Bezirk Affoltern

S Säuliamt oder au s Chnoonauer Amt isch än Bezirk i de Schwiiz und liit im Südweschtzipfel vom Kanton Züri. De offiziell Name luuted hützdogs Bezirk Affoltern.

Bezirk Affoltere (Säuliamt/Chnoonaueramt)
S Wappe vom Säuliamt
Basisdate
Kanton:	Züri
Verwaltigssitz:	Affoltere
Flächi:	113.01 km²

Es umfasst s Gebiet zwüsched em Freiamt und em Chalberamt/Bezirk Horge, vom Albis-Chamm bis zur Rüüss bi Ottebach.

Es git zwai Wersione, wie s Säuliamt zu däm Namä cho isch: Bi dä altä Hüüser im Amt gseht mär under de Schtäge mängisch än chliinä Ruum. Det hät früenär d Sau gschlafe. Am Tag hät si frei chöne umälaufe. Das isch tüpisch gsii fürs Säuliamt. Dänn gits no ä Legände, dass ä mal än Puur heg müesse äm Fraumünschterschtift sin Zähnte abliefere. Er heig uf äm Albis-Chamm obe ä Sau und äs Chalb Richtig Züri tribe. Do plötzlich seiged äm diä beide dävo gschprunge. S Chalb nach rächts is Sihlthal und d Sau nach links gäge s Rüüsstal. Und sid do heissts det Chalberamt und Säuliamt.

1507 hät de Stadtzürcher Rat beschlosse, sini Bsitztümer weschtlich vo de Albis-Chetti als Landvogtei vom Schlössli in Chnoonau us z verwalte. Vo do ä wäg hät s Säuliamt au Chnoonauer Amt gheisse.

I de Helvetik vo 1798 isch s Chnoonauer Amt für churzi Zyt zum helvetische Bezirk Mäpmischtette worde. Bis es dänn 1837 mid de Verlegig vo de Bezirksverwaltig vo Chnoonau nach Affolterä zum Bezirk Affolterä worde isch. Denäbed wird aber inoffiziell de Name Säuliamt wyter bruucht. Er läbt au im Säuliämtlerliäd wyter, wo s öppe haisst: Diä schwerschte Säu händ mir ellei, dezue es prächtigs Veh und s'beschti Moscht im ganze Land, das händ nur mir, persee. Es git ken Fläck uf de Wält, so schön wiä s Säuliamt...^[1]

1804 sind öppe 150 Mänsche usem Säuliamt uf d Krim uusgwanderet und händ s Dorf Zürichtal ggründet.

Politische Gmeinde

Wappe	Gmeindsnäme	PLZ	Iinwoner (31. Dezember 2021)	Flächi in km²
	Öigscht	8914	1988	7.87
	Affoltere am Albis	8910	12'404	10.56
	Bauschtette	8906	5632	7.42
	Huuse am Albis	8915	3852	13.64
	Hedige	8908	3780	6.59
	Kappel am Albis	8926	1290	7.87
	Chnoonau	8934	2445	6.48
	Maschwande	8933	641	4.67
	Mäpmischtette	8932	5570	13.11
	Obfälde	8912	5760	7.54
	Ottebach	8913	2745	4.98
	Rifferschwil	8911	1150	6.50
	Schtalike	8143	3825	12.01
	Wettschwil am Albis	8907	5288	3.77
	Total (14)		56'370	113.01

Externi Syte

• knonauer-amt.ch - Portalsyte für's Säuliamt

Einzelnachwys

1. Squix.org: Säuliämtlerlied und Ämtlermarsch

Bezirk vom Kanton Züri Affoltere | Andelfinge | Büüli | Dielsdorf | Dietike | Hinwil | Horge | Mäile | Pfäffike | Uschter | Winterthur | Züri Kanton Züri | Bezirke vo dr Schwiiz | Gmäinde vom Kanton Züri

Dä Artikel basiert uff ere fräie Übersetzig vum Artikel „Affoltern_(Bezirk)“ vu de dütsche Wikipedia. E Liste vu de Autore un Versione isch do z finde.