Anti-Kominternpakt

Die Anti-Kominternpakt (Duits: Antikominternpakt, Italiaans: Patto anticomintern, Japannees 防共協定 Bōkyō kyōtei) was 'n verdrag onderteken deur die Japannese Ryk en Nazi-Duitsland op 25 November 1936, teen kommunisme, in besonder die Sowjetunie. In 1937 het Italië by hierdie verdrag aangesluit, wat die spilmoonthede gevorm het. Later het die nuwe lede van die spilmoonthede en Spanje aangesluit.

Joachim von Ribbentrop, Hitler se minister van buitelandse sake, het die Anti-Kominternpakt onder die wakende oog van die Japannese ambassadeur Kintomo Mushakoji onderteken.

Die verdrag was bedoel, volgens die ondertekenaars, om die wêreldgemeenskap teen kommunisme te beveilig. Elke party en elke land wat by die Komintern, die Kommunistiese Internasionale, aangesluit het, was amper outomaties 'n vyand van Japan en Duitsland.

In die geval van 'n aanval deur die Sowjetunie op Duitsland of Japan, sal die twee lande saam besluit watter maatreëls nodig was. Daarbenewens het die lande ooreengekom dat hulle geen politieke verdrae met die Sowjetunie sou sluit nie en Duitsland het die Japannese vasaalstaat Mantsjoekwo, wat op Chinese grondgebied was, erken.

Sien ook

• Verdrag van Staal

Eksterne skakels

• Relations of Japan with the European axis powers, in United States Department of State, Papers relating to the foreign relations of the United States, Japan: 1931-1941, II, Washington, 1943, pp. 153-186.

Hierdie artikel is in sy geheel of gedeeltelik vanuit die Nederlandse Wikipedia vertaal.