enótetes), e mantivéronse dentro das mesmas periferias, ás que se traspasaron boa parte dos poderes das antigas prefecturas.^[2]

Prefecturas existentes no momento da súa abolición

Prefecturas de Grecia até 2010.

Prefecturas da periferia de Ática.

Ática Eubea Euritania Fócida Ftiótide Beocia Calcídica Emacia Kilkís Pella Piería Serrai Tesalónica Canea Heraclión Lasithi Rétino Dráma Evros Kavala Ródope Xánthi Arta Ioánina Préveza Tesprótida

Corfú Cefalonia Léucade Zante Quíos Lesbos Samos Arcadia Argólida Corintia Laconia Mesenia Cícladas Dodecaneso Karditsa Lárisa Magnesia Tríkala Acaia Etolia-Acarnania Élide Flórina Grevená Kastoriá Kozani a. Monte Athos

A periferia de Ática comprendía as seguintes prefecturas:

1. Atenas
2. Ática Oriental
3. Pireo
4. Ática Occidental

Notas

1. "Administrative Division of Greece" (PDF). Working Paper N° 95. Nova York: United Nations Group of Experts on Geographical Names. 2000.
2. "Texto completo del plan Calícrates" (PDF). Diario Oficial de Grecia (en grego). 11 de agosto de 2010. Arquivado dende o orixinal (PDF) o 12 de xuño de 2018. Consultado o 14 de febreiro de 2012.

Véxase tamén

Outros artigos

• Organización territorial de Grecia
• Periferias de Grecia
• Rexións de Grecia
• Unidades periféricas de Grecia