Eksteenfontein

Eksteenfontein is 'n klein nedersetting in die Richtersveld. Die dorpie lê aan die riviertjie met die naam Stinkfontein en is omring deur berge. Dit het ongeveer 800 inwoners en die meeste mans werk op die myne by Alexanderbaai en Kleinsee. Buite die dorpie woon die nomadiese Namaboere in tradisionele matjieshuise. Bokke loop nog vrylik deur die strate.

Eksteenfontein
Gehug
Eksteenfontein
Eksteenfontein  Eksteenfontein se ligging in Noord-Kaap
Koördinate: 28°50′0″S 17°15′0″O
Land	Suid-Afrika
Provinsie	Noord-Kaap
Distrik	Namakwa
Munisipaliteit	Richtersveld
Oppervlak [1]
• Totaal	0,73 km2 (0,28 vk. myl)
Bevolking  (2011)[1]
• Totaal	531
• Digtheid	727/km2 (1 880/vk. myl)
Rasverdeling (2011) [1]
• Bruin mense	89.3%
• Swart mense	0.9%
• Ander	9.8%
Taal (2011) [1]
• Afrikaans	94.5%
• Engels	1.3%
• Tswana	1.1%
• Ander	3.0%
Poskode (strate)	8284

Rondom 1950 moes die 68 gesinne Bosluisbasters onder die leiding van eerw. Pieter Eksteen hulle hier op die plaas Stinkfontein vestig as gevolg van die Groepsgebiedewet. Die gemeente het 'n eenvoudige kerk gebou, die dorpie na hul leier vernoem en die naam in wit klippe teen 'n rant uitgepak.

In die dorpie is die kantoor van die Richtersveld gemeenskapsbewaringsgebied wat tot wêrelderfenisgebied verklaar is. Dit het toerisme en die ekonomie van die streek baie ten goede gekom. In die laerskool word Nama as taal onderrig. Daar is 'n museum, biblioteek, creche en posagentskap. Selfoonontvangs in die dorp en omgewing is baie beperk. Daar is geen vulstasie, restaurant, winkels of outobank nie.

Sien ook

• Lys van dorpe in Suid-Afrika

Verwysings

1. "Hoofplek Eksteenfontein". Sensus 2011.