المماليك المصرليه
From Wikipedia, the free encyclopedia
المماليك المصرليه او المصرليه او المصريين او مماليك العصر العثمانلى هما المماليك اللى كانو فى مصر بعد نهاية الدوله المملوكيه سنة 1517 ، فى فترة احتلال العثمانيين لمصر و كانو موجودين وقت الحمله الفرنسيه و فى عهد محمد على باشا. اتعرفوا باسم " المصرليه " ( مفرد : مصرلى )
الدوله المملوكيه حكمت مصر من سنه 1250 لسنه 1517. المؤرخين بيعتبرو شجر الدر ارملة السلطان الايوبى الصالح أيوب اول سلاطين الدوله المملوكيه و فيه بيعتبروها نقطة وصل بين الدوله الايوبيه و الدوله المملوكيه و عز الدين ايبك اللى اتجوزته و اتسلطان كان اول السلاطين المماليك. اتقسمت الدوله المملوكيه على حقبتين الاولى المماليك البحريه و التانيه المماليك البرجيه. اشهر سلاطين البحريه كانو قطز و الظاهر بيبرس و المنصور قلاوون و ولاده الأشرف خليل و الناصر محمد بن قلاوون. دولة المماليك البرجيه بدإت بالسلطان الظاهر برقوق اللى بيعتبر اشهر سلاطينها هوه و السلطان الأشرف برسباى.
المماليك اصحاب الدوله المملوكيه فى مصر ما كانوش من تركيا الحاليه اللى ما كانتش موجوده وقت تأسيس الدوله المملوكيه فى مصر سنه 1250 ، و مالهمش علاقه بيها. لفظ " ترك " كان بيطلق على شعوب كتيره و لحد الشركس و المغول كانو بيتسموا " ترك " كمضاد لكلمة " فرنج " اللى كانت بتطلق على الاوروبيين. اتراك الاناضول اللى قامت دولتهم على انقاض الدوله البيزنطيه فى المنطقه اللى اسمها تركيا دلوقتى و اللى كونوا الدوله العثمانيه كانو بيتسموا " الروم".
من جهه تانيه المطلحات الإداريه و العسكريه اللى دخلها المماليك مصر لتطوير النظم ما كانتش تركيه لكن مغوليه و فارسيه بسبب اتصالهم بمغول فارس عن طريق الحروب و المعاملات.