Prezidant

Ur prezidant (ur brezidantez) zo un den lakaet e penn ur bodad pe ur vro, dre anvadur, dre zilennadur pe dre gevezholadur.
Kadoriad(ez) a vez graet ivez eus penn ur bodad, diwar ar ger cadeirydd, e kembraeg.

Gerdarzh

Eus ar galleg président, a zeuas e 1296 eus al latin proesidens diwar proesidere, ur ger savet diwar proe "a-raok", "dirak" ha sedere "azezañ"^[1] E 1617 e voe ar stumm benel gallek, présidente.^[1]
Ar verb présider zo e galleg, a zo pennren e brezhoneg.

Pelec'h e vez lakaet ur prezidant?

E penn meur a dra e vez kavet ur prezidant :

• ur Stad, a c'hall bezañ ur republik demokratel pe get ;
• kuzul ministred ur Stad, "prezidant(ez) ar c'huzul" a lavarer neuze ;
• ur strollad politikel, "pennsekretour(ez)" eo an titl a-wechoù ;
• kevredigezhioù, kleuboù a bep seurt (sportoù hag all) ; e Bro-C'hall e rank ur gevredigezh bet savet hervez lezenn 1901 kaout ur prezidant pe ur brezidanter en he fenn^[2].

Broioù ma'z eus prezidanted

Dre vras e vez prezidanted en holl vroioù ma n'eus ket a roue pe a briñs e penn ar vro, met doareoù disheénvel a vez d'o envel.

 Unaniezh Europa

• Alamagn (betek 1918 e oa un impalaer, ha rouaned dindanañ)
• Aostria
• Bro-C'hall (diskaret e voe ar roue diwezhañ e 1848, hag an impalaer diwezhañ e 1870; etre 1940 ha 1944 e oa ur penn-stad)
• Gres (ur roue zo bet)
• Italia (ur roue a oa betek 1944)
• Iwerzhon (er Rouantelezh-Unanet e oa betek he Dieubidigezh)
• Polonia (ur roue a oa a-raok ma voe rannet ar vro etre ar stadoù amezek)
• Portugal (ur roue a oa betek deroù an XXvet kantved)
• Suis

Rouaned pe briñsed zo er broioù-mañ :

• Andorra : daou genbriñs zo (eskob Urgell ha prezidant ar republik c'hall)
• Belgia
• Danmark
• Izelvroioù
• Monako (ur priñs zo)
• Norge
• Spagn (prezidanted zo bet en amzer ar Republikoù)
• Sveden
• Rouantelezh-Unanet (roue pe rouanez, a ren ivez war broioù all, evel Aostralia ha Kanada)
• Vatikan (ar pab a vez graet eus penn ar stad)

Afrika

Ur roue zo e Maroko.

Amerika

Notennoù

1. (fr) Geriadur gallek Le Robert de la langue française.
2. (fr) Légifrance