Cintio Vitier

Cintio Vitier (Key West, Florida, AEB, 1921eko irailaren 25a - Habana, Kuba, 2009ko urriaren 1a) kubatar poeta izan zen, jatorriz estatubatuarra.

Cintio Vitier
Bizitza
Jaiotza	Key West, 1921eko irailaren 25a
Herrialdea	Kuba  Ameriketako Estatu Batuak
Heriotza	Habana, 2009ko urriaren 1a (88 urte)
Familia
Aita	Medardo Vitier
Ezkontidea(k)	Fina García Marruz
Seme-alabak	ikusi José María Vitier (en) Sergio Vitier (en)
Hezkuntza
Hizkuntzak	gaztelania
Jarduerak
Jarduerak	poeta, idazlea, abokatua eta saiakeragilea
Jasotako sariak	ikusi FIL Award  (2002) Kubako Literatura Sari Nazionala  (1988) José Martí ordena Ordre des Arts et des Lettres
Genero artistikoa	eleberria saiakera

Biografia

1935ean Habanara joan zen eta Zuzenbideko ikasketak egin zituen han (1947). Orígenes taldeko kide izan zen, Lezama Lima eta Eliseo Diegorekin batera, besteak beste. 1947-1961 bitartean frantseseko eskolak eman zituen Habanako Irakasle Eskolan, eta 1959-1960 urteetan Kubako eta Hispanoamerikako literatura-irakasle izan zen, eta Hispaniar Ikasketen Saileko zuzendari, Las Villasko Unibertsitate Zentralean (Universidad Central). Liburutegi Nazionaleko ikertzaile gisa lan egin zuen eta Revista de la Biblioteca Nacional «José Martí» aldizkariaren zuzendari izan zen, besteak beste. Kubako eta atzerriko argitalpen askotan parte hartu zuen. Paul Valéry, Stéphane Mallarmé, Paul Claudel eta Arthur Rimbauden obren gaztelaniarako itzulpenak egin zituen.

Bere poesian eguneroko gauzez hitz egiten du, eta hitzaz kezkaturik agertzen da eta estutasun metafisiko nabarmena agerian uzten du.

Obra nagusiak: Vísperas (1938-1953) (1953, "Bezperak [1938-1953]"); Testimonio (1953-1968) (1968, "Lekukotasuna [1953-1968]"); La fecha al pie (1981, "Data oinean"); Hojas perdidizas (1988, "Hosto galkorrak"); Poemas de mayo y junio (1990, "Maiatz-ekaineko poemak").

Aipagarriak ditu Kubako literaturaz egindako lanak: Diez poetas cubanos. 1937-1947 (1948, "Hamar poeta kubatar. 1937-1947"); Cincuenta años de poesía cubana. 1902-1952 (1952, "Kubatar poesiako berrogeita hamar urte. 1902-1952"); Las mejores poesías cubanas (1959, "Kubatar poesiarik onenak"); Los grandes románticos cubanos (1960, "Kubatar erromantiko handiak"); La crítica literaria y estética en el siglo XX cubano (1968-1974, "Kubako XX. mendeko kritika literarioa eta estetikoa"). José Martíri buruzko zenbait saiakeraren egilea ere bada: Estudios Críticos (1964, "Azterketa kritikoak"); Temas Martianos (1969, "Martiren inguruko gaiak").

Hainbat sari jaso zituen; besteak beste, Literaturako Sari Nazionala, 1988an, Juan Rulfo saria 2002an, eta Kubako Zientzia Akademiaren domina. Aurrekoez gain, Habanako Unibertsitateak, Las Villasko Unibertsitate Zentralak eta Japongo Soka Unibertsitateak emandako Honoris causa doktoregoak jaso zituen.

Erreferentziak

• Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/26 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.

• Datuak: Q1092590