Anke Rehlinger
dytschi Bolitikeri From Wikipedia, the free encyclopedia
dytschi Bolitikeri From Wikipedia, the free encyclopedia
D Anke Gabriele Rehlinger (* 6. April 1976 z Wadern as Anke Gabriele Moos[1]) isch e dytschi Bolitikeri (SPD) un syt em 25. April 2022 Minischterbresidänti vum Saarland.
Vorhär isch si dert ab Jänner 2014 stellverdrättendi Minischterbresidänti un Landesminischteri fir Wirtschaft, Arbet, Energy un Verchehr in dr Kabinett Kramp-Karrenbauer II, III un Hans gsii. Vu 2012 bis 2014 isch si saarländischi Minischteri fir Juschtiz un au Minischteri fir Umwält un Verbruucherschutz im Kabinett Kramp-Karrenbauer II gsii.
Syt em 10. Merz 2018 isch d Rehlinger Vorsitzeri vu dr Saar SPD.[2] Em Landdag vum Saarland ghert si syter 2004 aa. Si isch Spitzekandidati vu ire Bartei bi dr saarländische Landdagswahle 2017 un 2022 gsii un isch mit dr SPD Saar 2022 mit 43,5 Brozänt vu dr Stimme uf e absolut Mee vu dr Sitz im Landdag chuu. Druf het si im April 2022 e SPD-Ellairegierig bildet.
No dr Grundschuel z Nunkirchen isch si uf s Peter-Wust-Gimnasium z Merzig gange un het dert anne 1995 s Abitur gmacht. Dereno het si an dr Uniwersitet vum Saarland Rächtswisseschafte studiert un dert 2000 mit em erschte Staatsexame abgschlosse. Noch eme Ergänzigsstudium an dr Dytsche Hochschuel fir Verwaltigswisseschafte z Speyer het si vu 2001 bis 2003 ire juristische Vorberaitigsdienscht absolviert un s zwait Staatsexame gmacht.
In dr Johr 2003/2004 het d Rehlinger e Fachaawaltslehrgang fir Styyrräächt gmacht. In däne Johr het si as freie Mitarbaiteri in ere Räächtsaawaltskanzlei gschafft. Anne 2005 isch si as Räächtdaawälti zuegloo woore un isch syt 2006 Partneri in ere Chanzleigmainschaft z Losheim am See, aktuäll losst si die Arbet rueje.
Anne 1998 isch d Rehlinger in d SPD yydrätte. Z Merzig-Wadern isch si vu 2002 bis 2010 Chraisvorsitzeri vu dr Arbetsgmainschaft vu dr Fraue in dr SPD gsii un syt 2006 isch si Chraisvorsitzeri vu ire Bartei. Derzue isch si vu 2005 bis 2010 Vorsitzeri vum SPD-Stadtverband Wadern gsii. Vu 2003 bis 2007 isch si au stellverdrättendi Juso-Landesvorsitzeri gsii.
Anne 2013 isch s zur stellverdrättende Landesvorsitzeri vu dr SPD Saarland gwehlt wore.
Am 18. Juni 2016 isch si vum SPD-Landesbarteidag mit 99 Brozänt vu dr Delegiertestimme zur Spitzekandidati fir d Landdagswahl im Saarland am 26. Merz 2017 gwehlt wore.
Dr Bundesbarteidag het si am 8. Dezämber 2017 as Bysitzeri in SPD-Barteivorstand gwehlt,[3] syt em 6. Dezämber 2019 isch d Rehlinger stellverdrättendi Bundesvorsitzeri.[4]
Am 9. Merz 2018 isch si uf em Landesbarteidag z Dillingen mit 94,5 Brozänt vu dr giltige Stimme zur Landesvorsitzeri vu dr SPD Saarland gwehlt wore.[5]
Am 12. Novämber 2021 isch d Rehlinger wider zur SPD-Spitzekandidati fir di saarländisch Landdagswahl am 27. Merz 2022 gwehlt wore.[6]
Im Ortsroot Nunkirchen isch si 2000 bis 2012 Mitgliid gsii, im Stadtroot Wadern vu 2004 bis 2012. Em Landdaag vum Saarland ghert d Rehlinger syt dr dryzeete Legislaturperiod (2004) aa. Vu 2008 bis 2009 isch si Vorsitzeri vum Uusschuss fir Europafrooge un Frooge vum Interregionale Barlemäntarierroot gsii un vu 2009 bis 2011 Vorsitzeri vum Uusschuss fir Bildig, Kultur un Medie. Derzue het si vu 2010 bis 2011 dr Untersuechigsuusschuss Grube Reden glaitet. Vu April 2011 bis Mai 2012 isch d Rehlinger stellverdrättendi Vorsitzeri vu dr SPD-Landdaagsfrakzion im Saarland gsii.
In dr Landdaagssitzig vum 9. Mai 2012 isch si zur Minischteri vu dr Juschtiz un zur Minischteri fir Umwält un Verbruucherschutz ernännt woore. Am 15. Jänner 2014 isch si as Noofolgeri vum Heiko Maas, wu Bundesjuschtizminischter woren isch, Minischteri fir Wirtschaft, Arbet, Energy un Verchehr woore. Dermit verbunde isch au iri Ernännig zur stellverdrättende Minischterbresidänti gsii.[2]
D Rehlingerisch Spitzekandidati vu dr Saar SPD bi dr Landdaagswahl 2022 gsii, wu d SPD mit 43,5 Brozänt vu dr Stimme as sterkschti Chraft fiirigangen isch un noch em ändgiltige Ergebnis mit 29 vu 51 Mandat s absolut Mee im Landdaag iberchuu het. Am 25. April het si dr Landdaag mit 32 vu 51 Stimme zur Minischterbresidänti gwehlt.[7]
D Anke Rehlinger isch remisch-kadolisch, ghyrote un Mueter vun eme Suhn.[8] Aafangs 2022 het si si vu ihrem Mann drännt.[9][10]
Bis zum Änd vu irem Jura-Studium anne 2000 het d Rehlinger aktiv Lychtathletik dribe, aafangs Meekampf, speter vor allem Wurfdiszipline, un het do au d Landesmaischterschaft chenne gwinne. Si haltet allno dr saarländisch Rekord im Chugelstoße (16,03 m, 17. Augschte 1996, Rehlingen) un au dr Jugedrekord vum Land im Diskuswurf (49,18 m, 23. Septämber 1995, Rehlingen).