Ghjuvan' Petru Lucciardi

Ghjuvan Petru Lucciardi (1862-1928) hè statu un scrivanu è pueta corsu.

Biugrafia

Santu Petru di Tenda: u paese nativu di Ghjuvan Petru Lucciardi

Ghjuvan Petru Lucciardi hè natu in Santu Petru di Tenda (Nebbiu) lu 20 di dicembre di lu 1862. A so mamma si chjamava Laura Maria Querci, è u so babbu Carlone Lucciardi. Ghjera una vechja famiglia d’agricultori (vigni è alivetti). Anton Bastianu Lucciardi era u so arcibabbone è ghjera un pueta assai cunnisciutu « Prete Biasgiu ». Ùn era micca un prete ma vulìa diventà prete quand’ellu era ghjovanu, ghjè per quessa ch’era chjamatu cusì. Hè mortu in lu 1860. Quandu Ghjuvan Petru Lucciardi nasce, sente parlà di u so arcibabbone, è li si pare di cunnosce lu. Tene dui fratelli è trè surelle maiò. Ghjuvan Petru Lucciardi hè u terzu figliolu. Hè andatu in Aiacciu à fà a scola nurmale à 16 anni. Face parte di a prima generazione di i maestri di a terza republica. Ghjè unu di i primi à circà cù i mezi di nanzu à insegnà u corsu. Ghjè statu maestru in parechji lochi. S’hè maritatu è hà avutu trè figloli (Carlu, Petru Ghjuvanni è Bastianu). Perde u so figliolu Carlu u 25 di dicembre di u 1907, à l'età di 20 anni, di a malatia di a tisia. À parte di què un scrive ch'è in corsu, era una manera di sprime i so sintimi. Hà scrittu in a rivista “A Tramuntana”. Hà scrittu dinù parechji testi ; unu d'elli “Canti Corsi” pare impurtante chì hà un interessu socio-linguisticu, literariu ma dinù storicu pè a lingua corsa. Ghjuvan Petru Lucciardi hè mortu in Parigi u 5 d'aostu di u 1928.

Opari

• I Galli Rivali (1909)
• A Greva di e Giuvanotte (1909)

Puesia

• Canti Corsi (1921): l'opera hè cumposta da 5 parte: I. Cose viste ; II. Cose diverse ; III. Doli ; IV. Cose andate ; V. A lingua Corsa. Cumprende U Mio Paese, A Lingua Corsa, U Ghjornu di i Morti, A Lumera, A Rocca, Cantu Corsu
• Sunniendu: publicata in L'Annu corsu (1927)

Teatru

• A Vindetta di Lilla (1911)
• Maria Gentile (1912): un' opera di teatru annantu à listessu tema ch'è quella di Vattelapesca (Petru Lucciana)^[1]
• U Martiriu di Santa Divota (1922): À i Corsi

Bibliugrafia

• Geniu Gherardi (2011) I Lucciardi - Una famiglia corsa di pueti è di maestri di scola Archiviu 2021-01-22 at the Wayback Machine, Edizione Albiana
• Ghjuvan' Petru Lucciardi (1909) I Galli Rivali, Bastia, Stamperia C. Piaggi
• Ghjuvan' Petru Lucciardi (1912) Maria Ghjentile : dramu storicu in trè atti, Bastia : Stamperia Ollagnier
• Ghjuvan' Petru Lucciardi (1921) Canti Corsi Archiviu 2016-03-07 at the Wayback Machine, Castelnaudary, Sucietà d'Edizione Occitane.
• Ghjuvan' Petru Lucciardi (1922) U Martiriu di Santa Divota, Parigi : Sucietà Parigina di Stamperia
• Ghjuvan' Petru Lucciardi (1924) Cose andate..., Aiacciu : stamperia di A Muvra.
• Antone Bonifacio è Paulu Arrighi (dir.), L'Annu Corsu (1927), Nizza Archiviu 2016-03-07 at the Wayback Machine
• Ghjuvan' Maria Arrighi (2002) Storia di a lingua corsa, Edizione Gisserot.