From Wikipedia, the free encyclopedia
Gamma Arae (γ Ara / HD 157246 / HR 6462) ye una estrella na constelación d'Ara, l'altar, de magnitú aparente +3,34. Anque comparte movimientu propiu y velocidá radial con β Arae,[7] midíes precises de distancia feches pol satélite Hipparcos demostraron que Beta Arae ta cuasi a la metá de distancia que Gamma Arae. Ésta última alcuéntrase a 1140 años lluz de distancia del Sistema Solar.
Gamma Arae ye una superxigante azul caliente de tipu espectral B1Ib[8] con una temperatura superficial de 20.400 K y una lluminosidá 32.600 vegaes más que la lluminosidá solar. Estos parámetros dexen envalorar una masa 12 vegaes mayor que la del Sol y un radiu 14,5 vegaes más grande que'l radiu solar. La estrella acaba d'abandonar la secuencia principal y ta evolucionando escontra una superxigante colorada asemeyada a Betelgeuse (α Orionis). Ye notable la so elevada velocidá de rotación, de siquier 280 km/s, inusitadamente alta pa una estrella superxigante; dáu'l so tamañu, el periodu de rotación ye inferior a dos díes y mediu. Consecuencia de la so gran masa ye que dientro d'unos 16 millones d'años va españar como una supernova.[9]
Gamma Arae tien dos posibles compañeres a 18 y 42 segundos d'arcu.[10] Anque la más alloñada paez nun tener una rellación real con Gamma Arae, la más próxima, de magnitú 10,3, paez formar un verdaderu sistema binariu con ella. Ye una estrella blanca de la secuencia principal de tipu A7 asemeyada a Altair (α Aquilae) o θ Cassiopeiae, dixebrada unes 6200 UA de Gamma Arae y con un periodu orbital de siquier 135.000 años.[9]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.