Alain Berset

De Alain Berset (* 9. April 1972 z Fryburg im Üechtland; heimatberechtigt z Misery-Courtion) isch en Schwiizer Politiker (SP). Er isch am 14. Dezämber 2011 in de Bundesrot gwählt worde. Im 2017 isch er s erscht Mol Vizepräsident und drufabe 2018 Bundespresidänt worde, und im 2022 isch er s zweit Mol Vizepresidänt und denn 2023 Bundespresidänt worde.

De Alain Berset het nach em Schtudium z Noieburg an de Universität und am WWA-Inschtitut für Wirtschaftsforschig z Hamburg gforschet und isch promovierter Nationalökonom (Dr. oec). Er isch ghürote und isch Vater vo drei Chind. Er isch en Sohn vo de Solange Berset, ere Fryburger Grossrötin, wo im Johr 2010 Presidäntin vom Grosse Rot gsi isch.

De Berset isch vo 2000 bis 2004 Mitglied vom Verfassigsrot im Kanton Friburg gsi und het d SP-Fraktion presidiert. Vo 2011 bis 2003 isch er in sinere Wohngmeind Belfaux im Generalrot gsi. Im 2003 isch er in de Ständerot gwählt worde, wo-n-er im Amtsjohr 2008/2009 presidiert het.

Bi de Bundesrotswahle 2011 isch er im 2. Wahlgang zum Nochfolger vo de abträtende Bundesrötin Micheline Calmy-Rey gwählt worde. Bim Amtaatritt Aafang 2012 hett de Berset s Eidgenössisch Departement vom Innere (EDI) übernoh.^[1] Am 21. Juni 2023 het de Berset si Ruggtritt als Bundesrot per Ändi Johr aagchündet.^[2]

Am 25. Juni 2024 isch de Berset zum Generalsekretär vom Europarot gwehlt worde, s Amt tritt er per 18. September 2024 aa.^[3]