Полымя (часопіс)

«По́лымя» — літаратурна-мастацкі і грамадзка-палітычны часопіс. Выдаецца з 20 сьнежня 1922 году ў Менску^[1] штомесяц на беларускай мове. Старэйшае беларускае літаратурна-мастацкае выданьне. Падпісны індэкс выданьня на «Белпошце» — 74985.

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Полымя (неадназначнасьць).

Полымя
Тэматыка	літаратура, мастацтва, грамадзтва
Пэрыядычнасьць	штомесяц
Краіна	Беларусь
Адрас	Менск, вул. Хмяльніцкага, д. 10а
Заснавальнік	Міністэрства інфармацыі Рэспублікі Беларусь
Выдавец	РВУ «Выдавецкі дом „Звязда“»
Галоўны рэдактар	Алена Мальчэўская
Дата заснаваньня	20 сьнежня 1922 (102 гады таму)
Мова	Беларуская
Аб’ём	192 старонкі
Наклад	1567 (чэрвень 2016)
ISSN	0130-8068
Афіцыйны сайт	polymja.lim.by
Полымя ў Вікісховішчы

Гісторыя

Першыя дзесяць гадоў (да 1932) часопісам кіравала рэдакцыйная калегія, у яе ўваходзілі Зьмітрок Бядуля, Цішка Гартны, Міхась Зарэцкі, Усевалад Ігнатоўскі, Янка Купала, Якуб Колас, В. Нодэль, А. Сянкевіч, Міхась Чарот і інш. У 1932—1941 гадах выходзіў пад назвай «Полымя рэвалюцыі». У гады Вялікай айчыннай вайны не выходзіў. Адноўлены ў студзені 1945 году па распараджэньні Савета Міністраў Беларускай ССР.

На старонках часопіса былі ўпершыню апублікаваныя раманы «Людзі на балоце» Івана Мележа, «Птушкі і гнёзды» Янкі Брыля, «Сэрца на далоні» Івана Шамякіна і многія іншыя творы.

Сучаснасьць

Уваходзіць у склад рэдакцыйна-выдавецкай установы "Выдавецкі дом «Звязда».

У часопісе друкуюцца творы беларускіх пісьменьнікаў, пераклады твораў клясыкаў сусьветнай літаратуры і сучасных пісьменьнікаў замежных краінаў, артыкулы па пытаньнях беларускай культуры і мастацтва, гісторыі, краязнаўства, эканомікі, грамадзка-палітычнага і сацыяльнага жыцьця Беларусі, рэцэнзіі.

Галоўныя рэдактары

• Платон Галавач (1932—1933)
• Міхась Лынькоў (1933—1941)
• Пятрусь Броўка (1945—1948)
• Максім Танк (1948—1967)
• Павал Кавалёў (1967—1972)
• Кастусь Кірэенка (1972—1986)
• Сяргей Законьнікаў (1986—2002)
• Мікола Мятліцкі (2002—2014)
• Алесь Бадак (2014—2016)
• Алена Мальчэўская (2016—2021)
• Віктар Шніп (зь ліпеня 2021)

Вокладка

Першую вокладку часопіса намаляваў мастак Міхась Філіповіч.