Bevölkerig
From Wikipedia, the free encyclopedia
Mit em Begriff Bevölkerig bezäichnet mä die menschligi Populazion innerhalb vo gwüsse geografische Gränze[1]. Si underschäidet sich vo Grubbierige wie Stamm, Volk und Ethnii, wo sich uf d Abstammig bezien.
In dr Wüsseschaft isch d Bevölkerig s brimäre Undersuechigsobjekt vo dr Demografii, wo mit statistische Methode d Struktur und d Entwicklig vo dr Bevölkerig undersuecht. Die rüümligi Verdäilig vo dr Bevölkerig im ene bestimmte Gebiet wird nid nume vo dr Demografii sondern au vo dr Bevölkerigsgeografii undersuecht, die historischi Entwicklig vo Bevölkerige vo dr Bevölkerigsgschicht.
Bis zum 18. Joorhundert het Bevölkerig nit d Bestandsufnaam vo Populatione bedütet, sondern isch en iidütschti Form vom Begriff Peuplierung (orig. Peuplement, au: Pöblierung), wo us em Franzöösische abgläitet gsi isch und sich mit dr Aariicherig vo Populazione, iirer Verdichdig und Wandlig as demografische Brozäss im Allgemäine und as Geegestand vo der Bevölkerigspolitik, wo denn mäistens absolutistisch brägt gsi isch, im Bsundrige beschäfdigt het.