![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/6/6a/D-Gluconic_acid.png/640px-D-Gluconic_acid.png&w=640&q=50)
Ácido aldónico
From Wikipedia, the free encyclopedia
Un ácido aldónico é un azucre ácido orixinado pola oxidación do grupo aldehido dunha aldosa, que se transforma nun grupo carboxilo (COOH) [1]. A súa fórmula química xeral é HOOC-(CHOH)n-CH2OH.
![Thumb image](http://upload.wikimedia.org/wikipedia/commons/thumb/6/6a/D-Gluconic_acid.png/640px-D-Gluconic_acid.png)
Os ácidos aldónicos adoitan prepararse por oxidación do azucre con bromo. Xeralmente encóntranse en forma de lactona, manténdose o anel esencialmente coa mesma estrutura cíclica do grupo hemiacetal que presentaba no azucre orixinal.
Pero, a diferenza do que ocorre nos grupos hemiacetais, as lactonas non teñen un carbono quiral anomérico, e non poden formar enlaces glicosídicos. Os ácidos aldónicos están presentes en moitos sistemas biolóxicos, e son produto da oxidación de aldosas polos reactivos de Benedict e Fehling. As súas lactonas son intermediatos chave na síntese de Kiliani-Fischer de azucres.
A nomenclatura dos ácidos aldónicos e as súas lactonas está baseada en substituír o sufixo “-oso” por “ácido -ónico” ou “-onolactona”, respectivamente. Por tanto, a D-glicosa pode ser oxidada a ácido D-glicónico ou a D-gliconolactona. [2][3]
Son exemplos de ácidos aldónicos os seguintes:
- Ácido glicérico (3C)
- Ácido xilónico (5C)
- Ácido glicónico (6C)
- Ácido ascórbico (6C, lactona insaturada)