Vlag van Afghanistan

Die nasionale vlag van Islamitiese Emiraat van Afghanistan (Pasjtoe: د افغانستان رپی; Dari-Persies: پرچم افغانستان) is op 15 Augustus 2021 amptelik in gebruik geneem nadat die Taliban die oorlog wat van 2001 tot 2021 geduur het, gewen het. Die vlag vertoon ’n enkele wit baan met die Sjahada in swart daarop aangebring in die Thuluth-skrif.

Vlag van Afghanistan

Vlag van Afghanistan
Gebruik	Nasionale vlag en vaandel
Verhouding	1:2
Goedgekeur	27 Oktober 1997; 26 jaar gelede (1997-10-27) (oorspronklik) 15 Augustus 2021; 3 jaar gelede (2021-08-15) (herinstelling)
Ontwerp	Die Sjahada in swart op 'n wit veld in die kalligrafiese Thuluth-skrif
Wisselvormvlag van Afghanistan
Bynaam	Alternatiewe weergawe
Gebruik	Nasionale vlag en vaandel
Verhouding	2:3
Goedgekeur	2013
Ontwerp	Die Sjahada in swart op ’n wit veld, daaronder is "Islamitiese Emiraat van Afghanistan" in Pashto, albei geskryf in kalligrafiese skrif

In teenstelling word die driekleurvlag van die internasionaal erkende Ismalitiese Republiek van Afghanistan steeds internasionaal gebruik, asook deur interne weerstandsbewegings. Dié vlag bestaan uit drie vertikale bane in swart, rooi en groen met die nasionale wapen in wit in die middel van die vlag. Om die wapen is omring deur koringgerwe en bevat verskeie elemente: ’n Sjahada, ’n Takbir, sonstrale, ’n moskee met ’n mihrab en minbar, twee verkleinde Afghaanse vlae, die jaartal 1298 in die Irannese kalender (dit stem ooreen met 1919 in die Gregoriaanse kalender), en die naam van die volk. ’n weergawe van hierdie driekleurvlag, wat in Julie 1928 deur Koning Amanoellah Khan in gebruik geneem is, is soortgelyk aan die driekleurvlag soos in die paragraaf beskryf.

Geskiedenis

In die tydperk van die Hotaki-dinastie is ’n eenvoudige swart vlag gebruik. Daarna is ’n tweekleur in groen, wit en groen gebruik onder die regering van Ahmad Shah Durrani. Gedurende die Barakzai-dinastie is geen vlag gebruik nie en dit is in dié tydperk dat Afghanistan ’n emiraat geword het. Onder die regering van Abdoer Rahman Khan is weer, soos in die tyd van die Hotaki-dinastie, ’n eenvoudige swart vlag gebruik.

Aan die begin van die twintigste eeu, onder die regering van Habiboellah Khan, is ’n swart vlag met ’n seël gebruik wat die voorloper is van die huidige embleem van Afghanistan. Hahibullah Khan se opvolger, Amanoellah, het uitgebrei op sy vader se vlag deur uitgaande strale in die vorm van ’n oktagram om die seël te sit. Hierdie styl was algemeen in die Ottomaanse Ryk. In 1926 het Afghanistan ’n koninkryk geword en daarmee ook ’n verandering aan die vlag. Die seël is effens gewysig en ’n lourierkrans is om die seël is gesit. Die derde vlag wat onder Amanullah gebruik is, was ’n horisontale driekleur in swart, rooi en groen, weer met die oktagram-seël in die middel. Die swart het die voorafgaande vlae voorgetel, die rooi het die bloedvergieting vir onafhanklikheid (tydens die Derde Anglo-Afghaanse Oorlog) voorgestel en die groen het die hoop op ’n beter toekoms voorgestel. Die laaste vlag wat onder Amanullah gebruik is, was ’n vertikale driekleur in die kleure van die derde vlag met ’n seël in die middel waarop ’n son oor sneeubedekte berge opkom. Dit simboliseer ’n nuwe begin vir die koninkryk.

In 1929, onder regering van Habiboellah Kalakani of Bacha-i-Saqao is ’n vertikale driekleur in rooi, swart en wit gebruik. Dit was dieselfde vlag wat gebruik is toe die hedendaagse Afghanistan in die 13de eeu onder Mongoolse besetting was. Later daardie jaar het die vlag weer verander, onder regering van Nader Sjah. Die vorige vertikale vlag is weer ingestel maar die seël is verander na die oktagram van Amanullah. ’n Jaar later is die vlag weer verander. Nader se opvolger, sy seun Zahir Sjah, het die oktagram-seël gewysig deur die uitgaande strale te verwyder en die seël te vergroot. Onder die moskee en die krans is die jaartal ١٣٤٨ (1348 van die Islamitiese maankalender of 1929 van die Gregoriaanse kalender) toegevoeg om die begin van Mohammed Nadir Shah se dinastie aan te dui.

In 1973 het Afghanistan ’n republiek geword, waarmee ’n verandering in die vlag gepaard gegaan het. In hierdie wysiging is die ١٣٤٨ uit die vlag verwyder. In 1974 is die vlag weer verander. Die vlag is weer na ’n horisontale driekleur verander. Die kleure het gebly maar die betekenisse daarvan het verander: swart het die obskure verlede voorgestel, rooi het die bloedvergieting vir onafhanklikheid voorgestel en groen het die voorspoed van landbou voorgestel. ’n Nuwe seël is in die skildhoek ingevoeg met ’n arend met gespreide vlerke, ’n preekstoel (minbar) op die arend se bors (vir ’n moskee), koringgerwe om die arend en sonstrale bo die arend om die nuwe republiek voor te stel.

Toe die leier van die republiek in 1978 vermoor is, is ’n nuwe regime met die bystand van die Sowjetunie as ’n sekulêre sosialistiese staat ingestel. Vir ’n kort tyd gedurende die oorgang is die vlag behou met die wapen in die skildhoek verwyder. Later daardie jaar is ’n nuwe vlag vir die demokratiese republiek ingestel. Dit was ’n rooi vlag met ’n geel seël in die skildhoek (dit was ’n algemene ontwerp vir sosialistiese state in die 20ste eeu. Die koringgerf het gebly maar ’n ster is bo-aan bygesit (om die vyf etniese groepe van Afghanistan voor te stel) en die woord ‘Khalq’ (wat ‘mense’ in Arabies beteken) in die middel. Die vlag is ook gebruik as die vlag van die Demokratiese Volksparty van Afghanistan se Khalq-faksie onder president Nur Muhammad Taraki tot sy moord in 1979.

Na die omverwerping van die Khalq-faksie deur die Parcham-faksie is die vlag weer verander. Die omverwerping het in Desember 1979 plaasgevind. Die nuwe leierskap het die swart, rooi en groen driekleur heringestel om die verlede, bloedvergieting vir onafhanklikheid en die Islamitiese geloof onderskeidelik voor te stel. ’n Nuwe seël is ontwerp met ’n opkomende son (’n verwysing na die vorige naam, Khorasan, wat “Land van die Opkomende Son” beteken), ’n kansel en ’n boek (waarskynlik die Kommunistiese Manifes of Das Kapital van Karl Marx), linte in die nasionale kleure, ’n rat vir die industrie en ’n rooi ster vir kommunisme.

In 1992 het die vlag weer verander deurdat die rat in die seël geskuif is, die rooi ster en die boek verwyder is en die groen agtergrond gebuig is om die horison voor te stel. Vir ’n kort wyle in 1992 was die land bekend as die Islamitiese Staat Afghanistan. Hierdie staat het ’n groen, wit en swart horisontale driekleur gebruik met die Takbir “Allahoe Akhbar” (in Arabies) in die boonste groen baan en die Sjahada in die middelste wit baan. Hierdie vlag was die eerste wat nie die rooi kleur van nasionalisme en stamgebondenheid bevat het nie sedert 1928. Na die ontbinding van die tussentydse regering het die vlag wéér verander. Die Afghaanse seël is weer teruggebring, hierdie keer in goud en met die woorde “دا افغانستان اسلامی دولت” (Islamitiese Staat Afghanistan) in die onderste deel van die seël.

Tussen 1996 en 1997 het die Taliban die Islamitiese Emiraat Afghanistan gevestig en ’n eenvoudige wit vlag gebruik. Tussen 1997 en 2001 het hulle die wit vlag behou maar die Sjahada daartoe bygevoeg. ’n Tussentydse Administrasie het tussen 2001 en 2002 ’n vlag soortgelyk aan die vorige een van die Islamitiese Staat Afghanistan met blou Arabiese skrif aan weerskante van die seël. In 2002 is ’n Tradisionele Afghaanse Administrasie saamgestel en het hulle ’n vertikale driekleur in swart, rooi en groen gebruik met die seël in die middel, soortgelyk aan die vlae van 1930 tot 1974. Hierdie seël het egter die jaartal ١۲۹٨ (1298) van die Islamitiese sonkalender daarop. Dit is die jaar waarin onafhanklikheid van die Verenigde Koninkryk verkry is. In 2004 is die vlag weer verander. Hierdie keer is die verhouding gewysig en is “دا افغانستان اسلامی دولت” (Islamitiese Staat Afghanistan) vervang met “ افغانستان” (Afghanistan). In 2013 is die nasionale wapen vergroot sodat dit nou ook oor die swart en groen bane streek.

• 
  Vlag van die Hotaki-dinastie, 1709 tot 1738
• 
  Die Afghaanse Emiraat, 1826 tot 1880
• 
  Vlag van die Afghaanse Emiraat, 1880 tot 1901
• 
  Vlag van die Afghaanse Emiraat, 1901 tot 1919
• 
  Vlag van die Afghaanse Emiraat, 1919 tot 1926/29
• 
  Vlag van die Afghaanse Emiraat, 1921 tot 1926/29
• 
  Vlag van die Koninkryk Afghanistan, 1926 tot 1928
• 
  Vlag van die Koninkryk Afghanistan, 1928
• 
  Vlag van die Koninkryk Afghanistan, 1928 tot 1929
• 
  Vlag van die Koninkryk Afghanistan, 1929
• 
  Vlag van die Koninkryk Afghanistan, 1929
• 
  Vlag van die Koninkryk Afghanistan, 1929
• 
  Vlag van die Koninkryk Afghanistan, 1929 tot 1930
• 
  Vlag van die Koninkryk Afghanistan, 1930 tot 1973
• 
  Vlag van die Republiek Afghanistan, 1973 tot 1974
• 
  Vlag van die Republiek Afghanistan, 1974 tot 1978
• 
  Vlag van die Demokratiese Republiek Afghanistan, 1978
• 
  Vlag ban die Demokratiese Republiek Afghanistan, 1978 tot 1980
• 
  Vlag van die Demokratiese Republiek Afghanistan, 1979
• 
  Vlag van die Demokratiese Republiek Afghanistan, 1980
• 
  Vlag van die Demokratiese Republiek Afghanistan, 1980 tot 1987
• 
  Vlag van die Republiek Afghanistan, 1987 tot 1992
• 
  Vlag van die Islamitiese Staat Afghanistan, 1992
• 
  Vlag van die Islamitiese Staat Afghanistan, 1992
• 
  Vlag van die Islamitiese Emiraat Afghanistan/Noordelike Alliansie, 1992 tot 2001
• 
  Vlag van die Islamitiese Emiraat Afghanistan, 1996 tot 1997
• 
  Vlag van die Islamitiese Emiraat Afghanistan, 1997 tot 2001
• 
  Alternatiewe vlag van die Islamitiese Emiraat Afghanistan, 1997 tot 2001
• 
  Vlag van Afghanistan, 2001 tot 2002
• 
  Vlag van Afghanistan, 2002 tot 2004
• 
  Vlag van Afghanistan met goue wapen, 2002 tot 2004
• 
  Vlag van Afghanistan, 2004 tot 2013
• 
  Vlag van Afghanistan, 2013 tot 2021

Ander

• 
  Standaard van die Koning van Afghanistan, 1931 tot 1973
• 
  Vlag van die Afghaanse Weermag, 1978
• 
  Standaard van die President van Afghanistan, 2004 tot 2013
• 
  Standaard van die President van Afghanistan, 2013-2021
• 
  Vlag van die Afghaanse Lugmag
• 
  Vlag van die Afghaanse Nasionale Polisie

Kleure

Die kleurskema vir die vlae van 1928 tot 1978 en sedert 1980 word hieronder gelys:

	Swart	Rooi	Rooi	Groen	Groen	Wit
RGB	0/0/0	211/32/17	190/0/0	0/122/54	0/153/0	255/255/255
Heksadesimaal	#000000ff	#d32011ff	#be0000ff	#007a36ff	#009900ff	#FFFFFF
CMYK	0/0/0/100	0/85/92/17	0/100/100/25	100/0/56/52	100/0/100/40	0/0/0/0

Trivia

Vlag van die Republiek van Weimar (1919–1933), glo die inspirasie vir die Afghaanse eweknie

Op 22 Februarie 1928 het koning Amanullah Khan van Afghanistan vir vyf dae na Duitsland gereis en Berlyn en München besoek. Duitsland het sedert 1919 die Afghaanse regering en mense finansieel, polities en kultureel in feitlik alle gebiede van infrastruktuur, tegnologie en onderwys ondersteun. Amanullah Khan is glo deur die vorm en kleur van Duitsland se swart-rooi-goue vlag geïnspireer, want in dieselfde jaar is vir die eerste keer in Afghanistan ’n drie-kleurige vlag met horisontale strepe in swart-rooi-groen bekendgestel. Die landswapen was in wit in die vlag van Afghanistan se sentrum.^[1]

Verwysings

1. (en) "Bibliography (codes [bas] to [baz])". Flags of the World. Geargiveer vanaf die oorspronklike op 28 Julie 2018. Besoek op 27 Mei 2019.

Eksterne skakels

Wikimedia Commons bevat media in verband met Vlae van Afghanistan.

• (en) Afghanistan by Flags of the World
• (en) "Flag of Afghanistan". Encyclopædia Britannica. Besoek op 27 Mei 2019.