From Wikipedia, the free encyclopedia
Murzim (β CMa / β Canis Majoris / 2 Canis Majoris),[7] tamién llamada Mirzam o Murzam, ye la cuarta estrella más brillosa de la constelación del Can Mayor, detrás de Siriu (α Canis Majoris), Adhara (ε Canis Majoris) y Wezen (δ Canis Majoris). Alcuéntrase a 500 años lluz de distancia del Sistema Solar.
Murzim, Mirzam o Murzam son nomes que remanecen del árabe مرزم, «l'heraldu», probablemente n'alusión a la so posición precediendo la salida de Siriu pel horizonte.[8] Tamién yera conocida por Al Kalb, «el perru», corriendo delantre de Siriu, un nome d'antiguo usáu nel desiertu.[9] En China yera llamada Kuen She, «el mercáu de los soldaos».[9]
Catalogada como xigante azul de tipu espectral B1II-III,[7] Murzim ye una estrella caliente con una temperatura superficial de 25.800 K. La so lluminosidá ye 34.000 vegaes mayor que la del Sol, y como asocede n'estrelles de los tipos O y B baxos, una parte importante d'esta radiación ye emitida na rexón ultraviola. El so radiu ye 12 vegaes más grande que'l radiu solar y, con una masa en redol a 15 mases solares, Murzim dablemente ye más una subxigante qu'una verdadera xigante, una estrella a puntu de concluyir la fusión nuclear del so hidróxenu internu.[10] La so edá actual envalórase en 14,9 millones d'años.[11] Dada la so elevada masa, el so destín últimu ye terminar españando como supernova.[10]
Murzim ye una estrella variable Beta Cephei, que'l so rellumu bazcuya ente magnitú aparente +1,95 y +2,00 nun periodu de seis hores. Esta variación paez tar rellacionada col final de la fusión del hidróxenu y con cambeos na estructura interna de la estrella. Ye la más brillosa d'esti tipu de variables, polo que a estes estrelles tamién denómase-yos variables Beta Canis Majoris.[10]
Fai 4.356.000 años —nel pliocenu— producióse'l máximu acercamientu de Murzim al Sistema Solar. Distante entós namái 35 años lluz, el so rellumu algamó magnitú aparente -3,78, siendo muncho más brillosa que Siriu (α Canis Majoris) anguaño.[12]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.