2018 VG18

2018 VG₁₈, met die bynaam Farout, is ’n verafgeleë trans-Neptunus-voorwerp. Op ’n afstand van ~120 AE (meer as drie keer dié van Pluto van die Son af en byna twee keer die gemiddelde afstand van Eris), is dit tans (Desember 2018) die verste voorwerp in die Sonnestelsel wat nog waargeneem is (die vorige verste voorwerp was Eris). Dit is sover bekend die enigste voorwerp verder as 100 AE van die Son af, vandaar die bynaam.^[2] 2018 VG₁₈ is 'n klein, ronde voorwerp met 'n pienkerige kleur. ’n Wentelbaan om die Son duur waarskynlik sowat 1 000 jaar.^[3]

2018 VG₁₈   

2018 VG18 se wentelbaan in die Sonnestelsel.
Ontdekking [1]
Ontdek deur	Scott Sheppard David Tholen Chad Trujillo
Datum	10 November 2018
Kleinplaneet-benaming	2018 VG18
Alternatiewe name	"Farout" (bynaam)
Kleinplaneet-kategorie	TNV
Wentelbaaneienskappe
Epog 18 Novemver 2018 (Juliaanse dag 2458440,5)
Afelium	168,7 AE
Perihelium	21,7 AE
Halwe lengteas	95,2 AE
Wentelperiode	929 jaar
Gem. anomalie	73,77°
Baanhelling	31,7°
Lengteligging van stygende nodus	247,4°
Periheliumhoek	32,9°
Fisiese eienskappe
Afmetings	~500 km
Skynmagnitude	24,6
Absolute magnitude	3,25

Dit is egter nie naastenby die voorwerp met die grootste gemiddelde wentelbaan nie, want sy semihoofas is na raming sowat 95,2 AE (in vergelyking hiermee is die semihoofas van 2014 FE₇₂ sowat 1 550 AE). Scott S. Sheppard, David Tholen en Chad Trujillo het 2018 VG₁₈ ontdek terwyl hulle op soek was na die hipotetiese Planeet Nege.^[4]

Eienskappe

2018 VG₁₈ se deursnee is na raming sowat 500 km en dit is dus moontlik ’n dwergplaneet.^[4] Dit het ’n pienkerige kleur, wat dui op ’n hoë konsentrasie toliene op oppervlak-ys.^[5]

Sy wentelbaan in vergelyking met dié van Eris en ander TNV's.

Naam

Vanweë die onsekerheid oor sy wentelbaan is die voorwerp nie genommer nie. Die Internasionale Astronomiese Unie se Kleinplaneetsentrum het dit die voorlopige naam 2018 VG₁₈ gegee.^[1] Die mense wat by die aanvanklike ontdekking betrokke was, het dit die bynaam "Farout" gegee.^[5]

Wentelbaan

Volgens die Kleinplaneetsentrum is 2018 VG₁₈ se huidige wentelbaan 125 tot 130 AE, maar die spesifieke besonderhede van die baan is nog nie vasgestel nie.^[1] Die JPL se kleinliggaamdatabasis beskou die onsekerheid oor sy wentelbaan tans as groter as 100%.^[6] Dit kan verskeie jare van waarneming kos om die eienskappe van sy wentelbaan behoorlik vas te stel vanweë die stadige spoed van die voorwerp.^[7]