From Wikipedia, the free encyclopedia
Mufrid o Muphrid (η Bootis / η Boo / 8 Bootis)[6] ye la tercera estrella más brillosa de la constelación de Boötes dempués d'Arturu (α Bootis) y Izar (ε Bootis). Con magnitú aparente +2,68, nel cielu apaez mui cerca d'Arturu y de fechu dambes tán a una distancia casi idéntica de la Tierra —37 años lluz—, tando dixebraes namái 3,24 años lluz ente sigo.
L'orixe del nome de Mufrid ye inciertu. Paez que orixinariamente foi utilizáu pa designar a Arturu y darréu sirvió pa nomar otres estrelles de la so redolada.[7]La estrella apaez citada nel sieglu XV pol astrónomu Ulugh Beg como Al Mufrid al Ramih, «la estrella solitaria del llanceru».[8]
Otru nome que recibe la estrella ye Saak, del árabe Al-Sak, «el güesu de la espinía»; sicasí, na figura actual de la constelación, Mufrid apaez asitiada enriba de la rodía esquierda. En astronomía china, xunto a υ Bootis y τ Bootis, constituyía Yew She Ti, l'oficial asitiáu a la derecha del emperador.[8]
Mufrid ye una estrella subxigante mariella de tipu espectral G0IV y 6100 K de temperatura superficial, daqué más caliente que'l Sol. Ye una estrella que remató la fusión d'hidróxenu nel so nucleu y ta abandonando la secuencia principal nel so camín pa convertise nuna xigante colorada. La so lluminosidá ye 9 vegaes mayor que la del Sol, con un radiu 2,7 vegaes más grande que'l radiu solar. Destaca pola so alta metalicidá —conteníu n'elementos más pesaos que'l heliu—, el doble que la solar.[7] Más nuevu que'l Sol, tien una edá entendida ente 2400 y los 2700 millones d'años.[9][10]
Mufrid paez ser una estrella binaria espectroscópica con un periodu orbital de 1,355 años; la escentricidá de la órbita (ε = 0,26) fadría que la separación ente los dos componentes bazcuyara ente 0,03 y 0,52 UA, tando inclináu'l planu orbital 157º al respective de la Tierra.[11] Sicasí, la so naturaleza binaria nun pudo ser confirmada por interferometría de moteáu. La estrella acompañante pue ser una nana colorada, y nesi casu sería de tipu M7 o posterior,[12] o bien una nana blanca.[7]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
