en Fluss uf de Gränze zwüsched Öschtriich und de Schwiz From Wikipedia, the free encyclopedia
Dr Alt Rhy isch es Gwässer a dr Landesgränze zwüsche dr Schwiiz und Öschtrych. Es isch en 11,6 Kilometer längen Abschnidd vom alte Flussbett vom Rhy, wo bi Sammargreete afoot und bim Dorf Alterhy in Bodesee flüsst.
Bi dr Internazionaale Rhyregulierig isch im nördleche Deil vom Sanggaller Rhintel am Ändi vom 19. Joorhundert füre Alperhy vo Sammargreete us näbem Dorf Fuasche verby e breite Kanaal grabe worde, ass s Wasser gschnäller in See use chan flüsse und s zu weniger Überschwemige sell cho. Das isch dr Fuascher Durchstich.
Sider flüsst kei Wasser me diräkt us em Rhy in Alt Rhy, sondern nume no s Wasser, wo sech im Rhintel hinder de Sytedämm vom Rhy im nöi boute Binnekanal und a dr Oberflechi us em Yzugsgebiet vo de Apezäller Bärge südlech vo Rhyneck samlet. Die lengschte Bech, wo in Alt Rhy mündet, sind dr Gstaaldebach und dr Kluusbach.
Am Alte Rhy sind im Rhydelta grossi Naturschutzpiet entstande.
E chli witer oben am Rhy, zwüsche Widnau und Diepoldsau, isch de Rhy ebefalls begradigt wore und es isch döt wäg em Diepoldsauer Durchstich au en Alte Rhy öbrig blebe. Da Stuck wörd aber nöd zu däm Fluss dezue zellt, wo i däm Artikel beschrebe wörd. Hingege chömed zu de oben erwähnte knapp 12 Kilometer no die 23 Kilometer vom Rhyntaler Binnekanal dezue – sus wörs nöd lange, as de Fluss i d Lischte vo de lange Schwizer Flüss chunnt.