![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/d/dc/Musca_IAU.svg/langast-640px-Musca_IAU.svg.png&w=640&q=50)
Alfa Muscae
From Wikipedia, the free encyclopedia
Alfa Muscae (α Mus / HD 109668 / HR 4798)[6][7] ye la estrella más brillosa na constelación de Musca, la mosca, con magnitú aparente +2,69. Al ser circumpolar al polu sur celeste nun tien nome propiu habitual, magar dacuando recibe'l nome de Myia, «mosca» en griegu. Alcuéntrase a 306 años lluz de distancia del Sistema Solar.
Alfa Muscae ye una estrella blancu-azulada de tipu espectral B2IV-V, clasificada como subxigante o como estrella de la secuencia principal. Estrella caliente de 21.900 K de temperatura, la so lluminosidá, considerando la radiación ultravioleta non visible emitida, ye 4250 vegaes mayor que'l Sol. El so radiu ye de 4,7 radios solares y la so masa de 8 mases solares; éstos parámetros indiquen que realmente s'atopa na secuencia principal y que nun llegó entá a la etapa de subxigante.[8]
Alfa Muscae ye una variable Beta Cephei, tipu de variable pulsante que los sos representantes más conocíos son Alfirk (β Cephei) y Murzim (β Canis Majoris). El so rellumu varia 0,05 magnitúes nun periodu de 0,09 díes.[8]
Una estrella que ta asitiada visualmente a 29,6 segundos d'arcu d'Alfa Muscae nun ye una compañera real y forma una binaria óptica con ella.[8]