![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/f/f3/SigmaOrionis.jpg/640px-SigmaOrionis.jpg&w=640&q=50)
Sigma Orionis
From Wikipedia, the free encyclopedia
Sigma Orionis (σ Ori / 48 Orionis)[6] ye un sistema estelar séstuple[7] na constelación d'Orión. La so magnitú aparente conxunta ye +3,66. Representa'l pináculo d'un cúmulu —llamáu Cúmulu de Sigma Orionis—[8] asitiáu a unos 1150 años lluz del Sistema Solar, que de la mesma forma parte de l'Asociación estelar Orión OB1.[9]
La componente dominante del sistema ye una estrella triple, Sigma Orionis Aa, Ab y B. Sigma Orionis Aa y Ab son dos estrelles de gran masa xirando una alredor de la otra con un periodu orbital de namái 143 díes.[7] Sigma Orionis AaAb y Sigma Orionis B, de magnitúes +4,2 y +5,1, tán dixebraes 0,25 segundos d'arcu. Dambes son estrelles azules de la secuencia principal; la más brillosa ye de tipu espectral O9.5 y 32.000 K de temperatura, ente que la so compañera ye de tipu B0.5 y 29.600 K. Ye una de les binaries visuales de mayor masa, con 18 mases solares la estrella más caliente y 13,5 mases solares la so compañera. Separada de Sigma Orionis AaAb por unes 100 UA, el periodu orbital de Sigma Orionis B ye de 157 años.[7]
Les siguientes estrelles tocantes a rellumu son Sigma Orionis D y Sigma Orionis Y. Los dos son estrelles de tipu B2V con una masa de 7 mases solares. El rellumu de dambes ye bien asemeyada —magnitúes +6,62 y +6,65—, pero Sigma Orionis Y estrémase por ser una estrella rica n'heliu. Na so superficie, el heliu paez tar concentráu en manches concretos qu'impliquen una combinación del exa de rotación y de la exa del campu magnéticu estelar.[9]
La sesta estrella, Sigma Orionis C, ye una estrella blanca de la secuencia principal de tipu A2V. D'alcuerdu a la so separación proyeutada —3900 UA— ye la más próxima al par AB. Sigma Orionis D y Sigma Orionis Y atópense, respeutivamente, a 4600 UA y 15.000 UA de la binaria AB.[9]