From Wikipedia, the free encyclopedia
Cosean al è un comun intal Friûl di Mieç e al à 2.014 abitants (al 1n di Zenâr 2024[1]). Tal 1866 al è stât l'unic comun di dut il "Venit" (teritori austriac che al cjapave dentri il Friûl e il Venit di vuê) cun 25 vôts contrariis ae anession a la Italie, su 36 vôts contrariis in dut il Friûl (i "sì" a son stâts 144 mil; intal comun di Cosean a son stâts 219[2]), par cheste reson al è clamât ancjemò vuê "Cosean dal no"[3]. Intes frazions però si veve votât "sì"[4].
| Cosean | |
| Non uficiâl par talian | Coseano |
| Part | Friûl di Mieç |
| Coordenadis gjeografichis | 46°06′00″N 13°01′00″E |
| Superficie | 23,8 km² |
| Popolazion | 2014 (2024) ab. |
| Densitât | 84,62 ab/km² |
| Frazions | Baracêt, Cjiscjerne, Coseanet (localitât), Maseriis, Nearêt |
| Comuns confinants | Dignan, Flaiban, Merêt di Tombe, Rivis Darcjan, San Vît di Feagne, Sedean |
| CAP | 33030 |
| Prefìs telefonic | 0432 |
Il non Cosean, di divignince romane (< Caucilianus) al è di ete republicane o protoimperiâl e duncje une vore antic[5]; inte forme Cosano, Coselano, Coseglano si lu cjate za dal sec. XI d.d.C.[5]; chel di Coseanet intes formis Coselaneto, Cosiglaneto o Coseglanetto dal sec. XIV d.d.C.[6]
Il comun di Cosean al fo istituît in cheste forme dal 1n di Zenâr dal 1819 dal Guviêr austriac des Provincis Venitis (decret 106 dai 8 di Lui dal 1818)[7]; il stes Guviêr, trê agns prin (decret dai 30 di Novembar dal 1815 cun validitât dal Zenâr 1816[8]; plui tart ancje cun at n° 55 dai 4 di Avrîl 1816[9]), al veve incorporât Coseanet, Cosean e Maseriis tal comun di Dignan; Baracêt, Cjiscjerne e Nearêt ta chel di Flaiban.
Intal Ream di Italie napoleonic, i paîs che in dì di vuê a formin il comun di Cosean, che prin a jerin stâts comuns autonoms, tacant dal 1n di Zenâr dal 1811 a vignirin incorporâts intal Comun di Nearêt (formât di Nearêt, Baracet, Coseanet, Cosean, ma ancje di Flaiban, San Durì e Savalons) e di Dignan (formât di Dignan, Bunzic, Cjarpât, Vidulis, Cjiscjerne e Maseriis)[10].
A.S.D. G.S. Coseano e je la scuadre di balon dal comun, e je une Societàt privade, il sô president al è Stefano Di Bidino.
Dal 2000, ogni prime domenie di Jugn pes viis dal paîs e je une mostre internazionâl di piture clamade Premio Arte Coseano, che e à vût tant che testimonials artiscj impuartants, furlans e no, come Ulderica Da Pozzo (2016) e Carlo Balljana (2017)[11].
Dal 1982 a Cosean al è atîf un côr (clamât fin al 2014 Nuova Corale di Coseano, cumò Coro Musiche d'inCanto), che tai agns al à fat concierts no dome in Friûl, ma in dute la Italie dal Nord e centrâl sicu in altris paîs di Europe.
A Cosean e esist dal 1962 la Sezione Donatori di Sangue di Coseano (za fondade doi agns prin a Nearêt cul non di Associazione Donatori di Sangue)[12].
Il comun di Cosean al fâs part de Comunitât Culinâr dal Friûl.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
