Магілёўскі дзяржаўны бібліятэчны каледж імя А. С. Пушкіна

Магілёўскі дзяржаўны бібліятэчны каледж імя А. С. Пушкіна — колішняя сярэдняя спецыяльная навучальная ўстанова ў Магілёве. Размяшчаўся па адрасе вул. Касманаўтаў, 7. Заснаваны ў 1946 годзе. У 2017 годзе далучаны да Магілёўскага дзяржаўнага каледжа мастацтваў. На працягу ўсяго свайго існавання заставаўся адзінай навучальнай установай у Беларусі, якая рыхтавала спецыялістаў бібліятэчнай справы з сярэдняй спецыяльнай адукацыяй^[1].

Магілёўскі дзяржаўны бібліятэчны каледж імя А. С. Пушкіна  (МДБК імя А. С. Пушкіна)
Дата заснавання	26 кастрычніка 1946
Тып	каледж
Размяшчэнне	Магілёў
Адрас	212022, г. Магілёў, вул. Касманаўтаў, 7
www.mgbk.mogilev.by

Гісторыя

Заснаваны як Магілёўскі бібліятэчны тэхнікум у адпаведнасці з Пастановай Савета Народных камісараў Беларускай ССР № 1638 ад 26 кастрычніка 1946 года. Першапачаткова заснавання тэхнікум не меў уласнага памяшкання і размяшчаўся ў будынку культурна-асветнага вучылішча імя Н. К. Крупскай у г. Магілёве^[1].

1 ліпеня 1948 года тэхнікум быў пераведзены ў г. Мінск. У 1949 годзе Прэзідыумам Вярхоўнага Савета БССР бібліятэчнаму тэхнікуму прысвоена імя А. С. Пушкіна ў сувязі са 150-годдзем з дня нараджэння рускага паэта. У гэтым жа годзе адбыўся 1-ы выпуск 55 спецыялістаў. У 1950 годзе ў навучальнай установе адкрыта завочнае аддзяленне^[1].

У жніўні 1961 года тэхнікум ізноў пераведзены ў Магілёў, дзе размясціўся ў будынку машынабудаўнічага інстытута. У 1967 годзе тэхнікум атрымаў новы будынак з актавай і спартыўнай заламі і інтэрнат^[1].

З 1994 года дзейнічала сістэма бесперапыннай падрыхтоўкі спецыялістаў у комплексе «Беларускі дзяржаўны ўніверсітэт культуры і мастацтваў — Магілёўскі дзяржаўны бібліятэчны каледж імя А. С. Пушкіна». З 1995 года вядзецца падрыхтоўка па дзвюх дадатковых спецыялізацыях: «Аўтаматызаваныя бібліятэчныя і інфармацыйныя сістэмы»; «Бібліятэчна-клубная праца»^[1].

26 сакавіка 2009 года тэхнікум ператвораны ў Магілёўскі дзяржаўны бібліятэчны каледж імя А. С. Пушкіна. У гэтым жа годзе адбылася акрэдытацыя спецыяльнасцей «Бібліятэказнаўства і бібліяграфія» і «Дакументацыйнае забеспячэнне кіравання і архівазнаўства». 1 лістапада 2010 года акрэдытавана спецыяльнасць «Дакументазнаўства і дакументацыйнае забеспячэнне кіравання»^[1].

1 верасня 2017 года далучаны да Магілёўскага дзяржаўнага каледжа мастацтваў^[2].

Спецыяльнасці

• Бібліятэказнаўства і бібліяграфія
• Дакументазнаўства і дакументацыйнае забеспячэнне кіравання

Вядомыя выпускнікі

• Алесь Махнач (1922—2001) — беларускі драматург, празаік, публіцыст.
• Анатоль Паўлавіч Чаркасаў (1928—2000) — беларускі празаік, нарысіст, перакладчык.
• Андрэй Аляксеевіч Паўлухін (нар. 1980) — беларускі пісьменнік-фантаст.
• Уладзімір Антонавіч Марук (1954—2010) — беларускі паэт і перакладчык.
• Іван Піліпавіч Супрунчык (нар. 1942) — скульптар, разьбар па дрэве, мастак.

Вядомыя выкладчыкі

• Сцяпан Хусейнавіч Александровіч (1921—1986) — беларускі пісьменнік, літаратуразнаўца, крытык, краязнаўца.

Зноскі

1. Гісторыя каледжа Архівавана 22 кастрычніка 2017.
2. Могилевский колледж искусств и библиотечный колледж объединили в одно учебное заведение Архівавана 25 верасня 2020.

Спасылкі

mgbk.mogilev.by — афіцыйны сайт МДБК імя А. С. Пушкіна