From Wikipedia, the free encyclopedia
As Migrazioon wird e rüümligi Veränderig vom Lääbensmiddelpunkt vo äinere oder meerere Persoone verstande, wenn die e lengeri Zit duurt. Migrazioon, wo über Landesgränze äwäg goot, wird as internazionaali Migrazioon bezäichnet. D Migrazioon wird vo meerere wüsseschaftlige Diszipline undersuecht, drunder de Gsellschaftswüsseschafte, dr Rächts- und dr Wirtschaftswüsseschaft. Vo doo chunnt s ass spezielli Perspektiive und Differenzierige vom Begriff git, sodass es in dr Fachliddratuur kä äihäitligi Definizioon git.
Migrazioon isch e Fenomeen wo dur die ganzi Gschicht vo dr Menschhäit bassiert isch und die ganzi Wält iibezooge het. D Motiiv für e duurhafte Ortswäggsel si d Ussicht uf besseri Mööglikäite sich nöime niiderzloo und s Lääbe chönne verdiene, Zuefluchtsort bi Natuurkatastroofe oder – nöijerdings – wäge dr globaale Erwermig chönne finde, Sicherhäit für Liib und Lääbe noch ere Flucht oder Verdriibig as Folg vo Chrieg und Schutz vor Diskriminierig und persöönliger Verfolgig us rassistische, religiööse bzw. wältaaschaulige Gründ chänne sueche oder au wäge andere Iischränkige vo dr persöönlige Freihäit am Härkunftsort. Witeri Gründ findet mä zum Bispil bi dr Altersmigrazioon, Bildigsmigrazioon, Hürootsmigrazioon und Remigrazioon. Mä underschäidet zwüsche dr Migrazioon zwüsche zwäi Staate und dr Binnemigrazioon innerhalb vom ene Staat, zwüsche dr Brimäärmigrazioon, also dr erstmoolige Uswanderig und dr Sekundäärmigrazioon, ere zwäite Uswanderig. In dr internazionaale Flüchtlingsforschig und im internazionaale Flüchtlingsrächt underschäidet mä zwüsche dr Migrazioon dr Flucht, wil noch dere Definizioon e Flüchtling zwunge isch, si Woonort z verloo, e Migrant das aber freiwillig wurd due.[1]
Wäge de Wältchrieg im 20. Joorhundert, dr regionale Instabilidäät, dr Globalisierig, dr Digitaale Revoluzioon und dr Ärderwermig wird was in Sache Migrazioon bassiert komplexer. D Gsellschafte und die politische Aktöör uf dr ganze Wält stöön vor nöije Uusefordrige, wie mä d Migrazioon chönnt stüüre und wie d Iiwanderer chönne integriert wärde.
Im Joor 2017 häi 257,7 Millioone Mensche in Staate gläbt, wo si nit uf d Wält choo si. D Staate mit dr höggste Zaal vo Migrante si 2017 die Veräinigte Staate mit 49,8 Millioone Migrante gsi, Saudi-Arabie und Dütschland mit 12,2 Millioone Migrante und Russland mit 11,7 Millioone. D Staate mit dr grösste Zaal vo Uswanderer im Joor 2017 si Indie (16,6 Millioone), Mexiko (13 Millioone), Russland (10,6 Millioone), China (10,0 Millioone) und Bangladesh (7,5 Millioone) gsi.[7]
D Dabälle zäigt für d Joor 2000 und 2015 dr Däil vo de Migrante (do definiert as alli Mensche, wo im ene Land lääbe, wo si nid uf d Wält choo si.[8]) an der Wältbevölkerig.
Sit 1960 isch dr Däil vo de Migrante an dr Wältbevölkerig noch em Mathias Czaika und Hein de Haas öbbe gliich grooss bliibe: 3,06 % (1960), 2,86 % (1970), 2,70 % (1980), 2,67 % (1990), 2,73 % (2000).[9]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
