From Wikipedia, the free encyclopedia
De Pfäffikersee isch en 3,3 km² grosse See im Zürcher Oberland, Schwiiz. S Iizugsgebiet isch 40 km² gross. Er liit inere Talänki im Weschte vo de Hügel im Zürcher Oberland. De See isch i Nord-Süd-Richtig zwüsched Pfäffike ZH und Wetzike. Er isch 2,5 km lang und im Schnitt 1,3 km breit. De mittleri Seeschpiegel isch uf 537 m ü. M.. De tüüfschti Punkt vom Seeboden isch uf 501 m ü. M.. De See isch aso 36 m tüüf; im Durchschnitt aber nume 18,5 m.
| Pfäffikersee | ||
|---|---|---|
 | ||
| de Pfäffikersee | ||
| Geographischi Lag | Kanton Züri | |
| Zueflüss | Chämtnerbach | |
| Abflüss | Ustermer Aa | |
| Ort am Ufer | Pfäffike | |
| Date | ||
| Koordinaten | 701346 / 245463 | |
| ||
| Höchi über em Meeresspiegel | 537 m ü. M. | |
| Flechi | 3,3 km² | |
| Maximali Diefi | 36 m | |
 | ||
| Dialäkt: Züridütsch (See) |
De Chämtnerbach, wo d Quäle im weschtliche Tössbergland zwüsched Bäretschwil und Fischetaal häd, isch de äinzig Zuefluss vom Pfäffiekersee. De Chämtnerbach isch öppe 8 km lang. D Mündig isch im Südoschte vom See bi de Badi vo Auslike. D Aa verlaat de See wider richtig Süüde und flüüsst zum Griifesee. S Seeufer isch uf allne Siite usser im Weschte sehr flach.
De See ghört zu Pfäffike, Seegräbe und Wetzike. De alti Ortschern vo Pfäffike isch nööch am Nordufer. S Puuredorf Seegräbe isch im Südweschte. Robehuuse, e frünerigie Zivilgmäind vo Wetzike, isch im Süüde. Im Gebiet um de Pfäffikersee händ scho i de Jungschteiziit Lüüt gwont. Vo dene hät mer vil Reschte gfunde. Die sind us de ur- und früehgschichtliche Ziit (Pfahlboute).
De Pfäffikersee isch im Lauf vo de letschte Iiszeit entschtande, wo de Linthgletscher im Molasseundergrund e übertüüfti Wanne zrugg glaa hät, wo sich mit Wasser gfüllt hät, wo sich s Iis zruggzoge häd. De See wird dur e Endmoräne am Nordwescht- und Nordufer gschtaut, so dass sis Wasser nöd nach Nordweschte id Richtig vo Winterthur abflüüsse chann. Mit dr Ziit hät de de See agfange verlande. Es gid fascht rund um de See en Schilf- und Sumpfgürtel, wo im Süüde im Robehuuser Riet öppe 1 km breit isch. Vom Aafang vom 18. Jahrhundert bis öppe 1950 isch deet Torf gschtoche worde.
De Sohn vom Pfäffiker Hecht-Wirt, de Emil Leeme, häd 1910/11 s erschti Motorboot für de Pfäffikersee pout: de Hecht. De Stapellauf isch am 21. Maie 1911 gsi. Zerscht häds nume Rundfarte gee, ab em 27. Aprile 1916 au en regelmässige Kursvercheer zwüschet Pfäffike, Seegräbe, Auslike und Robehuuse. E Faart vo Robehuuse uf Pfäffike häd 17 Minute tuuret. Binere Teschtfaart mit eme noie Rännboot isch de Leeme 1939 vertrunke. D Schiffaart isch 1941 iigschtellt worde, wills wäge em Chrieg zwenig Benzin gee häd. Später sind nieme Kursschiff dur de Kanal bis uf Robehuuse abe gfare, Rundfaarte aber no sicher bis id 1970er-Jaar. Wo de Emil Leeme gstorbe gsi isch, häd d Gmäind Pfäffike d Wärft kauft und sie ab 1942 de Familie Schufelbärger verpachtet. De Willy Schufelbärger isch Bootsbouer und vorane de Agstellti vom Leeme gsi. No 1984 sind d Schiff a de drü Statione all 20 Minute abgfaare. Hüt wird de Betriib vom Schufelbärger sinere Tochter gfüert. Es git aber nume no Faarte uf pschtelig, wil de Kanton di andere Faarte nüme erlaubt.[1]
| Schiff | Boujaar | uf em See | Wärft | Bemerkung |
|---|---|---|---|---|
| Hecht | 1911 | 1911-2003/2019- | Emil Leeme, Päffike | ab 2019 mit eme Elektromotor[2] |
| Oberland | nach 1911 | -1968 | Emil Leeme, Päffike | 1968 abproche |
| Stoffel | 1933 | 1969- | ? | 1933 Luganersee, 1939 Bootsverlei Stadt Züri, 1963 als „Rex“ Walesee, 1967 im Linthkanal gsunke |
| Tödi | 1907?/09? | 1955- | Steckborn? | "Luna", 1951 Thunersee?, 2018 Elektromotor[3][4] |
Ali Aagabe i de Tabäle:[1]
Wänns lenger sehr chalte isch, gfrüürt de Pfäffikersee im Winter zue. Dezue bruuchts im Mittel e Chältisumme vo 120 Grad (im Vergliich: für de Zürisee sind 320, für de Bodesee 370 Grad nötig). Für di offizielli Freigaab vo dr Eisfläche isch e Iisdicki vo 12 Zentimeter nötig.
S letscht mal isch s Iis vom 26. Januar bis zum 8. Februar und vom 10. bis zum 14. Februar 2006 freigee worde. Zäätuusige Mänsche sind uf de gfroreni See. Di vorletschti Seegfrörni isch im Jahr 2002 gsii.
De See mit siim Schilfgürtel isch es beliebts Natur- und Erholigsgebiet im Kanton Züri. Er schtat under Naturschutz und ghört zu de Landschafte vo nationaler Bedüütig. I de gschützte und nöd zuegängliche Rietbereiche findet mer e einzigartigi Flora mit typische Hochmoor- und Flachmoor-Pflanzengsellschafte.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
