Militêre rang

In militêre rang tsjinnet yn in militêre organisaasje ta oantsjutting fan it nivo dat in persoan beset yn it ramt fan 'e hierargyske opbou fan sa'n organisaasje. Dêrmei definiëarret sa'n rang de ûnderlinge relaasje fan leden fan deselde militêre organisaasje. It systeem fan rangen wurdt de kommandostruktuer neamd. By sokke organisaasjes giet it almeast om 'e kriichsmacht, mar ek de plysje en feilichheidstsjinsten hawwe sa'n selde stelsel fan rangen. Yn 'e regel drage de leden fan sokke organisaasjes unifoarmen dêr't harren rang op oanjûn wurdt mei beskate emblemen dy't foar dat doel ûntwurpen binne, en meastal tafoege wurde oan 'e epauletten, de mouwen en/of de kraach.

Skiednis

Stelsels fan militêre rangen besteane al tûzenen jierren, mei't legers der eins net sûnder kinne. Yn 'e Westerske beskaving giet soks teminsten werom oant 500 f.Kr., doe't de âlde Griken al rangen hiene. It wurd 'rang' komt fan it Perzyske wurd رنگ, rang, dat "kleur" betsjut, mei't yn it leger fan it Sassanidyske Ryk de ferskillende rangen ferskillende kleuren unifoarmen droegen. Neigeraden dat militêre operaasjes almar grutskaliger en yngewikkelder waarden, kamen der ek hieltyd mear ûnderskate militêre rangen yn gebrûk.

Hoewol't de hjoeddeiske kriichsmachten faak systemen fan militêre rangen hantearje dy't justjes faninoar ferskille (wat soms ek te meitsjen hat mei in ûnderskie yn taal, kultuer of politike oriïntaasje), is it gebrûk fan militêre rangen no frijwol universeel. Yn 'e tweintichste iuw besochten guon kommunistyske steaten út politike omtinkens de rangen ôf te skaffen (bgl. it Reade Leger fan 'e Sovjet-Uny fan 1918-1935, it Sineeske Folksbefrijingsleger fan 1965-1988 en it Albaneeske leger fan 1966-1991), mar dy wiene twongen om se wer yn te fieren nei't se oanrûn wiene tsjin operasjonele swierrichheden.

Skematysk oersjoch

In oersjoch fan 'e meast foarkommende militêre rangen:

lânmacht en mariniers	marine	loftmacht
opperofsieren
maarskalk of fjildmaarskalk of generaal fan it leger	grutadmiraal of admiraal fan de float	maarskalk fan de loftmacht
generaal	admiraal of luitenant-admiraal	generaal of opperloftmaarskalk
luitenant-generaal	fise-admiraal	luitenant-generaal of loftmaarskalk
generaal-majoar	skout-by-nacht	generaal-majoar of fise-loftmaarskalk
brigadegeneraal	kommandeur	commodore
haadofsieren
kolonel	kaptein-op-see	kolonel of groepskaptein
luitenant-kolonel	kaptein-luitenant-op-see	luitenant-kolonel of wing commander
majoar	luitenant-op-see 1e klasse	majoar of squadron leader
subalterne ofsieren
kaptein	luitenant-op-see 2e klasse	kaptein of flechtluitenant
earste luitenant		earste luitenant of flechtofsier
twadde luitenant	luitenant-op-see 3e klasse	twadde luitenant of piloat-ofsier
faandrich of kornet1		faandrich
kapelmaster
ûnderofsieren
adjudant	adjudant	adjudant
sersjant-majoar of opperwachtmaster1	sersjant-majoar	sersjant-majoar
sersjant 1e klasse of wachtmaster 1e klasse1	sersjant	sersjant 1e klasse
sersjant of wachtmaster1		sersjant
korporaals
korporaal 1e klasse	korporaal	korporaal 1e klasse
korporaal		korporaal
manskippen
soldaat 1e klasse of marinier 1e klasse2	matroas 1e klasse	soldaat 1e klasse
soldaat 2e klasse of marinier 2e klasse2	matroas 2e klasse	soldaat 2e klasse
soldaat 3e klasse of marinier 3e klasse2	matroas 3e klasse	soldaat 3e klasse

¹) by de artillery en de kavalery
²) by de mariniers

Sjoch ek

• List fan militêre rangen fan de Nederlânske kriichsmacht

Boarnen, noaten en referinsjes