Mary Wynne Warner

Mathemategydd o Gymru oedd Mary Wynne Warner (22 Mehefin 1932 – 1 Ebrill 1998) oedd yn arbenigo mewn mathemateg niwlog (fuzzy mathematics).^[1][2] Nododd ei hysgrif goffa ym Mwletin Cymdeithas Fathemategol Llundain mai topoleg niwlog oedd "y maes lle'r oedd hi'n un o'r arloeswyr ac fe'i cydnabyddir fel un o'r bobl flaenllaw dros y tri deg mlynedd diwethaf."^[3]

Mary Wynne Warner
Ganwyd	Mary Wynne Davies  22 Mehefin 1932  Caerfyrddin
Bu farw	1 Ebrill 1998  Sbaen
Dinasyddiaeth	Cymru
Alma mater	Ysgol Howell's Coleg Somerville, Rhydychen Academi Gwyddorau Pwylaidd
ymgynghorydd y doethor	Andrzej Białynicki-Birula
Galwedigaeth	mathemategydd
Cyflogwr	City, Prifysgol Llundain Coleg Bedford
Adnabyddus am	Lattices and lattice-valued relations in biology

Bywyd cynnar ac addysg

Ganwyd Mary Wynne Davies yng Nghaerfyrddin, Cymru, yn ferch hynaf i Sydney ac Esther Davies. Magwyd hi yn Llanymddyfri, lle'r oedd ei thad yn ysgolfeistr. Cafodd ei haddysg yn Ysgol Breswyl Howell's yn Ninbych.^[4]

Enillodd ysgoloriaeth i astudio yng Ngholeg Somerville, Rhydychen, lle bu'n canolbwyntio ar dopoleg yn ei astudiaethau mathemategol gyda Henry Whitehead, gan ennill gradd ail ddosbarth yn 1953^[5]. Astudiodd am ei doethuriaeth ym Mhrifysgol Warsaw, gyda thraethawd hir yn dwyn y teitl "The Homology of Cartesian Product Spaces" (1966).

Gyrfa

Lluniwyd gyrfa Mary Wynne Warner gan aseiniadau diplomyddol ei gŵr. Gwnaeth ymchwil yn Beijing, pan oedd ei gŵr yn gweithio yno. Gyda phenodiad diplomyddol arall yn Rangoon, bu'n dysgu mathemateg uwch. Am gyfnod yn ystod y 1970au, roedd ganddi swyddi dysgu mewn dwy brifysgol yn Kuala Lumpur. Yn ystod cyfnodau estynedig yn Lloegr, bu'n dysgu ym Mhrifysgol Dinas Llundain, lle ddaeth o'r diwedd yn athro yn 1996.

Bywyd personol

Priododd Mary Wynne Davies diplomydd a swyddog cudd-wybodaeth Syr Gerald Warner yn 1956. Roedd ganddynt tri o blant, Sian (g. 1958), Jonathan (g. 1959), a Rachel (g. 1961), pob un wedi eu geni mewn gwahanol wledydd. Bu farw yn 1998, yn Sbaen, yn 65 oed. Claddwyd hi ym mynwent eglwys Kemerton lle'r oedd dau o'i blant eisoes wedi eu claddu.^[3]