From Wikipedia, the free encyclopedia
Dr Sümbolismus bezäichnet e Kunstströömig in dr Moolerei und dr Bildhauerei am Ändi vom 19. Joorhundert, si Hoochfaase isch in dr Zit zwüsche öbbe 1880 und 1910 gsi.
En entschäidende Impuls het s „Sümbolistische Manifest“[1] vom franzöösische Dichder Jean Moréas im Joor 1886 gee. E Kärnsatz in däm Manifest goot eso: »Die wäsentligi Äigeschaft vo dr sümbolistische Kunst bestoot din, ass e Idee nie begrifflig fixiert oder diräkt usgsproche wird«. Dr Sümbolismus isch 1889 bi dr Wältustellig z Bariis ere bräite Öffentlikäit bekannt gmacht worde und het sich denn vo Frankriich us über ganz Öiropa usbräitet.
In dr Epoche vom Realismus (Hauptverdräter: Gustave Courbet), wo grad vorhär cho isch, het eme Hufe Künstler die seelischi Diefi gfeelt, won e Kunstwärk müess usdrucke. Dr Sümbolismus isch gege die niidrigi Dröiji im Detäi vom Naturalismus gsi und au gege die verkläärti Schwärmerei vo dr Romantik. Er het d Wält und deren iiri Aspäkt nume als Sümbool von ere diefere Wirkligkäit gsee, und d Kunst as Vermiddlere zwüsche deene Ebene.
E Schbiilart vom Sümbolismus isch d Décadence, wo brobiert het, dr Verfall und Undergang von ere Epoche künstlerisch z begläite und iir Häil in ere überspitzte Sinneslust het welle finde.
Dr Sümbolismus het e Hufe Paralleele zum Jugendstil. Bäidi gälte zämme als Bindegliid zwüschen em Impressionismus vorhär und em Expressionismus nochhär. Usserdäm wärde d Sümboliste au as Vorlöifer vo de Surrealiste bezäichnet.
In de Wärk vom Sümbolismus git s bsundrigi Motiv us dr antike Müthologii und biblischi Allegorie. E Hufe Bilder stelle Dröüm und Ekstaase dar, ufgwüelti Gfüül, Unerkläärligs, Chranket, Dood, Sünd und Liideschaft und zäige gäistigi Wirklikäit, Fantasii, Visioon, Halluzinazioon, Meditazioon und Empfindig.
D Sümboliste häi s "Räine, Edle und Erhabene" im Sinn vo de Preraffaelite verherrligt, aber au die "dunkli Site" um d Themekomplex Sünd, Gschlächt, Dood und Düüfel. Motiiv in dr erste Richdig si Ängel, Hirtenidüll, religiöösi Motiiv, und "räini und köischi" Frauegstalte, mäistens in lange, wisse Gwänder.[2] Typischi Verdräter si z. B. dr Pierre Puvis de Chavannes, Maurice Denis, oder Michail Wassiljewitsch Nesterow und dr Michail Alexandrowitsch Wrubel.
|
|
|
Seamless Wikipedia browsing. On steroids.
