Dreves Uitterdijk

Dreves UITTERDIJK (naskiĝis la 25-an de februaro 1866 en Readtsjerk, Frislando, mortis la 13-an de aŭgusto 1940 en Hilversum) estis nederlanda institutestro, poste korektisto kaj esperantisto ekde 1898. Li estis ano de la Lingva Komitato de 1905 ĝis sia morto en 1940, kaj pioniro de la Esperanto-movado en Nederlando. Li mempriskribis kiel "liberpensulo kun rozkolora nuanco."^[1]

PeEnEo: 27546 GND: 1075833752 LCCN: nb2016024252 VIAF: 121324194 ISNI: 0000000079602557 NKC: xx0117283

Dreves Uitterdijk
Dreves Uitterdijk en 1906
Persona informo
Naskiĝo	25-an de februaro 1866 (1866-02-25) en Readtsjerk
Morto	13-an de aŭgusto 1940 (1940-08-13) (74-jaraĝa) en Hilversum
Lingvoj	Esperanto • nederlanda
Ŝtataneco	Reĝlando de Nederlando
Okupo
Okupo	esperantisto (1898–)
v • d • r

Verkoj

Uitterdijk verkis la unuan detalan lernolibron por nederlandanoj, surbaze de la Manuel Complet de Louis de Beaufront de 1892. La Volledig Leerboek der opkomende wereldtaal Esperanto aperis la 1-an de decembro 1901 (la lernolibro de Jacob Leendert Bruijn, kiu aperis unu jaron pli frue en 1900 en Amsterdamo, estis nur malgranda). En majo 1902 li fondis la gazeton La Holanda Pioniro, de li redaktita kaj administrita, kiu malaperis fine de 1905 pro financaj problemoj. Li verkis vortarojn Nederlanda-Esperanto (1909) kaj Esperanto-Nederlanda (1913) kaj ekzercarojn (Oefeningsboekje, 1907, kaj Taga konversacio en Esperanto laŭ verko de Jean Borel, ĉirkaŭ 1920); li faris paroladojn, gvidis kursojn, skribis informajn artikolojn. En la 1920-aj jaroj Uitterdijk verkis novan lernolibron, Volksleerboek ("Popola Lernolibro", 1926/27) kaj tradukis amuzan bild-libron Vojaĝoj kaj Aventuroj de Sinjoro Longkrurulo (1927).

Uitterdijk helpis la starigon de la Nederlanda Esperanto-Societo "La Estonto estas Nia" en 1905. Oferinte por Esperanto en la unuaj jaroj sian tutan liberan tempon, sian energion kaj tutan ŝparmonon, li post 1905 iom malpli aktiviĝis. Tamen li prizorgis ĝis 1923 recenz-rubrikon en restarigita Holanda Pioniro. En 1925-27 li redaktis Holandan Esperanto-Pioniron kaj la propagandan publikaĵon Wereldtaal (esperante: Mondlingvo) kaj partoprenis en nova organizo Nederlanda Esperanto-Asocio (NEA).

Verkoj

• WAT WIL DE WERELDHULPTAAL «ESPERANTO» ?. 1926. Eld. N. V. Ontwikkeling - Amsterdam. 16 paĝoj 14 X 19 cm.

	„ Dreves Uiterdijk, nia malnova pioniro en Nederlando pristudas en tiu-ĉi broŝuro la problemon de la internacia lingvo por la laboristoj. ” — Belga esperantisto n145-146 (mar-apr 1927)

• VOLKSLEERBOEK DER W ERELDHULiTAALk. 1926. Eldonis Holanda Esperanto-Oficejo, Laren, 92 paĝoj. 15 X 22 cm.

	„ Bona lernolibro por personoj, kiuj deziras akiri la lingvon sen profesoro. Multaj bone elektitaj ekzercoj kondukos la lernanton al la celita rezulto. ” — Belga esperantisto n147 (maj 1927)

Honorigoj

La estraro de LEEN en 1907: Dirk Frans Romein, Uitterdijk (dekstre sidante), Heiman Blok kaj A. M. Valeton.

• Honora prezidanto de Nederlanda Esperanto-Ekzamena Komitato;

• Honora membro de La Estonto estas Nia;
• Honora membro de Federacio de Laboristaj Esperantistoj;
• Delegito de Universala Esperanto-Asocio ĝis 1936;
• Ekde 2015 ekzistas Dreves Uitterdijkstraat en Hago rekte apud la Zamenhofstraat kaj la Esperantoplein.^[2]

Referencoj

1. Sennacieca Asocio Tutmonda (1937-09-25). “Protokolaro pri la XVII-a Kongreso de S.A.T. en Roterdamo (31. VII.- 5. VIII.1937)”, Sennaciulo (eo) 13 (457), p. 68. “La veterano, K-do Dreves Uitterdijk, honora prezidanto de la Kongreso, diras, ke li estis sian tutan vivon liberpensulo, kun rozkolora nuanco.”. 
2. Naamgeving delen van de openbare ruimte: Limoenhof en Dreves Uitterdijkstraat (Segbroek) (nederlande). Gemeente Den Haag (2015-03-03). Arkivita el la originalo je 2018-04-10. Alirita 2018-04-11 .

Bibliografio

(1940-09-01) “Nekrologo”, La Praktiko (eo) 9 (105), p. 1.  Foto sur p. 4. Sama foto aperis en (1935-02) La Praktiko (eo) 4 (38), p. 9 okaze de la 70-a naskiĝtago de Uitterdijk.

(1933-03-01) “Biografia skizo”, Esperanto (eo), p. 62. 

(1940-08-01) “Niaj Mortintoj”, Esperanto (eo) 6 (486), p. 50 (10). 

Eksteraj ligiloj

• Enciklopedio de Esperanto/U en sia originala formo en la Interreto
• Enciklopedio de Esperanto en elŝutebla versio (PDF).
• esperante Libroj kaj aliaj dokumentoj^{[rompita ligilo]} de kaj pri Dreves Uitterdijk en la Kolekto por Planlingvoj kaj Esperantomuzeo Arkivigite je 2007-12-21 per la retarkivo Wayback Machine.
• esperante Biografia skizo (UEA 1933).

• Kategorio Dreves Uitterdijk en la Vikimedia Komunejo (Multrimedaj datumoj)
• Dreves Uitterdijk en Vikifontaro (Universala biblioteko)