From Wikipedia, the free encyclopedia
الملك الصالح نجم الدين أيوب بن الملك الكامل محمد بن العادل ابي بكر بن أيوب اتلقب بـ ابو الفتوح، [1] (اتولد فى القاهره سنة 1205 - اتوفى فى المنصورة فى 22 نوفمبر 1249). سابع سلاطين الايوبيه فى مصر، [2] حكم من 1240 لغاية 1249. بيعتبره المؤرخين من أحسن الملوك الايوبيين. و هوه اللى اسس المماليك البحريه فى مصر، ودخل فى صراعات مع الملوك الأيوبيين فى الشام. فى اخر سنه من حكمه اتعرضت مصر لحمله صليبيه ضخمة اتعرفت باسم الحمله الصليبيه السابعه و كان بيقودها لويس التاسع ملك فرنسا اللى اتعرف بعد كده بسانت لويس (Saint Louis). الصالح أيوب اتوفى و الفرنج محتليين دمياط لكن أرملته شجر الدر خبت خبر وفاته و اتحملت عبء الدفاع عن مصر.
الصالح ايوب هوه حاكم مصر رقم 397 |
---|
| ||||
---|---|---|---|---|
معلومات شخصيه | ||||
الميلاد | 5 نوفمبر 1205 | |||
الوفاة | 22 نوفمبر 1249 (44 سنة) | |||
سبب الوفاة | سل | |||
مواطنه | ![]() | |||
الزوجة | شجر الدر | |||
ابناء | توران شاه | |||
الاب | الكامل محمد ابن العادل | |||
اخوه و اخوات | ||||
عيله | الايوبيين | |||
معلومات تانيه | ||||
المهنه | سياسى | |||
الخدمة العسكرية | ||||
المعارك والحروب | الحمله الصليبيه السابعه | |||
تعديل مصدري - تعديل ![]() |
الصالح أيوب كان ابن السلطان الأيوبي الملك الكامل، امه كات جارية سودة اسمها " ورد المنى " [3][4]، وكان اخو السلطان العادل سيف الدين ابي بكر وحفيد للسلطان الملك العادل اخو السلطان صلاح الدين الأيوبى. أبوه الملك الكامل كان استقل بمصر سنه1218.
قبل ما يتوفى جده الملك العادل كان قسم مملكته على ولاده، و ادى مصر للملك الكامل .[5][6] الملك الكامل ده هوه اللى كمل بنا قلعة الجبل اللى جده صلاح الدين الأيوبي كان بدا يشيدها فوق جبل المقطم، الكامل كان اول واحد يسكنها من ملوك مصر، وفيها اتولد الصالح أيوب سنه 1205[2][7][8][9]
فى سنه 1218 لما كان الصالح أيوب عيل صغير عنده بتاع اتناشر سنه، اتعرضت مصر لحمله صليبيه بيقودها " جان دي بريين " ملك بيت المقدس (الحملة الصليبية الخامسة). و ده كان تطور خطير فى الحروب الصليبية، لان مصر من ساعتها بقت هدف للصليبيين اللى فهموا ان مصر بامكانياتها البشريه والاقتصاديه الضخمه حصن جامد ومصدر كبير لامدادات العسكر والسلاح، فاذا استولوا عليها يبقى سهل عليهم انهم يستولوا على بيت المقدس و أخد الشام .[10][11]
اتجمعت جيوش ممالك اوروبا فى عكا ومنها طلعت على مصر ونزلت على البر الغربي بتاع دمياط، وخرج الملك الكامل ، ابو الصالح أيوب، بالجيش على دمياط عشان يحاربهم . لكن القوات الصليبية قدرت انها تستولي على برج دمياط، ولما سمع السلطان العادل ( ابو الملك الكامل وجد الصالح أيوب ) باللي حصل ، وكان ساعتها قاعد فى برج الصفر فى الشام، ضرب صدر بايده من الحزن و الغم، وعيي فيها ومات بعد كام يوم . بموت العادل مصر بقت للملك الكامل محمد ووقع عليه عبء الدفاع عن مصر. بعد حصار قعد بتاع ست تشهر دمياط وقعت فى ايد الصليبيين فقتلوا سكانها وحولوا جامعها لكنيسة .[12] لكن لما حاول الصليبيين انهم يتوغلوا جوه الاراضي المصرية حاصرهم المصريين من كل الجهات لغاية ما غلبوهم و خلوهم يستسلموا و يطلبوا الامان مقابل انهم يسيبوا دمياط.[13][14] دمياط اتسلمت للمصريين فى 8 سبتمبر 1221، ودخلها الملك الكامل على رأس أخواته وقواده وعساكره، و اتعملت هدنه مدتها تمن سنين بين مصر والصليبيين [15][16]
فى سنه 1228 طلع فريدريك التانى امبراطور الامبراطورية الرومانيه المقدسه على راس حمله صليبيه صغيرة بتتكون من 600 فارس بس - و ده بيبين انه ما كانش ناوي يحارب بجد - ونزل عكا (الحملة الصليبية السادسة)، فبعت ليه الملك الكامل رسوله " فخر الدين يوسف بن الشيخ " عشان يتفاوض معاه .[17][18]
فى 18 فبراير 1229 اتوقعت معاهدة سلام مدتها عشر سنين بين الملك الكامل و فريدريك، بتقضي بتسليم بيت المقدس وبيت لحم والناصرة لفردريك بشرط ان الصليبيين فى بيت المقدس ما يبنوش حصون و لا قلاع، وأن منطقة الجامع الأقصى تبقى فى ايد المسلمين، وان فردريك يتعهد بمحالفة الملك الكامل ضد كل مناوئيه لحد لو كانو صليبيين، وان فردريك يضمن منع وصول اى امدادات صليبيه للامارتين الصليبيتين أنطاكية و طرابلس.[19] وفي 17 مارس 1229 دخل فردريك التاني بيت المقدس فى حماية قواته الألمانيه و الايطاليه، وسلمه " شمس الدين " قاضي نابلس مفتاح المدينة بالنيابه عن السلطان الكامل .[20] و هاج المسلمين و الصليبيين. وراح الواعظ والمؤرخ "سبط بن الجوزي" يشهر بالملك الكامل فى دمشق، ورفض الصليبيين التعاون مع فردريك باعتباره مسالم للمسلمين، و خارج عن الكنيسه الكاتوليكيه ومحروم منها عن طريق جريجوري التاسع بابا الكنيسه الكاثوليكيه [19][21]
والأحداث دي بتحصل فى مصر كان المغول بيتقدموا لحدود بلاد الشرق .[22][23]، وبقدوم سنه 1228 كانو دخلوا اراضي الدوله الخوارزميه و بيتقاتلوا مع جيش " جلال الدين خوارزمشاه "، بتحريض من الخليفة العباسى فى بغداد " ابو العباس احمد الناصر لدين الله " اللى استعان بالمغول ضد السلطان خوارزمشاه وأغراهم بيه، [24][25] و فضلت المعارك دايره بين المغول و الخوارزميه لغاية ما اتغلب جلال الدين بالكامل سنه 1230 و اتقتل وانتهت دولته. واتشتت الخوارزميه و اتفرقوا [26] واتحول عساكرهم اللى اتشردوا لمرتزقه بيعرضوا خدماتهم على ملوك المنطقة المجاوره [27] واتفتحت الجبهة الشرقيه على اخرها قدام جحافل المغول اللى ما بقاش فاضلهم الا دخول بغداد اللى اصل جابتهم و استعانت بيهم ضد جيرانها.
فى سنه 1235 طلع السلطان الكامل ومعاه أخوه الملك الأشرف موسى ملك دمشق على الشرق وغلبوا الروم واستولوا على حران و السويداء و الرها و قطينا، و بعد كده رجع الكامل على مصر و ادى كل بلاد الشرق لابنه الملك الصالح نجم الدين أيوب، فزعل الأشرف اللى كتب للكامل يقوله : " أخدت الشرق مني و اديته لابنك. و أنا افتقرت. وايه دمشق دي الا بستان؟ وماليش فيها رزق ". فبعت ليه الكامل عشرت الاف دينار، لكن الاشرف زعل و رده ليه الفلوس و قاله : " أنا أدي ده لأمير عندي ". واتفق الأشرف مع ملوك حماة وحلب وغيرها على الانتقام من السلطان الكامل. لكن الأشرف مات بعدها بشويه، واتملك أخوه الملك الصالح عماد الدين اسماعيل دمشق، فساب السلطان الكامل ابنه الملك العادل نايب عنه فى مصر و طلع بالجيش المصري على سوريا وحاصر دمشق ودخلها، و بعدين اتوفى...[28] و الأحداث دي شغاله شن المغول اول هجوم ليهم على بغداد سنه 1237 بس ما قدروش يستولوا عليها [29]
اتوفى السلطان الكامل و ساب ابنه العادل فى مصر وابنه الصالح أيوب فى بلاد الشرق. وكان الصالح أيوب وقت وفاة أبوه بيحاصر قلعة الرحبة بمساعدة الخوارزميه، بعد ما كان استولى على سنجار ونصيبين والخابور، وكات الرحبه دي تابعه للملك المجاهد أسد الدين شيركوه ملك حمص، فلما عرف الخوارزميه ان أبوه السلطان الكامل اتوفى طمعوا فى الرحبه و قالوا ياخدوها لنفسهم فطلعوا عن طاعته، و كلنوا عايزين يقبضوا عليه، بس قدر يهرب منهم على سنجار، فطلع ليه هناك الملك الرحيم بدر الدين لؤلؤ ملك الموصل و حاصره و كان عايز يقبض عليه و ينقله على بغداد فى قفص حديد اكمنه كان بيكرهه جداً، لكن الصالح أيوب بعت لابنه المغيث فتح الدين اللى كان هوه كمان هرب من الخوارزميه على حران، و قاله انه لازم يحاول يستميل الخوارزميه و يجيبهم سنجار. ونجح المغيث و قاضي سنجار بدر الدين انهم يقنعوا الخوارزميه بعد ما أكدوا ليهم أن الصالح أيوب حايديهم سنجار وحران والرها، فراحوا معاهم على سنجار و هرب بدر الدين لؤلؤ بعسكر الموصل. برجوع الخوارزمية قويت شوكة الصالح أيوب و بعتهم على آمد عشان يساعدوا ابنه المعظم غياث الدين توران شاه اللى كان السلطان كيخسرو ملك الروم محاصره هناك. ونجح الخوارزمية فى تشتيت الروم عن آمد واتنقل الصالح أيوب من سنجار لحصن كيفا .[30][31]