Пятро Васільевіч Мятла

Пятро Васільевіч Мятла (1890, в. Кухцінцы Дзісенскага павета Віленскай губерні, злілася з в. Завуцце — 12 жніўня 1936) — беларускі грамадска-палітычны дзеяч Заходняй Беларусі. Член Камуністычнай партыі Заходняй Беларусі з 1926.

Пятро Васільевіч Мятла
Дата нараджэння	1890
Месца нараджэння	Кухцінцы[d], Дзісенскі павет, Віленская губерня, Расійская імперыя
Дата смерці	12 жніўня 1936(1936-08-12)
Месца смерці	Беламорска-Балтыйскі канал, Карэлія, РСФСР, СССР
Грамадзянства	Расійская імперыя  Польская Рэспубліка  БССР
Адукацыя	Дзісенскае гарадское вучылішча[d] Аляксееўскае ваеннае вучылішча[d]
Партыя	Беларуская сялянска-работніцкая грамада Камуністычная партыя Заходняй Беларусі
Член у	Таварыства беларускай школы Беларускі пасольскі клуб
Род дзейнасці	палітык
Месца працы	Камісія па вывучэнні Заходняй Беларусі
Медыяфайлы на Вікісховішчы

У Вікіпедыі ёсць артыкулы пра іншых людзей з прозвішчам Мятла.

Біяграфія

Пятро Мятла, фота да 1928 года

У 1906—1910 вучыўся ў Дзісенскім гарадскім вучылішчы, у 1911—1912 на педагагічных курсах у Коўне. Працаваў настаўнікам. У 1914—1917 у арміі. Знаходзіўся сярод юнкераў Аляксееўскага ваеннага вучылішча, якія «выступілі супраць рэвалюцыі і паўстаўшага пралетарыяту». Быў арыштаваны і зняволены ў турму. З канца 1917 да 1921 настаўнічаў. З 1921 у Вільні.

У 1921—1922 працаваў бухгалтарам, загадчыкам аддзела Віленскага саюза кааперацыі. Удзельнічаў у стварэнні нацыянальна-вызваленчых суполак і арганізацый, беларускіх школ у Заходняй Беларусі. У 1922 г. быў выбраны дэпутатам польскага сейма ад беларускай нацыянальнай меншасці. Быў членам Беларускага пасольскага клуба.

Дэпутаты польскага Сейма ад Беларускай сялянска-работніцкай грамады Пятро Мятла, Павел Валошын, Браніслаў Тарашкевіч, Сымон Рак-Міхайлоўскі і Фелікс Галавач арыштаваныя ў студзені 1927 г. польскімі ўладамі.

Адзін са стваральнікаў Беларускай сялянска-работніцкай грамады (БСРГ), член яе ЦК. Пасля яе разгрому 16 студзеня 1927 арыштаваны і прыгавораны польскімі ўладамі да 12 гадоў турмы. У 1930 годзе вызвалены з турмы і ў кастрычніку таго ж года пакінуў Польскую Рэспубліку, нелегальна перайшоўшы мяжу з СССР^[1]. Працаваў у Камісіі па вывучэнні Заходняй Беларусі пры Прэзідыуме Беларускай акадэміі навук (яе старшыня 1932—1933), у ВСНГ БССР намеснікам начальніка планавання, начальнікам сектара кадраў.

1 верасня 1933 арыштаваны ДПУ БССР па справе Беларускага нацыянальнага цэнтра. Пастановай калегіі АДПУ СССР ад 9 студзеня 1934 прыгавораны да вышэйшай меры пакарання, якая заменена 10 гадамі ППЛ. Зняволенне адбываў на будаўніцтве Беламорска-Балтыйскага канала. Памёр у лагеры. Рэабілітаваны 16 жніўня 1956 КДБ пры Савеце Міністраў БССР.

Зноскі

1. Sprawozdanie z życia mniejszości narodowych, IV kwartał 1930, wyd. 1931. — s. 63

Літаратура

• Адамушка, У. Мятла Петр Васільевіч // Энцыклапедыя гісторыі Беларусі. У 6 т. Т. 1: А — Беліца / Рэдкал.: М. В. Біч і інш.; Прадм. М. Ткачова; Маст. Э. Э. Жакевіч. — Мн. : БелЭн, 1993. — С. 251. — 20 000 экз. — ISBN 5-85700-074-2.
• Мятла Пётр Васілевіч // Беларусь: энцыклапедычны даведнік / Рэдкал. Б. І. Сачанка (гал. рэд.) і інш.; Маст. М. В. Драко, А. М. Хількевіч. — Мн.: БелЭн, 1995. — С. 508. — 800 с. — 5 000 экз. — ISBN 985-11-0026-9.

Спасылкі

• Пакутнікі Беларусі — Сайт клуба «Спадчына»