Беларуска-амэрыканскае задзіночаньне

Белару́ска-амэрыка́нскае задзіно́чаньне (скарочана БАЗА) — грамадзкае аб’яднаньне беларускай дыяспары ў ЗША, заснаванае ў ліпені 1949 году ў Брукліне (Нью-Ёрк). Старшыня — Натальля Федарэнка.

Беларуска-амэрыканскае задзіночаньне (БАЗА)
Абрэвіятура	БАЗА
Дата ўтварэньня	31 ліпеня 1949 (75 гадоў таму)
Тып	некамэрцыйнае
Юрыдычны статус	грамадзкае аб’яднаньне
Мэта	захаваньне беларускай культуры
Месцазнаходжаньне	Нью-Ёрк
Дзейнічае ў рэгіёнах	ЗША
Афіцыйныя мовы	Беларуская, ангельская
Старшыня	Натальля Федарэнка
Сайт	http://baza.nyc/

Заснаванае ў 1949 годзе з ініцыятывы Міколы Гарошкі, Яна Станкевіча, Міколы Дарашэвіча, Янкі Ніхаёнка. Мае аддзелы ў некалькіх штатах ЗША (Нью-Ёрк, Нью-Джэрзі, Кліўлэнд ды Флорыда). Праводзіць сустрэчы беларусаў Паўночнай Амэрыкі. Выдае газэту «Беларус».

Кіраваньне

• Кангрэс. Склікаецца аднойчы на 2 гады ў траўні. Складаецца з прадстаўнікоў гурткоў. Абсалютнай большасьцю галасоў выбірае старшыню, Управу ў складзе 9 сябраў і Рэвізійную камісію з 3 асобаў. Таксама вызначае заступніка старшыні, сакратара і скарбніка ў складзе Ўправы, якія разам са старшынёй утвараюць Урад.
• Управа. Складаецца з 9 сябраў на чале са старшынёй. Набывае нерухомасьць і прымае новыя гурткі. Зацьвярджае пастановы простай большасьцю галасоў у прысутнасьці 2/3 сябраў.
• Урад. Складаецца са старшыні, яго заступніка, сакратара і скарбніка. Выконвае пастановы Кангрэсу.
• Рэвізійная камісія. Складаецца з 3 сябраў. Штогод правярае грашовую справаздачнасьць Управы^[1].

Аддзяленьні

На 7 чэрвеня 2015 году налічвалася 8 аддзяленьняў:

• горад Нью-Ёрк (гарадзкі раён Бруклін, Атлянтычны праспэкт(en), д. 401
• Гайлэнд-Парк(en), акруга Мідлсэкс(en), штат Нью-Джэрзі (Рачны праезд, д. 9)
• Лос-Анджэлес і Эрвайн, штат Каліфорнія (засн. 17 траўня 1959 г.)
• Чыкага, штат Іліной
• Нью-Гэйвэн, штат Канэктыкут
• Стронгвіл(en), акруга Каяхога(en), штат Агаё (праезд Ўэбстэра, д. 11022)
• Вашынгтон (акруга Калюмбія)
• Маямі-Біч, штат Флорыда^[2]

Асноўныя мэты

• захаваньне і падтрымка беларускай культуры ў ЗША;
• узаемадапамога сяброў арганізацыі;
• інфармаваньне амэрыканскай грамадзкасьці і амэрыканскіх афіцыйных уладаў пра беларусаў у ЗША, пра беларускія культурныя каштоўнасьці, пра гісторыю і сучаснае становішча ў Беларусі;
• падтрымка беларускай нацыянальнай культуры, дэмакратыі й правоў чалавека ў Беларусі.

Старшыні

• Мікола Гарошка (1949—1952)
• Францішак Кушаль (1952—1954)
• Міхась Тулейка (1954—1957)
• Мікола Кунцэвіч (1957—1959)
• Канстанцін Марляк (1959—1963)
• Станіслаў Станкевіч (1963—1965)
• Мікола Гарошка (1965—1967)
• Уладзімер Курыла (1967—1969)
• Вячаслаў Станкевіч (1969—1971)
• Расьціслаў Гарошка (1971—1975)
• Антон Шукелойць (1975—2007)
• Вячаслаў Станкевіч (2007—2011)
• Ганна Сурмач (2011—2017)
• Натальля Федарэнка (2017—)^[3]

Крыніцы

1. Янка Запруднік. Статут БАЗА (Гайлэнд-Парк, 13 лютага 2011 г.) // БАЗА ў Нью-Ёрку, 2015 г. Праверана 14 студзеня 2016 г.
2. Аддзелы // Беларуска-амэрыканскае задзіночаньне, 7 чэрвеня 2015 г. Праверана 14 студзеня 2016 г.
3. ПРА НАС

Вонкавыя спасылкі

• Аддзяленьне ў Паўднёвай Фларыдзе
• Аддзяленьне ў Нью-Ёрку
• Афіцыйная старонка на Фэйсбуку