Жоўцевы грыб

Жоўцевы грыб, таксама Воўчы грыб^[1] (Tylopilus felleus) — неядомы з-за горкага смаку трубчасты грыб роду тылапіл (Tylopilus) сямейства балетавыя (Boletaceae). Пры гатаванні горыч гэтага грыба не знікае, а наадварот, узмацняецца.

Жоўцевы грыб
Навуковая класіфікацыя
прамежныя рангі Дамен:  Эўкарыёты Царства:  Грыбы Падцарства:  Вышэйшыя грыбы Аддзел:  Базідыяльныя грыбы Пададдзел:  Agaricomycotina Клас:  Агарыкаміцэты Падклас:  Agaricomycetidae Парадак:  Балетавыя Сямейства:  Балетавыя Род:  Гаркун Від:  Жоўцевы грыб
Міжнародная навуковая назва
Tylopilus felleus
Сістэматыка на Віківідах Выявы на Вікісховішчы NCBI   98230 EOL   1013415 MB   122480

Апісанне

Дыяметр шапкі складае 4—10 см (да 15 см), шапка мае паўшарападобную, пазней круглява-падушкападобную або раскінутую форму, навобмацак сухая, тонка-кудзелістая, з пушком або аксаміцістая, затым гладкая, у сырое надвор’е трохі клейкая, колер шапкі — жоўта-карычневы, жоўта-бураваты, светла-бураваты, шэра-вохрысты, шаравата-карычневы, радзей каштанава-карычневы або цёмна-буры.

Мякаць белая, чырванее або не змяняе колер на зрэзе, горкая на смак, без асаблівага паху, амаль ніколі не мае чарвей.

Ножка 3—12,5 см вышынёй і 1,5—3 см таўшчынёй, цыліндрычная або булавападобная, уздуцце ўнізе, колер крэмава-вохрысты, жаўтлявы, вохрысты-жоўты ці жоўта-карычневы, уверсе бялёсы або сметанкова-жоўты, з ярка акрэсленай сетачкай бурага, цёмна-карычневага ці нават чарнаватага колеру.

Споравы парашок ружовы, ружавата-карычневы. Споры 10—15 × 4—5 мкм.

Жоўцевы грыб быў прапанаваны ў якасці жоўцегоннага сродку^[2].

Зноскі

1. Напісанне Жоўцевы грыб, Воўчы грыб у адпаведнасці з БЭ ў 18 тамах., Т.6. Мн., 1998, С.440
2. Bauchet J. M. Experiens sur les proprietes curatives des champignons. Bull. trimestr. Soc. mycil. France, 77, 4, 1961

Літаратура

• Беларуская энцыклапедыя: У 18 т. Т. 6: Дадаізм — Застава / Рэдкал.: Г. П. Пашкоў і інш. — Мн. : БелЭн, 1998. — Т. 6. — 576 с. — 10 000 экз. — ISBN 985-11-0035-8. — ISBN 985-11-0106-0 (т. 6).