Мастацкая літаратура (выдавецтва)

«Маста́цкая літарату́ра» — дзяржаўнае кніжнае выдавецтва, якое ажыцьцяўляе выпуск мастацкае літаратуры.

Гэта артыкул пра беларускае выдавецтва. Калі вам патрэбны артыкул пра від мастацтва, глядзіце артыкул Мастацкая літаратура.

Мастацкая літаратура
Тып	Выдавецтва
Заснаваная	6 сакавіка 1972 (52 гады таму)
Заснавальнікі	выдавецтва «Беларусь»
Краіна	Беларусь
Разьмяшчэньне	Менск, пр. Пераможцаў, д. 11, каб. 903
Ключавыя фігуры	Уладзіслаў Мачульскі, Віктар Шніп
Галіна	Выдавецкая
Прадукцыя	Кнігі
Матчына кампанія	Міністэрства інфармацыі Рэспублікі Беларусь
Даччыныя кампаніі	Полымя
www.mastlit.by

Гісторыя

Выдавецтва «Мастацкая літаратура» ўтварылася ў 1972 годзе на аснове рэдакцый мастацкае й дзіцячае літаратуры выдавецтва «Беларусь». Гэта быў час, калі інтэлектуальны й эстэтычны ўзровень грамадзтва патрабаваў выданьня велізарнай колькасьці мастацкае літаратуры розных кірункаў і жанраў, а ў адукацыйных дзяржаўных праграмах было прадугледжана глыбейшае вывучэньне клясыкаў беларускае й сусьветнае літаратуры.

За савецкім часам у выдавецтве існавалі рэдакцыі паэзіі і прозы, збораў твораў, выбраных твораў і перакладнай літаратуры, крытыкі і драматургіі, літаратуры народаў СССР, гісторыка-дакумэнтальных кніг «Памяць». Штогод выдавалася каля двухсот кніг, адрасаваных шырокаму колу чытачоў. Тыраж кніг арыгінальнае паэзіі быў ня менш за тры тысячы, а арыгінальнае прозы — ня менш як шэсьць тысячаў асобнікаў.

Выходзілі сэрыі «Першая кніга паэта» (з 1968), «Першая кніга празаіка» (з 1971), «Паэзія народаў» (з 1971), «Бібліятэка замежнай прозы» (з 1983), «Скарбы сусьветнай літаратуры» (з 1989), «Бібліятэка беларускай класікі» (з 1990).

У выдавецтве выйшлі зборы твораў такіх пісьменьнікаў як Якуб Колас, Кузьма Чорны, Кандрат Крапіва, Аркадзь Куляшоў, Іван Шамякін, Алесь Якімовіч, Янка Брыль, Васіль Быкаў, Іван Мележ, Пімен Панчанка, Іван Навуменка, Максім Гарэцкі, Піліп Пестрак, Пятрусь Глебка, Зьмітрок Бядуля, Алесь Бачыла, Андрэй Макаёнак, Уладзімер Караткевіч, Аляксей Пысін, Іван Пташнікаў, Ніл Гілевіч, Рыгор Барадулін і іншых.

Цяпер выдаюцца сэрыі «Беларуская паэзія ХХ стагоддзя», «Беларуская проза ХХ стагоддзя» (абедзьве з 1998 году), «Беларуская паэзія ХХІ ст.», «Беларуская проза ХХІ ст.».

Дырэктары выдавецтва

• Мікола Ткачоў (1972—1979),
• Міхась Дубянецкі (1979—1986),
• Анатоль Бутэвіч (1986—1987),
• Валерый Грышановіч (1987—1992),
• Серафім Андраюк (1993—1996),
• Георгій Марчук (1996—2002),
• Уладзіслаў Мачульскі (2002—2015),
• Алесь Бадак (з 2015 году).

Галоўныя рэдактары выдавецтва

• Анатоль Кудравец (1972—1974),
• Аркадзь Марцінавіч (1974—1981),
• Серафім Андраюк (1981—1993),
• Мікола Кусянкоў (1993—1996),
• Уладзімер Марук (2002—2003),
• Віктар Праўдзін (2003—2008),
• Віктар Шніп (з 2008 году).

Супрацоўнікі

Спачатку штат супрацоўнікаў выдавецтва налічваў больш за сто чалавек, сорак пяць зь іх зьяўляліся чальцамі Саюзу беларускіх пісьменьнікаў. Сярод іх Алесь Разанаў, Уладзімер Арлоў, Рыгор Барадулін, Барыс Сачанка, Леанід Дранько-Майсюк, Варлен Бечык, Мікола Мятліцкі, Вадзім Спрынчан, Алесь Бачыла, Вера Палтаран, Павал Місько, Алена Васілевіч, Уладзімер Машкоў, Васіль Жуковіч, Вячаслаў Адамчык, Алесь Камароўскі і іншыя.

Літаратура

• Мастацкая літаратура // Беларусь: Энцыклапедычны даведнік. — Мн.: БелЭн, 1995. — С. 467.
• Гісторыя выдавецтва — Афіцыйны сайт выдавецтва «Мастацкая літаратура».

Вонкавыя спасылкі

• Канал выдавецтва на YouTube.
• Кнігі выдавецтва ў сеціўнай краме «Кнігі поштай»
• Кнігі выдавецтва ў сеціўнай краме «Прастора»