Llingües d'Arxentina
From Wikipedia, the free encyclopedia
L'usu del idioma español ye predominante, entendíu y faláu como primer o segunda llingua por casi tola población de la República Arxentina, que según les últimes estimaciones supera los 40 millones.[1]
L'inglés ye la segunda llingua más conocida nel país, y la so enseñanza ye obligatoria dende la escuela primaria en delles provincies. Arxentina ye l'únicu país llatinoamericanu calificáu como país de "alta aptitú" nel inglés, allugándose nel puestu 15 a nivel mundial nel añu 2015, según un informe del Índiz d'Aptitú n'Inglés (EF EPI).[2][3] Pa 2017, Arxentina baxó diez puestos con al respective de la so meyor posición y allugóse nel puestu 25, anque entá sigue siendo'l país con meyor inglés d'Iberoamérica.[4] L'inglés ye, amás, la llingua que s'usa pola mayoría de los habitantes de les islles so control del Reinu Xuníu que p'Arxentina constitúin el departamento Islles del Atlánticu Sur de la provincia de Tierra del Fueu, Antártida ya Islles del Atlánticu Sur.
El guaraní y el quechua son otres llingües importantes con más d'un millón de falantes cada unu (en 2015).[ensin referencies]
Esisten unes 25 llingües[ensin referencies] indoamericanas vives y esistieron delles (güei estinguíes) en diverses rexones. Les llingües indoamericanas vernácules (natives del territoriu arxentín) vives son falaes por bien poques persones. Per otra parte, el lunfardo que ye una xíriga y xíriga tipu pidgin con predominiu de pallabres aniciaes en llingües italianes como'l piamontés, ligur o «zeneise», calabrés, sicilianu, lombardu, etc., faláu na Zona Nucleu d'Arxentina dende siquier 1880. Per otra parte el portuñol ye un pidgin de portugués brasilanu y español faláu dende aproximao 1960 nes zones d'Arxentina fronterices con Brasil.
Otra llingua nativa ye la llingua de señes arxentina (LSA), llingua señalada poles comunidaes sordes que surde claramente a partir de 1885 ya influencia a munches otres llingües de señes de países estremeros.
Ente los falantes de llingües non vernácules atópense (amás de los más de 40 millones d'arxentinos que falen l'español (principalmente'l español rioplatense como llingua materna, llingua coloquial y llingua vehicular); los del italianu (alredor de 500.000 persones).[5] Per otra parte los desconocedores d'antropoloxía y llingüística suelen bien equivocadamente incluyir como «llingües vernácules» al guaraní (impuestu pola invasión de los avá procedentes de l'Amazonia escontra'l sieglu XV y arrobináu polos misioneros europeos xesuites no que güei ye'l NEA como llingua vehicular ente diverses etnies que nada teníen de llinaxes avá o «guaraníes»); daqué similar asocedió nel NOA col quechua y l'aimara impuestos tres la invasión inca procedente del sureste peruanu y lo que güei ye'l norte del Collao o Altiplanu bolivianu nel NOA y l'estremu noroeste del Cuyo nel sieglu XV y depués entá más espublizáu polos misioneros xesuites y franciscanos como llingua vehicular pa la catequesis a partir de la Conquista española nel sieglu XVI y que, anguaño tres la migración asocedida dende Bolivia y de Perú a partir de la segunda metá de la década de los 1990.
Depués de les antecitadas llingües ya idiomes sígen-y l'alemán (cerca de 400.000, incluyendo un númberu significativu de falantes del dialeutu alemán del Volga y del plautdietsch). Los idiomes árabe, francés, portugués, rusu, euskera, gallegu, catalán, asturianu, yidish oriental, chinu (unos 100 000 falantes, principalmente de los dialeutos de Fujian y de Taiwán), coreanu, xaponés (alredor de 50 000, na so mayoría falantes d'okinawense),[ensin referencies] rumanu, occitanu, lituanu, letón, estoniu, ucranianu, bielorrusu, croata, eslovenu, checu, eslovacu, finés, suecu, danés, noruegu, islandés, irlandés, neerlandés, polacu, húngaru, serbiu, bosniu, albanés, griegu, macedoniu, búlgaru, hebréu, turcu, armeniu, romanín vlax (llingua de los roma, llamaos vulgarmente «xitanos») tamién son importantes.